राष्ट्रियसभा सिट बाँडफाँटकाे सकसमा गठबन्धन, एमालेसँग सहकार्यकाे 'च्याप्टर क्लाेज'

राष्ट्रियसभा सिट बाँडफाँटकाे सकसमा गठबन्धन, एमालेसँग सहकार्यकाे 'च्याप्टर क्लाेज'

A+ A A-

शनिबार बिहान र बेलुका सत्ता गठबन्धनका दलहरू राष्ट्रियसभा चुनावमा सिट भागवण्डाका लागि बैठक बसे पनि कुन दलले कति सिट लिने भन्ने विषयमा सहमति जुट्न सकेन । गठबन्धनकै बैठकका लागि नेपाली कांग्रेसको कार्यसम्पदान समितिकाे बैठक स्थगित गरियो । तर शनिबार बेलुकासम्म सिट बाँडफाँटकाे स्पष्ट तस्वीर आउन सकेकाे छैन् ।

एकीकृत समाजवादीको सचिवालय बैठकले अध्यक्ष माधवकुमार नेपाल, उपाध्यक्ष राजेन्द्र पाण्डे र महासचिव घनश्याम भुसाललाई राष्ट्रियसभाको सिट र क्लस्टर टुंग्याउने जिम्मेवारी दिएकाे छ । गठबन्धनका ठूला दल कांग्रेस र माओवादी केन्द्रका लागि मात्र हाेइन सत्ता सहयात्रीहरू जसपा, लोसपा, नागरिक उन्मुक्ति पार्टी तथा जनमतलाई पनि भाग पुर्‍याउनुपर्ने बाध्यता गठबन्धनमा छ ।

शनिबारको पहिलो बैठकमा सत्ता गठबन्धनका दलहरू प्रतिपक्षी एमालेसँग सहकार्य नगर्ने निष्कर्षमा पुगे । त्यसपछि आफ्नो पार्टीका दाबीमा केन्द्रित भए । एकले अर्कालाई गलाएर बढी सिट हात पार्ने रणनीति अख्तियार गरी बैठकमा पुगेका दलहरू सकेसम्म धेरै सिट लिने प्रयासमा छन् ।

१९ सिटका लागि चुनाव हुने भए पनि गठबन्धनकाे बैठकमा कांग्रेसले १३, माओवादीले ८, एकीकृत समाजवादीले ५ र जसपाले ४ सिटमा दाबी गरेकाे नेताहरूले जानकारी दिएका छन् । लोसपा, नाउपार्टी र जनमतलाई अहिले राष्ट्रियसभाको भागवण्डामा सामेल गरिएको छैन । तर पनि उनीहरूले कम्तीमा एक सिट नघट्ने गरी दाबी गरिरहेका छन् । नाउपार्टीका संरक्षक रेशम चौधरीले १ सिट पाउने सहमति भैसकेको बताएका छन् ।

यस्तो अवस्थामा गठबन्धनमा सबैभन्दा धेरै सिट दाबी गर्ने दलबाट सिट घटाउने गरी छलफल भइरहेकाे छ । १३ सिट दाबी गरेको कांग्रेस घटेर ११ सिटमा आएको एकीकृत समाजवादीका एक नेताले बताए । ‘कांग्रेसको दाबीभन्दा २ सिट घटाइयो । अब ७–८ सिट दाबी गर्ने माओवादलिाई ५ सिटमा घटाउने होला । सबै दाबी मात्र गर्ने भएका छन् । नछोडी कुरा मिल्दैन,’ ती नेताले शिलापत्रसँग भने ।

एकीकृत समाजवादीले ५ सिट दाबी गरे पनि ३ सिटमा चित्त बुझाउन सक्छ । राष्ट्रियसभा अध्यक्षको दाबी गरेको विषयमा भने नेपाली कांग्रेसले असहमति राख्ने देखिएकाे छ । राष्ट्रियसभा अध्यक्षमा माओवादीले पनि दाबी गरेको छ । त्यसका लागि राष्ट्रियसभाको उपाध्यक्ष पद खाली गर्ने मनस्थितिमा माओवादी छ ।

कांग्रेसले अध्यक्षसहित कम्तीमा ९ सिट पर्नेगरी गठबन्धनमा दबाब बढाएको छ । जनमत पाएर ठूलो दल भएकाले अध्यक्ष दाबी गर्नु स्वाभाविक रहेको कांग्रेस नेताहरू बताउँछन् । संवैधानिक परिषद्मा प्रतिनिधित्वबिहीन भएकाले पनि अध्यक्ष पाउनुपर्ने कांग्रेसको दाबी छ । यसमा पार्टीको दाबी रहे पनि प्रधानमन्त्री पुष्पकमल दाहाल प्रचण्ड पनि सकरात्मक देखिएका छन् । संवैधानिक परिषद्मा ठूलो दलको प्रतिनिधित्व हुनुपर्ने उनले सार्वजनिक कार्यक्रममा बोल्दै आएका छन् ।

यस्तोमा एकीकृत समाजवादी भने पार्टीभित्रको आन्तरिक प्रतिस्पर्धामा भन्दा पनि गठबन्धनमा पार्टीको माग बलियो बनाउने पक्षमा देखिएको छ । ‘पार्टीबाट म्यान्डेट दिएर अध्यक्षसहितका पदाधिकारीलाई जिम्मा दिएका छौं । गठबन्धनमा पनि कुर मिलेको छैन । एकै विषयमा पटक पटक बस्नेभन्दा पनि जिम्मा दिएपछि सहज हुन्छ भनेर म्यान्डेट दिएका छौं,’ एकीकृत समाजवादीका प्रवक्ता जगन्नाथ खतिवडाले शिलापत्रसँग भने । एमालेसँग सहकार्य गरेर चुनाव लड्ने विषयमा असहमति पार्टीको थियो ।

‘गठबन्धनमा पाउने सिट संख्या र क्लस्टर टुंगो लाग्न बाँकी छ । त्यसैले आजको केन्द्रीय कार्यसमिति बैठक स्थगित गरेका हौं । भोलिसम्म ती कुराहरू टुंगिन्छ कि,’ कांग्रेस पार्टी मुख्य सचिव कृष्ण पौडेलले शिलापत्रसँग भने । बैठकले उम्मेदवार तय गर्ने र मापदण्डका आधारमा व्यक्तिको नाममा छलफल गर्नेछ ।

कांग्रेसको जस्तै जसपाको पनि आइतरबार पार्टीको आन्तरिक बैठक छ । अहिले गठबन्धनको बैठकमा अध्यक्ष उपेन्द्र यादव मात्र सहभागी छन् । पार्टीले कतिसम्म लचिलो बन्न सक्ने भन्ने कुरा आइतबारको बैठकले तय गर्नेछ ।

प्रकाशित मिति: शनिबार, पुस २१, २०८० १९:३५