ठप्प बीपी प्रतिष्ठान: १६ वर्षदेखि बढुवा रोकिँदा आन्दोलित कर्मचारी

A+ A A-

आपतकालीन सेवाबाहेक बीपी कोइराला स्वास्थ्य विज्ञान प्रतिष्ठान धरानमा ओपीडी सेवा आइतबार ठप्प छ । आइतबारदेखि इमर्जेन्सी, आईसीयू र अन्तरङ्ग (वार्ड) सेवाबाहेक प्रतिष्ठानका सबै सेवाहरू स्थगित छन् । नियमित अस्पतालको सेवा कहिले खुल्ने हो यसै भन्न सक्ने स्थिति छैन । लामो समयदेखि बढुवा रोकिएको भन्दै अस्पतालमा कार्यरत सम्पूर्ण चिकित्सक तथा कर्मचारीहरूले बीपी प्रतिष्ठानको सम्पूर्ण सेवा ठप्प गरेका हुन् ।

यो चिकित्सक कर्मचारीहरूको बढुवासँग सम्बन्धित पहिलो आन्दोलन भने हैन । वार्षिक कार्यतालिकाअनुसार हुनुपर्ने बढुवा नभएको लामो समय भएपछि पटक-पटक चिकित्सक कर्मचारीहरू आन्दोलित हुँदै आएका छन् । गत कात्तिकमा आन्दोलन गरेपछि व्यवस्थापन पक्षले आन्दोलनरत पक्षसँग चार बुँदे सहमति गरेको थियो । सहमतिअनुसार प्रक्रिया पूरा गरेर पुस २ देखि १५ सम्म अन्तर्वार्ता सुचारु गर्नुपर्ने सहमति भएको थियो । तर, पुस बितिसक्दा समेत बढुवाको प्रक्रिया सुरु नभएपछि चिकित्सक तथा कर्मचारीहरू पुनः आन्दोलित भएका हुन् ।

आन्दोलनको कारण आइतबार बिहान ओपीडी बिल काउन्टर खुलेनन् । आन्दोलनको कारण नयाँ बिरामी भर्ना नगर्ने र वार्डमा भर्ना भएका बिरामीहरूको मात्र उपचार सेवा जारी हुने कर्मचारीहरूले जनाएका छन् । यस्तै, शिक्षकहरूले पनि सेवा बहिष्कार गरेपछि पठनपाठन र परीक्षाका कार्यक्रमहरू पनि प्रभावित हुन पुगेको छ ।

प्रतिष्ठानमा कार्यरत कर्मचारीहरूको सङ्गठन कर्मचारी कल्याण समाजकी कविता ढकाल पटक-पटक व्यवस्थापन पक्षले सहमति तोडेकाले आन्दोलनमा होमिनुपरेको बताउँछिन् । 'धेरैपटक हामीले आन्दोलन गर्‍यौँ तर, सहमति कार्यान्वयन नभएपछि फेरि आन्दोलन गर्नुपर्‍यो,' ढकालले भनिन् । वार्षिक कार्यतालिकाअनुसार हुनुपर्ने बढुवाको प्रक्रिया कर्मचारीको हकमा १६ वर्ष र चिकित्सकको हकमा ९ वर्ष देखि रोकिएको छ ।

शिक्षक कल्याण समाज र कर्मचारी कल्याण समाजले बिहीबार संयुक्त विज्ञप्ति जारी गर्दै शनिबारसम्म पनि माग सम्बोधन नभए अबरुद्ध गर्ने चेतावनी दिएका थिए । तर, कायममुकायम उपकुलपति प्रह्लाद कार्कीले बढुवामा चासो नदिएको भन्दै शिक्षक कल्याण समाजका अध्यक्ष डा. सेराज अहमद खान र कर्मचारी कल्याण समाजकी अध्यक्ष कविता ढकालले विज्ञप्ति जारी गर्दै अस्पतालको काम रोक्न बाध्य भएको बताएका छन् ।

बर्षौंदेखि एकै पदमा काम गर्दा वृत्तिविकाशसँगै कर्मचारी र चिकित्सकहरू पेसाप्रति असन्तुष्ट हुँदै गएको समाजको ठम्याइ छ । 'पैसाकै हिसाब गर्ने हो भने यहाँभन्दा राम्रो निजी अस्पतालहरूमा कमाइ हुन्छ । प्रतिष्ठानमा काम गर्दा बढुवासँगै इज्जत हुन्छ भन्ने हो,' आन्दोलनरत एक वरिष्ठ चिकित्सक भन्छन्, 'बाहिरबाट हेर्दा आन्दोलन गरेर बढुवा मागेको जस्तो देखिएको पनि होला । तर, हाम्रो माग त प्रक्रियाअनुसार बढुवा गर्नुपर्‍यो भन्ने हो नि ।'

कार्यरत प्रतिष्ठानका कर्मचारीहरूले बढुवाको माग राख्दै गर्दा कायममुकायम उपकुलपति प्रह्लाद कार्कीले भने लोकसेवालगायत अन्य निकायले बढुवा प्रक्रिया अघि बढाउन कुनै निर्देशन नदिएकाले आफूले प्रक्रिया थाल्न नसकेको बताएका छन् । कार्कीले सार्वजनिक अपिल जारी गर्दै विगतमा गरिएको बढुवा प्रक्रियाको विज्ञापनलाई वैधानिकता दिएर अघि बढ्ने असल नियतका साथ लोकसेवा आयोग, सहकुलपति र सम्बन्धित निकायमा पटक-पटक पहल गरिएको पनि उल्लेख गरेका छन् ।

‘यसका बाबजुद कुनै पनि निकायबाट प्रक्रिया अघि बढाउन आधिकारिक रूपमा लिखित निर्देशन नआएको कुरा प्रस्ट्याउन चाहन्छु,’ कार्कीको अपिलमा भनिएको छ, ‘राज्यको कानुनबाहिर जाने अधिकार जो कोहीलाई नहुने कुरामा दुई मत नरहनेमा स्पष्ट छु ।'

यता, चिकित्सक कर्मचारीहरूले भने बढुवाको मागसँगै प्रतिष्ठानमा कामु उपकुलपतिको नियुक्ति गैरकानुनी भन्दै बर्खास्त गर्न समेत माग गरेका छन् । समाजले कुलपति एवं प्रधानमन्त्री, सहकुलपति एवं स्वास्थ्यलगायत निकायहरूमा कायममुकायम उपकुलपति प्रा. डा. प्रह्लाद कार्कीलाई बर्खास्त गर्न माग गर्दै पत्राचार समेत गर्ने जनाएका छन् ।

उनीहरूले बिहानदेखि नै उपकुलपति कार्यालयअघि धर्नामा बसेका छन् । शिक्षक कर्मचारीहरूले आज बिहानसम्म कायममुकायम उपकुलपति प्रा. डा. प्रह्लाद कार्कीलाई कार्यकारिणी बैठक बसाएर अन्तर्वार्ताको मितिबारे निर्णय गर्न समय दिएका थिए । तर, उपकुलपति कार्कीले कार्यकारिणी बैठक बोलाएर आफैँ बिदामा बसेपछि आक्रोशित आन्दोलनकारीहरूले कार्कीलाई प्रतिष्ठानमा निषेध गर्ने घोषणा समेत गरेका छन् ।

प्रकाशित मिति: आइतबार, पुस २९, २०८० २०:५३