संगीतयात्रामा विनोदको 'रिस्टार्ट' (भिडियाेसहित)

A+ A A-

बजारमा यतिबेला हिन्दी सिनेमा 'ट्वेल्थ फेल'को चर्चा छ । फिल्ममा एक पात्रको बारम्बारको असफलता, शून्यबाट पुनः प्रयास 'रिस्टार्ट' र सफलताको कथा देखाइएको छ ।

इलाम लुम्दा गाउँका विनोद राईको संगीतयात्रा नियाल्दै जाने हो भने झण्डै यस्तैखाले कथा बन्छ । गायक बन्ने उनको सपना थियो । प्रतिभा भएर पनि उनी विविध कारण बारम्बार असफल बने । तर, प्रयास गर्न छाडेनन् ।

उनी गायन रियालिटी शो नेपाली ताराको सिजन- ३ मा उत्कृष्ट सातसम्म त पुगे तर त्यहाँबाट माथि जान सकेनन्, बाहिरिए । त्यसपछि उनले गीति एल्बम ल्याए तर चलेन । संगीतमै सक्रिय रहेर स्वदेशमै केही गर्न प्रयास गरे तैपनि हातमा केही परेन ।

बारम्बारको असफलतापछि उनी अमेरिकातिर हानिए । संगीतप्रतिको लगाव र रुचिका कारण त्यहाँसमेत अडिन नसकेर केही महिनाअघि नेपाल फर्केका विनोद अब संगीतमै सक्रिय रहने बताउँछन् । अहिले उनी गायन रियालिटी शो ‘द भ्वाइस अफ नेपाल सिजन ५’ को ‘फाइनलिस्ट’ हुन् । दर्शक, स्रोताको भोटले नै उनको भाग्य निर्धारण गर्नेछ । उनीसँगै सोलुखुम्बुका कुमार प्रयास पनि फाइनल चरणमा प्रवेश गरिसकेका छन् ।

‘असफलता बारम्बार खेपेको छु तर हार मानिनँ, मानेको भए म यहाँ हुने नै थिइनँ’, उनले भने ।

घाँसदाउरा, मेलापातमा राजेशपायल राई, रामकृष्ण ढकाल, यम बराल, रोशन गुरुङ, कुवेर राईलगायतका गीत रेडियोमा सुन्दै हुर्केका विनोदले कुशल गायक बन्ने सपना देखेका छन् ।

उनको गाउँ लुम्दा असाध्यै विकट थियो । सानोमा उनले गाडी देख्नु त परकै कुरा, यो हुन्छ भन्ने पनि थाहा थिएन रे उनलाई । नुनतेल किन्न, गाउँमा उत्पादित वस्तु बेच्न घण्टौँ हिँडेर बजार धाउनुपर्थ्यो ।

गाउँमा दसैँतिहारको माहौल पनि निकै रमाइलो हुन्थ्यो । नाचगानमा उनको विछट्टै रुचि थियो । रेडियोमा सुनेका गीतहरू मौका पाउनासाथ उनी गाउँथे । ‘सानैदेखि संगीतप्रति यति क्रेजी थिएँ कि गाउन थालेपछि खाना खानसमेत बिर्सिन्थेँ,’ उनी सम्झिन्छन् ।

२०६४ सालमा एसएलसी सकेर उनी मोरङको पथरी शनिश्चरेमा काकासँग बसेर प्लस टु पढ्न थाले । सँगै संगीत कक्षा पनि भर्ना भए । क्याम्पसमा हुने सांगीतिक कार्यक्रमहरूमा अक्सर गीत गाउन स्टेज चढ्थे विनोद ।

त्यो बेलासम्म आफ्ना लागि गीतसंगीत नै सबैथोक हो भन्ने लाग्थ्यो उनलाई । तर, प्लस टुपछि जीविकोपार्जनको बाटो पनि खोज्नुपर्ने महसुस गरेको उनी बताउँछन् । भन्छन्, ‘आफ्नो स्थिति बलियो भने मात्रै कला वा प्रतिभालाई प्रवर्द्धन गर्न सकिने रहेछ भन्ने लाग्यो र म अवसरको खोजीमा काठमाडौं आएँ ।’

तर, काठमाडौं पनि उस्तो सजिलो कहाँ थियो र ! आफ्ना लागि उपयुक्त काम नपाएपछि उनी फेरि पथरी नै फर्किए र एक निजी विद्यालयमा संगीत पढाउन थाले । आफ्नो सपनालाई टेवा मिल्ने खालकै काम रोजे उनले ।

त्यसताका गायन रियालिटी शो ‘नेपाली तारा’ खुब चर्चित थियो । यसको उपाधि जितेपछि चर्चासँगै थुप्रै गीत गाउन पाउँथे विजेताले ।

स्कुलमा संगीत पढाइरहेकै बेला नेपाली ताराको अडिसन खुलेपछि उनले भाग लिए । र, एकपछि अर्को चरण पार गर्दै उनी ‘टप सेभेन’ सम्म उक्लिन सफल भए ।

अब उनलाई पहिलाभन्दा धेरै दर्शक, स्रोताले चिन्न थाले । र, उत्साहित प्रतिक्रियाहरू पनि दिए । यस्तै तारिफले उक्सिएर विनोदले सात वर्षअघि ‘पारा’ नामक गीति एल्बम सार्वजनिक गरे । तर, यसले अपेक्षाकृत सफलता पाएन । उनी निराश मात्रै बनेनन्, देश नै छोड्ने विकल्प खोज्न थाले ।

यस्तै क्रममा सन् २०१६ मा उनको अमेरिकी भिसा लाग्यो र उनी उतैतिर लागे । ‘अमेरिकामा म साढे पाँच वर्ष बसेँ तर मेरो मन यतै थियो । संगीतमै केही गर्नुपर्छ भन्ने हुटहुटी मरेको थिएन र छैन । त्यसैले नेपाल फर्केको हुँ,’ उनले भने ।

नेपाल फर्किनु र भ्वाइसको अडिसन खुल्नु संयोग भएको विनोद बताउँछन् । आफ्नो सांगीतिक करिअरमा भ्वाइसको मञ्च विश्वविद्यालयजस्तै बनेको उनी बताउँछन् ।

‘गायकले स्टेजमा गाउँदा गीत मात्र होइन, अरु थुप्रै कुराको ख्याल गर्नुपर्ने हुन्छ । मञ्चमा गाउँदा माइक कसरी समात्नेदेखि त्यहाँ रहेका क्यामेरा, लाइट र दर्शकसम्मको ख्याल गर्नुपर्छ । यस्ता प्रविधिक विषय सिक्न यहाँसम्मको यात्रा पाठशाला नै बन्यो भन्दा फरक पर्दैन,’ उनले भने ।

अब नेपालमै बसेर नेपाली गीत/संगीतमा काम गर्ने योजना रहेको उनले सुनाए । भन्छन्, ‘सबैको प्यारो गायक बन्नु छ, यसका लागि कोसिस गरिरहनेछु ।’

प्रकाशित मिति: शनिबार, पुस २१, २०८० ०७:०५