नेसनल लाइफको 'इम्प्लोई स्किल इनह्यान्समेन्ट वर्कसप' सम्पन्न, २ सयभन्दा बढीको सहभागिता

नेसनल लाइफको 'इम्प्लोई स्किल इनह्यान्समेन्ट वर्कसप' सम्पन्न, २ सयभन्दा बढीको सहभागिता

A+ A A-

नेसनल लाइफ इन्स्योरेन्स कम्पनीले 'इम्प्लोई स्किल इनह्यान्समेन्ट वर्कसप' सफल रूपमा सम्पन्न गरेको छ । तालिम कार्यक्रममा विभागीय प्रमुख तथा देशैभरिबाट प्रशासनिक कर्मचारीहरू गरी २०० भन्दा बढीको सहभागिता रहेको कम्पनीले जानकारी दिएको छ ।

'एक्सेल एन्ड इलिभेट २०८०/८१' नाराका साथ सम्पन्न उक्त कार्यक्रम कम्पनीमा कार्यरत प्रशासनिक कर्मचारीको दक्षता अभिवृद्धि गर्ने उद्देश्यले आयोजना गरिएको कम्पनीको भनाइ छ । कार्यक्रममा जीवन बीमा व्यवसायसँग सम्बन्धित विभिन्न वर्तमान पाटोबारे विवेचना गरी आगामी वर्षका लागि तय भएको व्यावसायिक लक्ष्य र रणनीतिसँग प्रशिक्षित गराइएको कम्पनीका प्रमुख कार्यकारी अधिकृत सुरेशप्रसाद खत्रीले बताए ।

कार्यक्रमको उद्घाटन गर्दै कम्पनीका प्रमुख कार्यकारी अधिकृत सुरेशप्रसाद खत्रीले बीमा व्यवसाय प्रतिस्पर्धात्मक र जटिल हुँदै गइरहेको बताए । उनले भने, 'बीमा व्यवसाय प्रतिस्पर्धात्मक र जटिल हुँदै गइरहेको छ । त्यसैले वर्तमान स्थितिमा आफ्नो दक्षता, मिहिनेत र आपसी समन्वयबाट कम्पनीको व्यावसायिक लक्ष्य हासिल गरी बीमा बजारमा कम्पनीलाई अग्र स्थानमा पुर्‍याउन मार्केटिङका कर्मचारीहरूको जत्तिकै भूमिका प्रशासनिक कर्मचारीहरूको पनि हुने भएकाले सबैले आ–आफ्नो जिम्मेवारी वहन गर्दै अधिकतम प्रयास गर्नुपर्छ ।'

दक्ष कर्मचारीहरूबाट नै उत्कृष्ट परिणाम प्राप्त गर्न सकिने भएकाले कम्पनीले कर्मचारीहरूको क्षमता अभिवृद्धिका लागि लगानी गर्दै जाने प्रतिबद्धत्ता पनि खत्रीले व्यक्त गरे ।

कार्यक्रममा सहभागी कर्मचारीहरूलाई चर्चित मोटिभेसनल स्पिकर मानसी अग्रवालले मोटिभेसनल तथा स्किल डेभलपमेन्ट सम्बन्धमा प्रशिक्षण प्रदान गरिन् । उनले सबै कर्मचारीहरू कम्पनीको ब्रान्ड एम्बेस्डर रहेको र कम्पनीको प्रवर्द्धनमा सबै उत्तिकै जिम्मेवार हुनुपर्नेतर्फ सचेत रहन आग्रह पनि गरिन् ।

सो अवसरमा कम्पनीका प्रशासनिक कार्यहरू सम्पन्न गर्ने क्रममा विभिन्न समस्याहरूको पहिचान गरी सहजीकरण गर्ने उद्देश्यले विभागीय प्रमुखहरू र प्रशासनिक कर्मचारीहरूबीच अन्तर्क्रिया कार्यक्रम पनि सम्पन्न गरिएको थियो ।

यसैगरी, नियमनकारी निकाय नेपाल बीमा प्राधिकरणका सुदूरपश्चिम प्रदेश प्रमुख हृदयश्वर पण्डितले बीमालाई माध्यम बनाएर विभिन्न बहानामा सम्पत्ती शुद्धीकरण गर्न सकिनेतर्फ सचेत रहन आग्रह गरे । उनले राष्ट्रिय हितका लागि आतंकवादी वित्तीय लगानी रोक्नु हामी सबैको कर्तव्य भएको बताए । विभिन्न वित्तीय क्रियाकलापबाट यस्ता व्यक्तिहरूलाई चिन्न सकिने भएकाले उहाँहरूको वित्तीय क्रियाकलापलाई सूक्ष्म निगरानीमा राख्ने र आफ्नो पेसालाई कसरी मर्यादित बनाई अघि बढाउने भन्ने विषयमा प्रशिक्षण प्रदान गरे ।

कार्यक्रममा कर्मचारीहरूको दक्षता जाँच गर्नका लागि सहभागी प्रशासनिक कर्मचारीहरूको परीक्षा सञ्चालन गरिएको थियो । परीक्षामा प्रथम, द्वितीय र तृतीय हुन सफल क्रमशः सुरक्षा सिंह, चुडामणि गौतम र खगेन्द्र श्रेष्ठलाई प्रमुख कार्यकारी अधिकृतले नगद पुरस्कारसहित सम्मान गरे ।

त्यस्तै, देशैभरिबाट उत्कृष्ट कार्य सम्पादन गर्ने पाँच जना प्रशासनिक कर्मचारीहरू महेन्द्रनगर शाखाका ओमप्रकाश पाण्डे, तुल्सीपुर शाखाकी मीना चौधरी, कलंकी शाखाका रोशन शाक्य, इटहरी शाखाकी बन्दिता ढकाल र केन्द्रीय कार्यालयका नवराज थापामगरलाई पनि प्रमुख कार्यकारी अधिकृत सुरेशप्रसाद खत्रीले सम्मान तथा पुरस्कृत गरे ।

प्रकाशित मिति: मंगलबार, पुस २४, २०८० १३:०५