बाबुरामसँग पार्टी एकता गर्न प्रचण्ड तयार, आफ्नै नेतृत्वमा बनाए एकता संयोजन समिति

बाबुरामसँग पार्टी एकता गर्न प्रचण्ड तयार, आफ्नै नेतृत्वमा बनाए एकता संयोजन समिति

A+ A A-

नेकपा माओवादी केन्द्र डा. बाबुराम भट्टराई नेतृत्वको नेपाल समाजवादी पार्टीसँग एकता गर्न तयार भएको छ ।

लामो समयदेखि माओवादी केन्द्र र भट्टराई नेतृत्वको नेसपाबीच पार्टी एकताका लागि प्रयास हुँदै आएको छ । तर, दुई पार्टीका नेताहरूबीच छलफल भए पनि पार्टी एकताबारे कुरा भने मिल्न सकेको छैन । तर, नेसपासँग पार्टी एकता गर्न माओवादी केन्द्रले दुई दिनअघि संयोजन समिति बनाएको छ ।

शनिबार बसेको माओवादी केन्द्रको स्थायी समिति बैठकले अध्यक्ष प्रचण्डकै नेतृत्वमा एकता संयोजन समिति बनाउने निर्णय गरेको छ । प्रधानमन्त्रीसमेत रहेका अध्यक्ष प्रचण्ड नेतृत्वको संयोजन समितिले भट्टराईसँग छलफल गरेर पार्टी एकता गर्ने निर्णय भएको स्थायी समिति सदस्य कमला रोकाले शिलापत्रलाई जानकारी दिइन् । 'अध्यक्ष प्रचण्डको नेतृत्वमा संयोजन समिति बनाउने निर्णय भएको छ । अब यो समितिले वार्ता गरेर नेसपासँग पार्टी एकता गर्नेछ,’ उनले भनिन् ।

भट्टराई नेतृत्वको नेसपाका उम्मेदवारहरू गत वर्षको ४ मंसिरमा भएको प्रदेशसभा तथा प्रतिनिधिसभा निर्वाचनमा माओवादी केन्द्रको चुनाव चिह्नबाट चुनाव लडेका थिए । चुनावका समयमा नजिकिएका प्रचण्ड र बाबुरामबीच राष्ट्रपति निर्वाचनका समयमा भने सम्बन्धमा खटपट आएको थियो । त्यसपछि समाजवादी मोर्चा बनाउने क्रममा भट्टराईलाई प्रचण्डले बाहिर राखेपछि सम्बन्धमा झन् चिसोपना बढेको थियो । तर, अहिले भने प्रचण्ड बाबुरामको पार्टीलाई माओवादी केन्द्रमै विलय बनाउन आफैँ अघि सर्ने तयारीमा छन् । त्यसैले प्रचण्डले आफ्नै नेतृत्वमा एकता संयोजन समिति बनाउने निर्णय स्थायी समितिबाट गराएका हुन् ।

प्रचण्ड पहिले बाबुरामलाई पार्टीमा भित्र्याएपछि मात्रै विप्लवसँग पार्टी एकता गर्ने योजनामा छन् । पार्टी एकता आफ्नै नेतृत्वमा गर्ने गरी प्रचण्ड र बाबुरामबीच डिनरसहितको भेटघाट केही दिनअघि भएको माओवादी केन्द्र स्रोतको भनाइ छ । माओवादी केन्द्रले यसअघि विचार मिल्नेहरूसँग एकता गर्न भन्दै उपाध्यक्ष कृष्णबहादुर महराको नेतृत्वमा महासचिव देव गुरुङ, उपमहासचिवत्रय गिरिराजमणि पोखरेल, जनार्दन शर्मा र शक्ति बस्नेत सदस्य रहेको कार्यदल गठन गरेको थियो । तर, उक्त समितिले अहिलेसम्म कुनै दलसँग पनि एकताका लागि पहल गर्न सकेको छैन ।

सुन प्रकरणपछि उपाध्यक्ष महरा पार्टीभित्र कमजोर सावित हुँदै गएका छन् । महरा कमजोर भएपछि उपमहासचिवद्वय वर्षमान पुन र जनार्दन शर्मा पछिल्लो समय हाबी हुन थालेका छन् । त्यसैले वर्षमान र जनार्दन नेत्रविक्रम चन्द विप्लवभन्दा पहिले भट्टराईलाई माओवादी केन्द्रमा फर्काउनुपर्ने पक्षमा छन् ।

प्रचण्डले विप्लव नेतृत्वको नेकपासँग पनि पार्टी एकता गर्ने विषयमा कुराकानी गरिरहेका छन् । तर, विप्लवले महासचिवमा दाबी गरिरहेकाले पदीय भागवण्डा टुंगिन सकेको छैन । प्रचण्ड विप्लवलाई महासचिव दिन तयार भएका थिए । त्यही भएर प्रचण्डले समाजवादी मोर्चामा बाबुरामलाई बाहिर राखेर विप्लवलाई समेटेका थिए । तर, उपमहासचिवद्वय पुन र शर्माले विप्लव नेतृत्वको नेकपाको संगठन कमजोर भएकाले धेरै पद दिन नहुने पक्षमा वकालत गरेपछि प्रचण्ड पार्टी एकता गर्नबाट रोकिएका थिए । स्थायी समिति सदस्य रोका पनि विप्लवलाई अहिले मोर्चामै राखेर नेसपासँग पार्टी एकता हुने बताउँछिन् ।

प्रकाशित मिति: सोमबार, माघ १, २०८० १७:३०