त्रिविमा सीएसआईटी नपढेको कार्यक्रम संयोजक, पढेको सह–संयोजक, सरोकारवालाको विरोध

त्रिविमा सीएसआईटी नपढेको कार्यक्रम संयोजक, पढेको सह–संयोजक, सरोकारवालाको विरोध

A+ A A-

त्रिभुवन विश्वविद्यालय कार्यकारी परिषद्ले सीएसआईटी कार्यक्रमको संयोजक जुनसुकै विषयमा अध्ययन गरेको भए पनि हुने प्रावधान ल्याएको भन्दै सरोकारवालाहरूले आपत्ति जनाएका छन् ।

‘यसअघि कार्यक्रम संयोजक सीएसआईटी नै पढेको हुनुपर्ने प्रावधान थियो तर कार्यकारी परिषद्ले हाल संयोजक जुनसुकै विषय पढेको भए पनि हुने निर्णय गरेको छ । सह–संयोजक सीएआईटी पढेको हुनुपर्ने भनिएको छ । यो निर्णय सही छैन, ’कम्प्युटर साइन्स अल्मुनाईका पूर्वअध्यक्ष सुशान्त पौडेलले भने । राजनीतिक आस्थाका आधारमा कार्यक्रम संयोजक बनाउन सीएआईटी नपढेकालाई संयोजक बनाउन चलखेल गरिएको उनको दाबी छ ।

‘अन्य विषयमा विद्यार्थी कम भएपछि राजनीतिक चलखेलमा यो निर्णय भएको हो । सम्बन्धित विषय नपढेको व्यक्तिलाई कार्यक्रम संयोजक बनाउने निर्णय मान्य हुँदैन,’ उनले भने । परिषद्ले सीएसआईटी कार्यक्रमलाई विशेष शैक्षिक कार्यक्रममा राख्ने निर्णय गरेको छ । यसमा सरोकारवाला निकायहरूले विरोध जनाएका छन् ।

420124003_7762841340397803_5447617118253423984_n1705405881.jpg

त्रिविको विज्ञान तथा सूचना प्रविधि केन्द्रीय विभागले पनि सीएसआईटी नियमित कार्यक्रम रहेको जानकारी डिन कार्यालयलाई गराएको छ । ‘चार वर्ष कार्यक्रम चलाएपछि नियमित हुने व्यवस्था छ । स्वतः रेगुलर हुन्छ । तर, परिषद्ले काट्ने निर्णय गरेको छ । रेगुलर कार्यक्रम नरहेमा त्रिविबाट आउने सेवा सुविधा रोकिन्छ । भौतिक सेवा सुविधादेखि बजेटसम्म काटिने हुन्छ,’ पौडेलले भने, ‘सीएसआईटीलाई रेगुलरमा नै राख्नुपर्छ ।’

त्रिविका आंगिक क्याम्पसमा सीएसआईटी स्नातक १४ वर्ष र स्नातकोत्तर २२ वर्षदेखि सञ्चालन भइरहेको छ ।

त्रिविले सम्बन्धन दिँदा १ जना सीएसआईटी पढेकै कार्यक्रम संयोजक र ४ जना पूर्णकालीन शिक्षक हुनुपर्ने प्रावधान राखिएको र सो नियम कार्यान्वयन हुनुपर्ने पनि उनले बताए । उनका अनुसार सीएसआईटी कार्यक्रममा देशभर करिब १८ हजार विद्यार्थी अध्ययनरत छन् ।