माल्दिभ्ससँग जारी विवादबारे एस जयशंकरले के भने ?

A+ A A-

भारतीय विदेशमन्त्री एस जयशंकरले छिमेकी माल्दिभ्ससँग जारी कूटनीतिक विवादबारे टिप्पणी गरेका छन् । उनले सधैंभरि कसैले भारतको समर्थन गरिरहने कुराको जिम्मेवारी लिन नसकिने बताएका हुन् ।

मालदिभ्ससँग हालै नागपुर बैठकमा पैदा भएको तनावबारे पत्रकारहरूले सोध्दा उनले भने, ‘राजनीति त राजनीति नै हो नि ! हरेक देशमा जो कोहीले सधैंभरि हाम्रो समर्थन गर्छ वा हामीसँग सहमत हुन्छ भन्ने कुराको ग्यारेन्टी म दिन सक्दिनँ ।’

आफूहरू सबै देशसँगको सम्बन्ध बलियो बनाउन प्रयासरत रहेको उनले बताए । र, धेरै हदसम्म सफल भएको विदेशमन्त्रीको दाबी छ । उनले भने, ‘हामीले १० वर्षयता विभिन्न देशसँगको सम्बन्ध राम्रो बनाएका छौँ ।’

सम्बन्धित समाचार

चीनबाट फर्केलगत्तै भारतप्रति किन आक्रामक देखिए माल्दिभ्सका राष्ट्रपति ?

जयशंकरले राजनीतिक सम्बन्धमा उतारचढाव भए पनि मानिसहरूबीच सकारात्मक भावनालाई बढावा दिनुपर्ने पनि बताए । उनले भने, ‘कहिलेकाहीँ केही चिज सही बाटोमा जाँदैनन् । त्यो बेला तपाईंले सबैलाई ठीक ठाउँमा ल्याउनका लागि तर्क दिनुपर्ने हुन्छ ।’

माल्दिभ्सका ती नेताले भारतीय प्रधानमन्त्री नरेन्द्र मोदीविरुद्ध अपमानजनक टिप्पणी गर्दै उनको लक्षद्वीप यात्राको विरोध गरेपछि भारत र माल्दिभ्सबीच कूटनीतिक विवाद चुलिएको छ । भारतले उक्त टिप्पणीप्रति आपत्ति जनाउँदै विरोध जनाउन माल्दिभ्सका राजदूतलाई बोलाएको थियो । देशका प्रधानमन्त्रीको बारेमा गलत टिप्पणी गरेको भन्दै मोदी समर्थकहरू पनि भड्केका छन् । विवाद बढ्दै गएपछि माल्दिभ्स सरकारले मोदीबारे अपमानजनक टिप्पणी गर्ने आफ्ना तीन मन्त्रीलाई निलम्बित गरिसकेको छ ।