को हुन् भ्वाइस अफ नेपाल सिजन-५ का विजेता विनोद ?

A+ A A-

२०४९ सालमा इलामको लुम्दामा जन्मिएका विनोद राईको बाल्यकालदेखि नै गायक बन्ने सपना थियो । समय ५० को दशक पुग्दा पनि लुम्दा यति विकट थियो कि त्यसबेला गाडी पनि हुन्छ भन्ने विनोदको कल्पनामा पनि थिएन । नुन, तेल ल्याउँन होस् वा गाउँमा उत्पादन भएका वस्तु बिक्री गर्न होस्, घण्टौँ हिँडेर बजारसम्म पुग्नुपर्ने लुम्देलीको बाध्यता थियो ।

गाउँमा दसैँतिहारको माहौल निकै रमाइलो हुन्थ्यो । नाचगानमा उनको विछट्टै रुचि थियो । रेडियोमा सुनेका गीतहरू मौका पाउनासाथ उनी गाउँथे । ‘सानैदेखि संगीतप्रति यति क्रेजी थिएँ कि गाउन थालेपछि खाना खानसमेत बिर्सिन्थेँ,’ उनी सम्झिन्छन् ।

राजेशपायल राई, रामकृष्ण ढकाल, यम बराल, रोशन गुरुङ, कुवेर राई लगायतका रेडियोमा बज्ने गीत सुन्न पाउँदा उनी खाना खान पनि बिर्सिन्थे रे । २०६४ सालमा एसएलसी सकेर उनी मोरङको पथरी शनिश्चरेमा काकासँग बसेर प्लस टु पढ्न थाले । सँगै संगीत कक्षा पनि भर्ना भए । क्याम्पसमा हुने सांगीतिक कार्यक्रमहरूमा अक्सर गीत गाउन स्टेज चढ्थे विनोद ।

त्यो बेलासम्म आफ्ना लागि गीतसंगीत नै सबैथोक हो भन्ने लाग्थ्यो उनलाई । तर, प्लस टुपछि जीविकोपार्जनको बाटो पनि खोज्नुपर्ने महसुस गरेको उनी बताउँछन् । भन्छन् ‘आफ्नो स्थिति बलियो भने मात्रै कला वा प्रतिभालाई प्रवर्द्धन गर्न सकिने रहेछ भन्ने लाग्यो र म अवसरको खोजीमा काठमाडौं आएँ ।’

तर, काठमाडौं पनि उस्तो सजिलो कहाँ थियो र आफ्ना लागि उपयुक्त काम नपाएपछि उनी फेरि पथरी नै फर्किए र एक निजी विद्यालयमा संगीत पढाउन थाले । आफ्नो सपनालाई टेवा मिल्ने खालकै काम रोजे उनले । विद्यालयमा संगीत पढाउँदै थिए । त्यति नै बेला नेपाली तारा सिजन तीनको अडिसन खुल्यो । उनले पनि अडिसन दिए । अडिसन पार गर्दै उनी नेपाली ताराको टप सातसम्म पुग्न सफल भए ।

नेपाली ताराको टप सातसम्म पुगेर बाहिरिएका विनोदले सन् २०१६ मा आफ्नो पहिलो एल्वम ‘पारा’ सार्वजनिक गरे । तर एल्बम चलेन । विनोद निराश बने । स्वदेशमा बसेर र संगीतमा मात्र लागेर जीविकोपार्जन गरेर बाच्न गाह्राे रहेछ भन्ने उनलाई लाग्यो । त्यसपछि उनी सन् २०१८ मा अमेरिका हानिए । अमेरिका पुगेका विनोदलाई त्यहाँको भूगोल, रहनसहन, समाज न त मान्छे नै केहीसँग अपनत्वकाे महसुस नै गर्न सकेनन् ।

उनलाई हरेक क्षण आफ्नो गाउँठाउँ र देशको यादसँगै आफूले स्वदेशमा बिताएको सांगीतिक गतिविधिले पछ्याइरह्यो ।
अन्ततः स्वदेशमै फर्किएर सांगीतिक क्षेत्रमा केही गर्ने हुटहुटी बोकेर सन २०२३ मा अमेरिका छाेडेर पुनः नेपाल नै फर्किए ।

नेपाल फर्किनु र ‘द भ्वाइस अफ नेपाल सिजन पाँच’को अडिसन खुल्नु एक साथ जस्तो भयो । परिवार तथा साथीभाइ सबैले भ्वाइसमा सहभागी हुन उनलाई सुझाव दिए । विनोदलाई पनि सुझाव राम्रै लाग्यो । डिजिटल अडिसन हुँदै भ्वाइस सिजन पाचँको फाइनलिस्ट बनेका विनोदलाई शिलापत्रले भ्वाइस सिजन विजेता बन्नु हेला भनेर सोध्दा उनले भनेका थिए, ‘मलाई योग्य देखेर दर्शकले भोट दिएको खण्डमा पक्कै पनि भ्वाइस अफ नेपाल सिजन पाँचको विजेता बन्ने छुँ ।’

नभन्दै विनोद भ्वाइस अफ नेपाल सिजन ५ को उपाधि जित्न सफल बनेका छन् । ललितपुरको गोदावरीस्थित सनराइज हलमा शुक्रबार राति आयोजित ग्राण्ड फिनालेमा मकरबहादुर योन्जन, कुमार प्रयास राई र नोगेन लिम्बूलाई पछि पार्दै विनोदले उपाधि जितेका हुन् । मकरबहादुर योन्जन, कुमार प्रयास र नोगेन क्रमश: फस्ट, सेकेण्ड र थर्ड रनरअप बनेका छन् ।

याे पनि :

संगीतयात्रामा विनोदको 'रिस्टार्ट' (भिडियाेसहित)

प्रकाशित मिति: शनिबार, पुस २८, २०८० १२:३३