सरकारको 'अपजस' नबोक्ने भन्दै कांग्रेसका मन्त्रीहरूको गुटबन्दी !

A+ A A-

प्रधानमन्त्रीको तेस्रो कार्यकालको दोस्रो वर्ष काम गर्न नसके छुट छैन भन्दै प्रधानमन्त्री पुष्पकमल दाहाल प्रचण्डले कार्यशैली फेर्ने प्रयास गर्दै छन् । यसको सुरुवातमा उनले कार्यालयका कर्मचारी कटौती र सचिवालय गोडमेलबाट गरेका छन् ।

‘सुशासन र सामाजिक न्यायका विषयमा हामीले सफलतापूर्वक नै काम गरेका छौँ । अब विकास निर्माण र जनताको सेवाको सवालमा फरक ढंगले अगाडि बढ्ने नै हो । अब मन्त्रीहरूलाई निश्चित टार्गेट दिइन्छ । त्यो लक्ष्य पूरा भएन भने कडा रूपले नै जाने मेरो तयारी छ,’ पुस पहिलो साता विराटनगर पुगेर प्रधानमन्त्री प्रचण्डले भनेका थिए । उनले परिणाम नदिए १० पुसपछि मन्त्री फेरेर भए पनि परिणाम देखाउने गरी काम गर्ने बताएका थिए ।

मन्त्री फेर्न प्रचण्डले भनेजस्तो सजिलो छैन । सत्ता सहयात्री दल नेपाली कांग्रेसका सभापति शेरबहादुर देउवा मन्त्री फेर्न तयार छैनन् । सरकारमा नौ मन्त्री भएको कांग्रेसमा मन्त्री फेर्ने कुरा राष्ट्रियसभा चुनावपछि सरेको छ । कांग्रेसका मन्त्रीहरूले मन्त्रिपरिषद्को बैठकअघि छुट्टै बैठक राख्ने गरेका छन् । कतिपय अवस्थामा उनीहरू गृह र परराष्ट्र मन्त्रालयमा बैठक बस्ने गरेका छन् ।

कांग्रेसका मन्त्रीलाई अपजसको चिन्ता

उनीहरूमा अपजसको भारी आफूहरूले पनि बोक्नुपर्ने भयो भन्ने चिन्ता छ । ‘सरकारको समीक्षासँगै मन्त्रीहरूको समीक्षा गर्दा हामी पनि पर्छौं । अपजसको भारी हामीले पनि बोक्नुपर्छ । त्यसमा कसरी जाने भनेर छलफल गर्‍यौँ । चनाखो भएर बस्ने छलफल भयो,’ २४ पुसको बैठकपछि एक मन्त्रीले शिलापत्रसँग भने ।

सरकारले डेलिभरी दिन नसकेको भनेर प्रधानमन्त्रीले स्वीकार गरिसके । त्यसको अपजस मन्त्रीहरूको भागमा पनि पर्छ । कतिपय मन्त्रीहरू काम गर्ने प्रयत्न गर्दा पनि नजिता आउन विभिन्न कारणले नदिएको भन्दै पार्टीमा ब्रिफिङ गरेका छन् ।

‘हाम्रो बैठक होइन । भेटघाट प्राय: भइरहन्छ । उपप्रधान तथा रक्षामन्त्रीले कहिलेकाहीँ चिया खाऊँ भनेर बोलाउनुहुन्छ । त्यसलाई समीक्षा भनेर बुझ्न भएन,’ कानुनमन्त्री धनराज गुरुङले शिलापत्रसँग भने । मन्त्री गुरुङको जस्तै जवाफ महिला तथा बालबालिकामन्त्री सुरेन्द्रराज आचार्यको छ । ‘मन्त्री मात्र नभएर एकै पार्टीका साथीहरू पनि हौँ । बेलाबेलामा चिया खान भेट गर्छौं,’ उनले भने, ‘समसामयिक विषयमा कुरा हुन्छ ।’

सरकारले सुरुबाटै नक्कली भुटानी शरणार्थी, बालुवाटार जग्गा प्रकरण, सुन तस्करीदेखि, मिटरब्याजीपीडितविरुद्ध आक्रामक अभियान नै चलाएको र त्यसमा कसैलाई काखा कसैलाई पाखा गरिएको बुझाइ कांग्रेस नेताहरूको छ । सुशासनको नाममा हल्ला गरेर काम नगरेको, नेपालमा केही हुन्न भन्ने भाष्य बनिरहँदा काम देखाउन नसकेको, सामान्य रूपमा जनताले दैनिक गुजारा चलाउन नसक्दा जनतामैत्री नीति ल्याउन नसकेको, वित्तीय अराजकता बढ्दा सम्हाल्न नसकेको लगायतका विषयमा कांग्रेसका मन्त्रीहरूले कसरी अघि बढ्ने भन्ने विषयमा छलफल गर्छन् ।

