'फ्युचर एजुकेसन अफ साइन्स एन्ड टेक्नोलोजी'को नयाँ एप बजारमा

A+ A A-

नेपालको शैक्षिक क्षेत्रमा थुप्रै प्रविधिमैत्री एपहरू आइरहेको सन्दर्भमा पछिल्लोपटक अर्को एक नयाँ एप थपिएको छ । 'फ्युचर एजुकेसन अफ साइन्स एन्ड टेक्नोलोजी' कम्पनीले 'फेस्ट ईआरपी केन्द्रीकृत शिक्षा व्यवस्थापन प्रणाली' नामको एप निर्माण गरेर बजारमा ल्याएको हो ।

कम्पनीका अध्यक्ष धिरेन्द्र चन्द सोडारीका अनुसार, प्रविधिमैत्री र समयसापेक्ष शिक्षामा जोड दिँदै नवीन सोचका साथ यो एप निर्माण गरिएको छ । उनले भने, 'विज्ञान र प्रविधि क्षेत्रमा रोजगारी सिर्जना गर्न नेपालमै अध्ययन गरेर, नेपालमै बसेर पनि अन्तर्राष्ट्रियस्तरको सफ्टवेयर सिस्टम बनाउन सकिन्छ भनेर कलेज पढ्दापढ्दै हामीले २०७४ सालमा तीन जना साथीहरू मिलेर आईटी कम्पनी सञ्चालनमा ल्याएका हौँ ।'

धिरेन्द्र चन्द सोडारी, इन्जिनियर विक्की महत र पावनप्रसाद भट्टले मिलेर शिक्षा क्षेत्रमा प्रविधिमैत्री क्रान्ति गर्ने सोचका साथ यो एप ल्याएका हुन् ।

६ वर्षको अवधिमा सोडारीको टिमले शैक्षिक व्यवस्थापन प्रणाली कसरी निर्माण गर्न सकिन्छ भनेर विभिन्न विद्यालयमा अवलोकन गरेर, आफैँ अध्ययन गरेर, अनुसन्धान गरेर र शिक्षा क्षेत्रमा काम गर्ने शिक्षाविद्हरूलगायतसँग सुझाव सल्लाह लिएर एप निर्माण गरिएको सोडारीको दाबी छ ।

सोडारीका अनुसार, स्कुल, कलेज, क्याम्पस र विश्वविद्यालयहरूका लागि अति उपयोगी क्लाउड पद्धतिमा आधारित नेपालमा तयार गरिएको अन्तर्राष्ट्रियस्तरको शैक्षिक प्रवर्द्धन सूचना भरपर्दो तथा गुणस्तरीय वेब ऐप्लिकेसन हो । बौद्धिक प्रतिस्पर्धाको युगमा शिक्षाको विकासका निम्ति जोड्न यो सिस्टम विकास गरिएको हो । यो प्रविधिले सिङ्गो राज्यका सबै शिक्षण प्रतिष्ठानहरू एउटै मञ्चमा ल्याएर अनुगमन, नियमन र नियन्त्रण गर्न सकिन्छ ।

'यो शैक्षिक प्रणाली निकै लाभदायक छ । यसको प्रयोग गरेर एकैपटकमा शैक्षिक संघ–संस्थाका गतिविधिहरू हेर्न सकिन्छ । स्थानीय, प्रदेश र केन्द्र सरकारले यो प्रणालीको प्रयोग गरेर आफ्नामातहतका शैक्षिक संघ–संस्थाहरूको दैनिक, साप्ताहिक, मासिक वा वार्षिक गतिविधि आफू बसेकै ठाउँबाट हेर्न सकिन्छ,’ सोडारीले भने ।

शैक्षिक क्षेत्रमा रहेका यावत् समस्याहरूको समाधान डिजिटल माध्यमबाट गर्न सकियोस् भनेर यो प्रविधिको निर्माण गरिएको र यसको महत्त्व बुझ्न सके शैक्षिक संस्थाहरूले विभिन्न लाभ लिन सक्ने उनको दाबी छ ।

उनले भने, 'हामीले निर्माण गरेको प्रविधिको प्रयोग गरेर एकै ठाउँबाट थुप्रै सेवा लिन सकिन्छ । विद्यार्थीको भर्ना रेकर्ड, नतिजा प्रकाशन तथा व्यवस्थापन, शुल्क व्यवस्थापन, पुस्तकालय व्यवस्थापन, भुक्तानी गर्नुका साथै बक्यौताबारे जानकारी, मोबाइल एसएमएसका माध्यमबाट विभिन्न सूचनाको जानकारी प्रदान, सर्टिफिकेट/आईकार्ड निर्माण गर्न सकिने, शिक्षक, विद्यार्थी र कर्मचारीको अटोमेसनद्वारा हाजिर व्यवस्थापन, लर्निङ म्यानेजमेन्ट सिस्टम, मल्टी ब्रान्च सिस्टम, रिसेप्सन म्यानेजमेन्ट सिस्टम, बिदा व्यवस्थापन प्रणाली, अनलाइन शुल्क व्यवस्थापन प्रणाली, कर्मचारीको तालिम व्यवस्थापन, ई–लाइब्रेरी म्यानेजमेन्ट, कर्मचारी तलब भुक्तानी, लेखा व्यवस्थापन प्रणाली, होस्टेल म्यानेजमेन्ट, क्यान्टिन म्यानेजमेन्ट, भेहिकल ट्रयाकिङ सिस्टम, इन्भेन्ट्री म्यानेजमेन्ट सिस्टम अन्य विविध विवरणलगायत सेवा एकै ठाउँबाट लिन सकिन्छ ।’

'आफ्नो बच्चाले समयमा गृहकार्य गरेको छ कि छैन । स्कुलमा पुग्यो कि पुगेन । कतै जाममा परेको त छैन । केही समस्यामा फसेको त छैन । शिक्षकले होमर्क दिएको छन् वा छैनन् । विद्यालयमा शिक्षा सिकाइ कस्तो छ । शुल्क बुझाउने समय र बुझाउनुपर्ने रकम कति छ ? यी विविध विषयमा अभिभावकले एपको प्रयोग गरेर घरबाटै हेर्न सक्नुहुनेछ । र, शुल्क पनि घरबाटै बुझाउन सकिनेछ । विद्यालयले पनि प्रत्येक अभिभावकलाई भेटेर बुझाइराख्नु पर्दैन । यसले सबैको समय व्यवस्थापन हुन्छ,’ सोडारीले भने ।

सोडारीका अनुसार, फेस्ट ईआरपी केन्द्रीकृत शिक्षा व्यवस्थापन प्रणाली संघ, प्रदेश र स्थानीय सरकार मातहतमा रहेको शिक्षा विभागले आफ्नो मातहतमा भएका सम्पूर्ण शैक्षिक संस्थामा हुने गतिविधिहरूलाई यस प्रविधिका माध्यमबाट अनुगमन, नियन्त्रण र मार्ग निर्देशन प्रदान गर्न सक्नेछन् । यसैका माध्यमबाट गुणस्तरीय शिक्षा प्रदानका तालिम पनि प्रदान गर्न सकिनेछ ।

प्रकाशित मिति: आइतबार, पुस २९, २०८० १८:३१