प्रचण्डले सचिवालयबाट 'जनयुद्ध'का घाइते हटाएपछि माओवादी केन्द्रमा असन्तुष्टि

प्रचण्डले सचिवालयबाट 'जनयुद्ध'का घाइते हटाएपछि माओवादी केन्द्रमा असन्तुष्टि

A+ A A-

प्रधानमन्त्री पुष्पकमल दाहाल प्रचण्डको सचिवालयबाट जनयुद्धका घाइते हटाइएका छन् । आफ्नो सचिवालय चुस्त बनाउन भन्दै प्रचण्डले १ माघदेखि लागू हुने गरी स्वकीय सचिवालयका १३ जना कर्मचारी हटाउँदा 'जनयुद्ध'का घाइतेसमेत हटाइएका हुन् ।

१० वर्षे 'जनयुद्ध'का क्रममा २०६१ मा रुकुमको खारा भिडन्तमा बायाँ हातको पाखुरा गुमाएका लालबहादुर कुमाल (लाले कुमाल) लाई सचिवालयबाट हटाइएको छ । उनी स्वकीय शाखा अधिकृतको रूपमा २०७९ चैत २७ देखि कार्यरत थिए । माओवादी केन्द्रको सुदूरपश्चिम प्रदेश कमिटीले सिफारिस गरेर उनी प्रधानमन्त्रीको सचिवालयमा नियुक्त भएका थिए ।

'जनयुद्ध'का घाइते कुमालले उपचारका लागि नियमित दिल्ली आउजाउ गर्नुपर्छ । दिल्लीको एपोलो अस्पतालमा उनको उपचार भइरहेको छ । तर, रकम अभावले हरेक महिना दिल्ली जान नसकेर काठमाडौंमै नै घाउ नपाकोस् भनेर इन्जेक्सन लगाउने गरेको कुमाल बताउँछन् । ‘अहिले पनि नियमित उपचार गर्नुपर्छ । दिल्ली जान सम्भव छैन । हरेक महिना यहीँ इन्जेक्सन लगाउने गरेको छु,' कुमालले शिलापत्रसँग भने, 'उपचार गर्न आर्थिक रूपमा समस्या छ ।'

'जनयुद्ध'का क्रममा कुमालकी श्रीमती पनि घाइते भएकी थिइन् । उनी म्याग्दीको बेनी आक्रमणमा घाइते भएकी थिइन् । तर, प्रधानमन्त्रीको सुशासन अभियानमा सघाउन आफू तयार रहेको उनी बताउँछन् । 'प्रधानमन्त्रीको सुशासनलाई सहयोग गर्न हरदम तयार छु । प्रधानमन्त्रीलाई सकेको सहयोग गर्छु,’ उनले भने ।

प्रचण्डले कुमाललाई सचिवालयबाट हटाएकोमा सुदूरपश्चिमका माओवादी नेताहरू असन्तुष्ट छन् । कुमाललाई सचिवालयबाट हटाइएपछि उनको उपचारमै समस्या हुने सुदूरपश्चिमका एक माओवादी नेताले बताए । ‘उहाँ (कुमाल) को आर्थिक र शारीरिक अवस्था कमजोर भएकाले सचिवालयमा पठाएका हौँ । अहिले हटाएछन् । उहाँलाई समस्या नै हुन्छ,’ उनले भने ।

सचिवालयबाट हटाइएका रुकुमपश्चिमका कलबहादुर नाथ पनि 'जनयुद्ध'का घाइते हुन् । उनी २०७९ चैतमा स्वकीय उपसचिवका रूपमा कार्यरत थिए । अछामको मंगलसेन आक्रमणका क्रममा उनका दुवै खुट्टामा गोली लागेको थियो । नाथले मासिक ८ हजारको औषधि खानुपर्छ ।

नाथ घर गएको समयमा सचिवालयबाट हटाइएका हुन् । ‘मलाई (सचिवालयबाट) हटाएको भन्ने सुनेको छु । म घर आएको छु । फर्केपछि एकपटक प्रधानमन्त्रीज्यूलाई भेट्छु । मलाई समस्या छ । यो विषयमा कुरा राख्छु,’ नाथले शिलापत्रसँग भने ।

त्यस्तै, स्वकीय सहसचिवको पदमा कार्यरत नारायणप्रसाद ढुंगाना (सूर्यकिरण शर्मा) पनि हटाइएका छन् । उनले प्रचण्ड प्रधानमन्त्री हुनुभन्दा अघिदेखि नै प्रेस संयोजकको भूमिका निर्वाह गर्दै आएका थिए । शर्माको बिदाइ सचिवालयको खिचातानीका कारण भएको बालुवाटार स्रोत बताउँछ ।

स्वकीय सचिवालयमा माथिल्लो तहमा रहेका टाठाबाटालाई जोगाएर तल्लो तहमा कार्यरत इमानदारलाई हटाइएको भन्दै माओवादीभित्र असन्तुष्टि बढ्न थालेको छ । ‘सुशासन कामय गर्ने, मितव्ययी हुने नाममा सचिवालयमा कम पारिश्रमिक पाउने, उपचार गर्नै समस्या भएका साथीहरू निकाल्दा राम्रो सन्देश गएन । उहाँहरूलाई राखेर अरुलाई बिदाइ गर्दा राम्रो सन्देश जान्थ्यो,’ माओवादी केन्द्रका एक नेता भन्छन् । प्रधानमन्त्रीको सचिवालयमा कार्यरतमध्ये प्रचण्डकी छोरी गंगा दाहाल, रमेश मल्ल, प्रकाश रायमाझीलगायतको आलोचना हुँदै आएकाहरू भने सचिवालयमै छन् ।

प्रचण्डले सल्लाहकारहरू पनि कटौती गर्न लागेको चर्चा बालुवाटारमा छ । तर, विदेश भ्रमणको तयारीमा रहेका प्रचण्डले फर्केपछि सल्लाहकार कटौती गर्ने स्रोत बताउँछ । ‘सल्लाहकारहरू विदेश भ्रमणबाट फर्केपछि हटाउने तयारी भएको छ । प्रेस र परराष्ट्रबाहेक अरु सल्लाहकार हटाएर अवैतनिक सल्लाहकार राख्ने तयारी भएको छ,’ स्रोत भन्छ ।

पुस १२ मा प्रधानमन्त्री कार्यालय सिंहदरबारमा कार्यरत ६८ जना कर्मचारीको दरबन्दी कटौती भएको थियो । त्यसैको निरन्तरतामा स्वकीय सचिवालयमा पनि कर्मचारी कटौती भएको हो । निजी सचिवालयमा पनि ५० प्रतिशत कर्मचारी कटौती गर्ने प्रचण्डको योजना छ ।

प्रकाशित मिति: बुधबार, माघ ३, २०८० १८:५३