पाँचौँपल्ट 'शुभारम्भ' गरिँदै मेलम्चीको पानी वितरण

A+ A A-

गत साउनको बाढीले पुरिएको मुहान मर्मत गरेर मेलम्चीको पानी पुनः वितरण सुरु गरिँदैछ । प्रधानमन्त्री पुष्पकमल दाहाल ‘प्रचण्ड’ले सिंहदरबारस्थित प्रधानमन्त्री कार्यालय परिसरबाट मेलम्ची खानेपानी पथान्तरण तथा पुनः वितरणको शुभारम्भ गर्ने कार्यक्रम छ ।

प्रधानमन्त्री पुष्पकमल दाहाल ‘प्रचण्ड’ले सिंहदरबारस्थित प्रधानमन्त्री कार्यालय परिसरबाट मेलम्ची खानेपानी पथान्तरण तथा पुनः वितरणको शुभारम्भ गर्ने

काठमाडौं उपत्यकामा मेलम्ची खानेपानीको वितरण सुरुवात गरिएको यो पाँचौँपल्ट हो ।

अनामनगर, मीनभवन, महाँकालचौर, रिगनी, भक्तपुर, खुमलटार, बालाजु र बाँसबारी क्षेत्रमा क्रमिकरूपमा पानी वितरण गरिने खानेपानी मन्त्रालयका सचिव सुरेश आचार्यले जानकारी दिए । सिन्धुपाल्चोकको अम्बाथानबाट बुधबारदेखि सुरुङमा छाडिएको पानी सुन्दरीजल आइपुगेको तथा खानेपानीको परिमाण मापन गरी क्रमिकरूपमा काठमाडौंका सबै क्षेत्रमा वितरण गरिने उनले बताए ।

प्रधानमन्त्री दाहालले मेलम्चीको पानी राजधानी ल्याउने व्यवस्था मिलाउन खानेपानीमन्त्री महिन्द्र राय यादवलाई निर्देशन दिएका थिए । प्रधानमन्त्रीको निर्देशनपछि खानेपानी मन्त्रालयले मेलम्ची खानेपानी आयोजना मर्मत गरी पानी ल्याउन पहल गरेको हो ।

बाढी तथा पहिरोका कारण अवरुद्ध भएको मेलम्चीको पानी पुनः काठमाडौं ल्याइएको हो । गत पुस ३ गते मेलम्ची खानेपानी विकास समिति र निर्माण व्यवसायी सिनो हाइड्रोबीच २८ दिनमा मेलम्चीको पानी काठमाडौं ल्याउने सहमति भएको थियो ।

कुल २८ दिनको कार्ययोजनासहित पानी पथान्तरण सुरु गरिए पनि २१ दिनमै हेलम्बुबाट सुन्दरीजलमा पानी पथान्तरण गरिएको थियो । मेलम्चीबाट दैनिक १७ करोड लिटर पानी काठमाडौं ल्याइँदै छ ।

१ असार २०७८ मा मेलम्ची खोलामा आएको बाढी पहिरोले आयोजनाको मुहान क्षतिग्रस्त बनेपछि मेलम्चीको पानी काठमाडौंमा नियमित वितरण रोकिएको थियो ।

फेरि शुभारम्भ गरिए पनि कहिलेसम्मका लागि हो भन्ने टुंगो नभएकाले मेलम्ची भरपर्दो विकल्पका रूपमा नदेखिएको सरोकारवालाले बताउँदै आएका छन् । हुन पनि, यो आयोजना अहिलेसम्म ४ पल्ट शुभारम्भ भइसकेको छ । फागुन २०७७ मा पहिलोपल्ट तत्कालीन प्रधानमन्त्री केपी ओली, चैत २०७७ मा राष्ट्रपति विद्या भण्डारी, वैशाख २०७९ मा खानेपानीमन्त्री उमाकान्त चौधरी र मंसिर २०७९ मा उनै चौधरीले शुभारम्भ गरेका थिए । आज पाँचौपल्ट प्रधानमन्त्री दाहालले शुभारम्भ गर्न लागेका हुन् ।

प्रकाशित मिति: सोमबार, माघ १, २०८० ०८:०६