तेह्रथुममा प्रदेश–१ कै ठुलो शितभण्डार निर्माण हुने

A+ A A-

बसन्तपुर–म्याङलुङ सडकखण्ड दिगो नहुँदा कृषिजन्य उत्पादन निर्यात नभएर आजित भएका तेह्रथुमका किसानहरु शितभण्डार निर्माण हुने भएपछि हर्षित भएका छन् ।
म्याङलुङ नगरपालिका–९ को शाब्लामा प्रदेश–१ कै ठुलो कृषि उपज शितभण्डार निर्माण हुने भएपछि तेह्रथुमका किसानहरु उत्साहित भएका हुन् ।

आफूले उत्पादन गरेको तरकारी भण्डारण गर्ने ठाउँ नहुँदा कृषकहरूले निराश बनेका थिए । उत्पादित कृषिजन्य उपजको निर्यातमा समस्या तथा तरकारी खेती गर्ने मन हुँदाहुँदै पनि भण्डारण गर्ने कृषकहरुको समस्यालाई मध्यनजर गर्दै निर्माण हुन लागेको शितभण्डारणको म्याङलुङ नगरपालिकाका नगर प्रमुख संजयकुमार तुम्बाहाङफेले केही दिन अघि शिलान्यास गरेका छन् ।

प्रदेश नं. १ सरकारको भूमि कृषि तथा सहकारी मन्त्रालयको आर्थिक सहयोगमा तेह्रथुममा पहिलोपटक ४ करोड ३० लाख रुपैयाँको लागतमा शीतभण्डारको निर्माण हुन लागेको निमित्त प्रमुख प्रशासकिय अधिकृत गोपालकृष्ण लिम्वुले बताए । उनले भने,‘तेथ्रथुम कृषि उत्पादनका हिसाबले प्रदेशमै अग्रणी छ ।

यहाँ विषेशगरी नगदेवाली, तरकारी, फलफलु लगायतका कृषि उत्पादन हुन्छ ।

शित भण्डार नहुँदा तत्काल विक्रि नभएका कृषि उत्पादनहरु स्टोर गर्न समस्या थियो । कृषकहरुले यहाँ बारम्बार गुनासो गरिरहनुहुन्थ्यो । तर, अब उहाँहरुको समस्या प्रदेश सरकारले सम्बोधन गरिदिने भएको छ ।’

शीतभण्डारले जिल्लाका हजारौँ किसान खुसी भएका छन्् । किसानहरुको बारीमा उत्पादन भएको तरकारी जिल्लामा खतप नहुँदा बारीमै कुहिएर खेर जाने बाध्यता थियो । जिल्लामा शीतभण्डार नहुँदा उत्पादन भएको तरकारी के गर्ने भन्ने समस्याले पिरोल्ने समस्याको अन्त्य हुने स्थानीय किसान गिरिराज सुवेदीले आशा व्यक्त गरे ।

उनले भने,‘यहाँ उत्पादित कृषि वस्तुहरु ताइका जिल्लाहरु सम्म पुर्याउन सडक खराब भएका कारण अप्ठ्यो थियो । जिल्लामा खपत भए वाहेकको निर्यात गर्न हामिलाई समस्या थियो । तरकारीहरु त्यसै कुहिने अवस्था थियो । तर, शित भण्डार निर्माण भएपछी हामी जस्ता कृषकलाई ठुलै राहत हुनेछ । सरकारले चाँडै यसको निर्माण कार्य सम्पन्न गरिदियोस भन्ने हाम्रो चाहना छ ।’

एक हजार टन क्षमता भएको शीतभण्डार निर्माणका लागि प्रदेश सरकारको ३ करोड अनुदान र म्याङलुङ नगरपालिका एवं कियाचु कृषि सहकारी संस्थाको १ करोड ३० लाख साझेदारीमा शितभण्डार बन्ने भएको हो । भण्डार स्थापनासँगै अदुवा र अदुवाकोे बीउका साथै आलु, टमाटर, बन्दा, सिमीलगायत अन्य कृषिउपज पनि सहजै भण्डारण गर्न सकिने र कृषि पेसामा लागेका बेरोजगार युवा पनि लाभान्वित हुने म्याङलुङ शीतभण्डार निर्माण आयोजनाका सचिव कृष्ण चोङवाङले बताए ।

तेह्रथुमलाई मात्र नभएर छिमेकी जिल्लाका किसानहरुलाई समेत राहत दिने उद्देस्यले निर्माण गर्न लागिएकोे शितभण्डार २०७७ वैशाख भित्र सम्पन्न गर्ने निर्माण आयोजनाको लक्ष्य छ ।

प्रकाशित मिति: बुधबार, असोज २२, २०७६ १३:३०