जो बाबुबाट बलात्कृत बहिनीलाई न्याय दिलाउन चाहन्थे, आफैँ मारिए

A+ A A-

गत असोजमा पश्चिम सुर्खेतकी १९ वर्षीया सुर्खेत (क) (नाम परिवर्तित) का बाबु घर आए । मामा घरमा बस्दै आएकी उनी भारतमा मजदुरी गर्दै आएका बुबालाई भेट्न घर पुगिन् ।

धेरैपछि बुबासँग भेट हुने भएपछि खुसीले घर पुगेकी उनका लागि त्यो रात मात्र अँध्यारो होइन, जीवन नै अँध्यारो बनेर आयो । त्यो रात बुबाले छोरीसँगको पवित्र नाता नै बिर्सिदिए । भेट्न बोलाएका उनका बुबाले २७ असोजमा उनीमाथि जबर्जस्ती करणी गरे ।

आफ्नै बुबाबाट जबर्जस्ती करणी र यौन हिंसामा परेकी उनी विक्षिप्त बनिन् । ती किशोरीले बुबाले आफूमाथि जबर्जस्ती करणी गरेको घटना आफ्नी कान्छी आमालाई सुनाइन् ।

कान्छी आमाले यस्तो कुरा बाहिर भने इज्जत जान्छ भन्दै हप्काइन् । उनलाई लाग्यो, अब न्याय पाउने ढोका बन्द भयो । केही समय ती किशोरी उक्त घटना लुकाएरै बसिन् ।

बुबाबाट जबर्जस्ती करणीमा परेपछि मानसिक तनावमा रहेकी उनले घटनाको दुई सातापछि आफ्नो दाइलाई बताउने हिम्मत जुटाइन् । उनका दाइले बहिनीमाथि भएको अपराधका बारेमा बुबालाई भन्दा उल्टै हप्काइ खाए । बहिनीमाथि गलत हर्कत गरी उल्टै झगडा गर्न खोज्ने भन्दै किशोरीका दाइले एक गैरसरकारी संस्थाको सहयोगमा १५ कात्तिकमा जिल्ला प्रहरी कार्यालय सुर्खेतमा बुबाविरुद्ध जबर्जस्ती करणीको मुद्दा दर्ता गराए ।

उतिबेला छोरालाई उजुरी नहाल्न बुबाले धम्कीसमेत दिएका थिए । प्रहरीमा उजुरी परेपश्चात् कान्छी श्रीमतीसहित उनका बुबा पुनः भारत भागेका थिए ।

किशोरीले प्रहरीमा दर्ता गराएको जाहेरीमा भारतमा काम गर्ने आफ्ना बुबाले भेट्न बोलाएर जबर्जस्ती करणी गरेको उल्लेख छ ।

प्रहरीले पीडित किशोरीको स्वास्थ्य परीक्षण १६ कात्तिकमा प्रदेश अस्पताल सुर्खेतमा गर्‍यो । उक्त परीक्षणबाट करणी भएको पुष्टि भएको थियो । घटनापछि मामाघरमा बस्दै आएकी ती किशोरी दाजुसँगै बस्दै आएकी थिइन् ।

ती किशोरीका बुबाले बहुविवाह गरेका छन् । उनीहरू जेठी श्रीमतीतर्फका सन्तान हुन् भने कान्छीबाट कुनै पनि सन्तान छैनन् । आफ्नै सहोदर बुबाबाट जबर्जस्ती करणीमा परेकी बहिनीलाई न्याय दिन तम्सिएका उनै २१ वर्षीय दाजुको मंगलबार राति बीभत्स हत्या भएको छ । हत्यापछि घरसँगै रहेको बाख्राको खोरनजिक स्याउलाले ढाकिएको अवस्थामा ती किशोरीले आफ्ना दाइको शव फेला पारेकी थिइन् । पिसाब फेर्न निस्किएकी उनले दाइको हत्या भएको देखेपछि स्थानीयलाई खबर गरेकी थिइन् ।

स्थानीयबाट खबर पाएपछि पुगेको प्रहरीको प्रारम्भिक अनुसन्धनबाट ती युवकको हत्या भएको खुलेको छ । ‘घटनाको प्रकृति हेर्दा हत्या नै भएको देखिन्छ,’ अनुसन्धानमा संलग्न एक प्रहरी अधिकृतले भने, ‘मृतकको शरीरमा धारिलो हतियार प्रहार भएको देखिन्छ भने, शवनजिकै बञ्चरो पनि फेला परेको छ ।’

घटनालगत्तै जिल्ला प्रहरी कार्यालय सुर्खेतका प्रमुख प्रहरी उपरीक्षक योगेन्द्र सिंह थापा, कर्णाली प्रदेश प्रहरी कार्यालयका प्रहरी वरिष्ठ नायब निरीक्षक नारायण शर्मा, जिल्ला प्रहरी कार्यालय सुर्खेतका प्रहरी हवल्दार टीकाराम आचार्यको टोली नेपालगञ्जबाट कुकुरसहित घटनास्थल पुगेको थियो । सो टोलीले युवाको हत्या भएको पुष्टि गरेको छ । मृतकको शव पोस्टमार्टमका लागि प्रदेश अस्पतालमा राखिएको छ ।

मृतकका बाबुका नाममा जाहेरी

जिल्ला प्रहरी कार्यालय सुर्खेतमा मृतकका बुबाविरुद्ध कर्तव्य ज्यानसम्बन्धी जाहेरी दर्ता भएको छ । जिल्ला प्रहरी कार्यालय सुर्खेतका कार्यवाहक प्रवक्ता एवं प्रहरी निरीक्षक कृष्णबहादुर खड्काले मृतकका काकाले कर्तव्य ज्यानसम्बन्धी किटानी जाहेरी दिएको बताए ।

खड्काका अनुसार मृतककी बहिनीले भारतमा रहेका बुबाले नै दाइको हत्या गरेको प्रारम्भिक बयान दिएकी छिन् । उनले आफूलाई बलात्कार गरेको घटनामा बुबा र दाइबीच विवाद भएको समेत बताएको उनले बताए ।

जाहेरी दर्ता भएसँगै शवको पोस्टमार्टम गरेर थप अनुसन्धान प्रक्रिया अगाडि बढाइने प्रहरी निरीक्षक खड्काले बताए । प्रहरीले समेत हत्यामा मृतकका बाबुकै संलग्नता रहेको हुन सक्ने आंशका गरेको अनुसन्धानमा संलग्न एक प्रहरी अधिकृतले शिलापत्रलाई बताए ।

‘भारतमा रहेका मृतकका बुबा केही दिनअघि नेपाल आएको हामीले सूचना पाएका छौँ,’ ती अधिकृतले भने, ‘पीडित किशोरीले बुबाले नै हत्या गरेको भनेकी छिन् । तर, हामीले ठोस प्रमाण प्राप्त गर्न सकेका छैनौँ, तालिमप्राप्त कुकुरसहितको टोलीले सूक्ष्म अनुसन्धान गरिरहेको छ ।’

प्रकाशित मिति: बुधबार, माघ ३, २०८० १४:५१