यसअघि ५ भदौमा बसेको कांग्रेसका मन्त्रीहरूको बैठकले विभिन्न विषयमा कांग्रेसका मन्त्रीहरूको समान धारणा बनाउने निष्कर्ष निकालिएको थियो । कांग्रेसका मन्त्रीहरूमा पनि रक्षामन्त्री पूर्णबहादुर खड्का र अर्थमन्त्री डा प्रकाशशरण महतको मिल्ती अन्य मन्त्रीको तुलनामा कम रहेको नेताहरू बताउँछन् । तर, मन्त्री महतको सचिवालयले भने नियमित काम भइरहेको र भेटघाट पनि भइरहेको बताउँछ ।

कांग्रेस मन्त्रीहरूसँग प्रधानमन्त्री रुष्ट

प्रधानमन्त्री कांग्रेसका मन्त्रीहरूसँग रुष्ट रहेको कुरा प्रधानमन्त्री प्रचण्डले २७ मंसिरमा शिलान्यास गरेको ‘महिला उद्यमी हरित औद्योगिक ग्राम’ सँग पनि जोडिन्छ । सो ग्राम उद्घाटन हुन नपाई विवादमा परेको छ । महिला उद्यमीहरूको छाता संगठन महिला उद्यमी महासंघले प्रधानमन्त्री प्रचण्डलाई ध्यानाकर्षणपत्र बुझाएर विरोध जनाएको छ ।

२०७६ सालको सम्झौताविपरीत महासंघलाई जानकारीसमेत नदिई महिला औद्योगिक ग्रामको शिलान्यास भएको महासंघको दाबी छ । औद्योगिक ग्रामको उद्घाटनमा प्रधानमन्त्रीसँगै अर्थमन्त्री महत र उद्योगमन्त्री रमेश रिजाल पनि थिए । ग्रामका बारेमा ध्यानाकर्षण बुझाउन जाने टोलीलाई प्रधानमन्त्री प्रचण्डले भनेका थिए, ‘कांग्रेसका मन्त्रीहरूले भोटका लागि राजनीति गरेर मलाई गुमराहमा पारे ।’

त्यति मात्र होइन, उनले कांग्रेसका पदाधिकारीहरूसँग पनि मन्त्रीहरूको कार्यसम्पादन गतिलो नभएको भनेर गुनासो गर्छन् । ‘हाम्रो पार्टीबाट पनि उस्तै छ । धेरै मन्त्रालय पाएको कांग्रेसका मन्त्रीहरू पनि उस्तै छन् । योपटक कांग्रेसले कस्ता मन्त्री पठाएछ,’ प्रधानमन्त्रीले गुनासो गर्ने गरेको ती पदाधिकारीले बताए ।

कांग्रेसको पदाधिकारीलाई मन्त्रीको काम भएन भनेर गुनासो गर्ने प्रधानमन्त्री प्रचण्डले कांग्रेस महामन्त्री गगन थापासँग पनि केही विषयमा सुझाव लिने गरेका छन् । उनले प्रधानमन्त्री कार्यालयको छायामन्त्री बनाएर उपमहासचिव वर्षमान पुनमार्फत यो काम गर्ने गरेका छन् ।

रेडजाेनका मन्त्री

प्रधानमन्त्री प्रचण्ड अर्थमन्त्री महतको कार्यसम्पादनप्रति सन्तुष्ट छैनन् । अर्थतन्त्र सकारात्मक दिशामा नजाँदा मन्त्री मात्र होइन, कांग्रेस र सरकारको धारणा पनि सकारात्मक नबनाएको माओवादी नेताहरू बताउँछन् ।

माओवादीबाट मन्त्री भएकाहरू ऊर्जामन्त्री शक्ति बस्नेत, पर्यटनमन्त्री सुदन किराँतीको कार्यसम्पादनप्रति पनि प्रधानमन्त्री सन्तुष्ट छैनन् । त्यस्तै, खानेपानीमन्त्री महिन्द्र राय यादव, भौतिक पूर्वाधार तथा यातायातमन्त्री प्रकाश ज्वालासँग पनि प्रधानमन्त्री सन्तुष्ट हुन सकेका छैनन् ।

यीबाहेक कांग्रेस असन्तुष्ट रहेको गृहमन्त्री नारायणकाजी श्रेष्ठको कार्यशैलीमा प्रचण्डको टिप्पणी छैन । किनकि मन्त्रीको सेट परिवर्तन गर्ने अवस्था आएमा आफ्नै पार्टीका मन्त्रीलाई हटाउन उनलाई गाह्रो छैन । शिक्षामन्त्री अशोक राई, कृषि तथा पशुपन्छीमन्त्री बेदुराम भुसाल, भूमि व्यवस्थामन्त्री रञ्जिता श्रेष्ठको पनि कार्यशैलीमा प्रचण्ड खुसी छैनन् ।

प्रकाशित मिति: बिहीबार, पुस २६, २०८० १८:०५