मधेशका मुख्यमन्त्रीले सरकारको उपलब्धि सार्वजनिक गर्दा सत्ता साझेदार जनमतको विरोध

मधेशका मुख्यमन्त्रीले सरकारको उपलब्धि सार्वजनिक गर्दा सत्ता साझेदार जनमतको विरोध

A+ A A-

मधेश प्रदेश सरकारको उपलब्धि सार्वजनिक कार्यक्रममा सत्ता साझेदार दलबाटै विरोध प्रदर्शन भएको छ । आज मधेश प्रदेश सरकारले स्वाभिमान दिवस मनाउँदै छ । सोही अवसरमा मुख्यमन्त्री सरोज कुमार यादवले आफ्नो सरकारले एक वर्षमा गरेका उपलब्धि सार्वजनिक गरेका छन् ।

जनकपुरधामको महेन्द्रनारायण निधि मिथिला संस्कृति केन्द्रमा आयोजित कार्यक्रममा मुख्यमन्त्रीले सरकरका कामबारे जानकारी गराउँदा जनमत पार्टीका नेता तथा कार्यकर्ताहरूले भने कार्यक्रमस्थलमै नारावाजी गरेका छन् । जनमतका कार्यकताहरूले भ्रष्ट सरकार मुर्दावादलगायत नारा लगाएका थिए ।

गत आर्थिक वर्षमा भएको अर्थ मन्त्रालयले गरेको अवैधानिक रकमान्तर छानबिन गरी दोषिलाई कारबाही गर्नुपर्नेसहितका माग गर्दै जनमतका कार्यकर्ताहरुले कार्यक्रम स्थलमै पुगेर नारावाजी गरेका हुन् । नारावाजीका कारण केही समय कार्यक्रमसमेत प्रभावित भएको थियो । वार्षिक प्रगति विवरण सार्वजनिक पश्चात संचारकर्मीले उठाएका प्रश्नमा जवाफ दिने बेलामा उनीहरूले नारावाजी गरेका थिए ।

कार्यक्रममा एक्कासी विरोध प्रदर्शन गरेपछि मुख्यमन्त्री यादवले आफूहरूसँग सरकारमै रहेको दल जनमतले यसरी विरोध गरेकोमा आक्रोश पाेखेका थिए । ‘सरकारमा पनि बस्ने र विरोध पनि गर्ने यो दोहरो चरित्र हो, यसको जवाफ जनमतबाट मन्त्री भएका साथीहरूले दिनुपर्छ', मुख्यमन्त्री यादवले भने । तर मञ्चमा बसिरहेका जनमतका संसदीय दलका नेता तथा शिक्षा तथा संस्कृतिमन्त्री महेश प्रसाद यादव र श्रम तथा यातायातमन्त्री चन्दन सिंहले मुख्यमन्त्रीलाई कुनै जवाफ नदिँदै कार्यक्रम सकिएको घोषणा गरिएको थियो ।

सरोज कुमार यादव नेतृत्वको सरकारले कार्यकालमा गरेको प्रगति विवरणको चर्को आलोचना भएको छ । प्रतिवेदनमा विगतमा लालबाबु नेतृत्वको सरकारले पाँच वर्ष पूरा हुदाँ सार्वजनिक गरेकाे प्रतिवेदनमा उल्लेख गरिएका विकास निर्माणका तथ्याङ्गकहरू मुख्यमन्त्री यादवले आफ्नै नेतृत्वको सरकारको गरेको भनेर समावेश गरेको आरोप लगाइएको छ ।