प्रधानमन्त्रीले स्वकीय सचिवालय सानो बनाउने भएपछि सचिवालयका कर्मचारीमा हलचल

प्रधानमन्त्रीले स्वकीय सचिवालय सानो बनाउने भएपछि सचिवालयका कर्मचारीमा हलचल

A+ A A-

प्रधानमन्त्री पुष्पकमल दाहाल प्रचण्डले स्वकीय सचिवालयमा हेरफेर गर्ने तयारी गरेका छन् । उनले स्वकीय सचिवालय सानो आकारको राख्ने बताएका छन् । केही दिनपहिला प्रधानमन्त्री प्रचण्डले प्रधानमन्त्री कार्यालय सिंहदरबारमा ६८ जना कर्मचारीको दरबन्दी कटौती गरिसकेका छन् । यही नीतिअनुसार उनले निजी सचिवालयमा पनि कर्मचारी कटौती गर्ने बताइन्छ ।

सचिवालय धेरै ठूलो भएकाले सकेसम्म सानो चुस्त टिम बनाएर प्रभावकारी तरिकाले काम गर्न सकिने गरी पुनर्गठन हुन थालेको प्रधानमन्त्रीका सञ्चारविज्ञ मनहरि तिमिल्सिनाले बताए । उनले भने, ‘सचिवालय हेरफेर हुन्छ । केही नयाँ साथीहरू आउनुहुन्छ । पहिलाभन्दा सानो टिम बनाउने तयारी छ ।’

प्रधानमन्त्रीले अहिले तीनवटा मोडालिटीमा सचिवालय हेरफेर गर्ने तयारी गरेको बताइन्छ । पहिलो, कामका आधारमा राम्रो काम गर्नेलाई निरन्तरता दिने, प्रभावकारी रूपमा काम गर्न नसकेकालाई बिदाइ गर्ने । विवादमा आएकालाई पनि हटाउने । दोस्रो, काम ठीकै गरेको भए पनि नयाँ साथीहरूलाई पालो दिने गरी टिम बनाउने र तेस्रो अनावश्यक जनशक्तिलाई हटाएर सानो चुस्तदुरुस्त टिम बनाउन चाहेको बालुवाटार स्रोतले बतायो ।

स्रोतले थप्यो, ‘बाहिर प्रधानमन्त्री सचिवालय भजाएर खेतीपाती गर्नेहरू हट्छन् । यस्तो गर्नेहरूले नै सचिवालय र विशेष गरी गंगाजी(प्रधानमन्त्रीकी छाेरी तथा स्वकीय सचिय) लाई बदनाम गराएको देखियो । अब उहाँहरू बाहिरिनुहुन्छ । सचिवालय छिट्टै नै नयाँ कर्मचारीसहित हेरफेर हुँदै छ ।’

अहिले प्रधानमन्त्री प्रचण्डको निजी सचिवालयमा ३९ जना छन् । प्रमुख सल्लाहकार हरिबोल गजुरेलले राजीनामा दिइसकेका छन् । जति काम हुनुपर्ने हो, त्यति काम पनि नभएकाले प्रधानमन्त्रीले टिमलाई रि–स्ट्रक्चरु गर्ने तयारी गरेको बालुवाटार स्रोतले बताएको छ । उक्त स्रोतले भन्यो, ‘प्रधानमन्त्रीको निजी सचिवालयमा जति काम हुनुपर्ने हो, त्यति काम नभएपछि प्रधानमन्त्री आफैँले सानो टिम राखेर काम गर्न चाहनुभएको छ । यो कुरा अलिक पहिला नै भन्नुभएको हो । अब छिट्टै हेरफेर हुन्छ होला ।’

सचिवालय हेरेफेर हुने भएपछि प्रधानमन्त्रीको निजी सचिवालयमा कसरी आफ्नो जागिर सुरक्षित राख्ने भन्ने विषयमा तँछाडमछाड चलेको बताइन्छ । सचिवालयमा बसे पनि टिम वर्कभन्दा पनि आफूअनुसार चल्दा समस्या आउन थालेको एक सचिवालय सदस्य बताउँछन् ।

ती सदस्यले भने, ‘सचिवालयमा सामूहिकताभन्दा पनि प्रायः सबै कर्मचारीले आ–आफ्नो तरिकाले काम गर्न थाल्नुभयो । कोही बढी जान्ने भएर काम गर्न थाले भने कोहीचाहिँ काम नै नगर्ने हुँदा समस्या आएको छ ।’

प्रकाशित मिति: सोमबार, पुस २३, २०८० ०८:५१