यातायातमन्त्रीलाई रास्वपाको प्रश्न- दुर्घटनाबाट हुने मानवीय क्षति सामान्य लाग्न थालेको हो ?

यातायातमन्त्रीलाई रास्वपाको प्रश्न- दुर्घटनाबाट हुने मानवीय क्षति सामान्य लाग्न थालेको हो ?

A+ A A-

राष्ट्रिय स्वतन्त्र पार्टीले सवारी दुर्घटना न्यूनीकरणका उपाय अवलम्वन गर्न सरकारको ध्यानाकर्षण गराएको छ ।

मंगलवार सिंहदरबारस्थित भौतिक पूर्वाधार तथा यातायातामन्त्री प्रकाश ज्वालालाई भेटेर राष्ट्रिय स्वतन्त्र पार्टीका सांसद तथा नेताहरूले सवारी दुर्घटना न्यूनीकरणका उपाय अवलम्बन गर्न सरकारको ध्यानाकर्षण गराएका हुन् ।

पार्टीको ज्ञापनपत्र बुझाउँदै सहमहामन्त्री सुमना श्रेष्ठले दुर्घटनाबाट हुने मानवीय क्षति सरकारलाई सामान्य लाग्न थालिसकेको हो ? भन्दै मन्त्री ज्वालासँग प्रश्न गरिन् । यस वर्षको मंसिरसम्म देशभर सानाठूला गरेर करिब १० हजार ७ सय ४५ दुर्घटना भएको प्रहरीको तथ्यांक रहेको उनले बताइन् ।

यी दुर्घटनामा ९१६ जनाले ज्यान गुमाएका र २ हजार ७९१ जना गम्भीर र ११ हजार ९१ जना सामान्य घाइते भएका प्रहरीको तथ्यांक रहेको श्रेष्ठको भनाइ छ । नेपाल प्रहरीका अनुसार दैनिक ५४ वटा दुर्घटना र त्यसमा ६ जनाको मृत्यु गरेको तथ्यांक आफूले पाएको पनि श्रेष्ठले बताइन् ।

‘नियमितजस्तो सवारी दुर्घटना भइरहन्छन् । हामीलाई कताकता दुर्घटनाबाट हुने मानवीय क्षति सामान्य लाग्न थालिसकेको पो हो कि ?,' श्रेष्ठले भनिन्, 'यो वर्षको मंसिरसम्म मात्र देशभर सानाठूला गरेर करिब १० हजार ७ सय ४५ दुर्घटना भएका छन् । जसमा ९१६ जनाले ज्यान गुमाएका छन् । २ हजार ७९१ जना गम्भीर र ११ हजार ९१ जना सामान्य घाइते भएका छन् । नेपाल प्रहरीका अनुसार दैनिक ५४ वटा दुर्घटना र त्यसमा ६ जनाको मृत्यु हुन्छ ।’

ज्ञापनपत्र ग्रहण गर्दै मन्त्री ज्वालाले सवारी दुर्घटनाको विषयलाई लिएर सरकार गम्भीर रहेको बताए । सरकारले समस्याको समाधान गर्ने गरी काम गरिरहेको उनको भनाइ छ । घटना भइसकेपछि त्यसलाई बेवास्ता गरेर सरकार जान नसक्ने ज्वालाको भनाइ छ ।

सडकलाई खाल्डाखुल्डीरहित बनाएर, सडक सुधारका कामलाई तीव्रता दिएर र सवारीसाधन परीक्षणका कामलाई अझै व्यवस्थित गर्ने तथा चालकलाई प्रशिक्षण दिने काम गरेर पनि सवारीसाधन दुर्घटनाको समस्या समाधान गर्ने पहल गरिरहेको बताए ।

‘समस्याप्रति हामी गम्भीर छौँ । राजनीतिक दल, संसद र संसदीय समितिले पनि आवश्यक सहयोग गर्नुपर्छ । घटना भइसकेपछि त्यसलाई बेवास्ता गरेर जाँदैनौँ । सडकलाई खाल्डाखुल्डीरहित बनाएर हुन्छ कि, सडक सुधारका कामलाई तीव्रता दिएर हुन्छ कि, सवारीसाधन परीक्षणका कामलाई अझै व्यवस्थित गरेर हुन्छ कि, चालकलाई प्रशिक्षण दिएर हुन्छ कि, हामी समस्याको निराकरण गर्ने कुरामा गम्भीर छौँ,’ मन्त्री ज्वालाले भने ।

प्रकाशित मिति: मंगलबार, माघ २, २०८० १५:४८