जाडोमा कपडाकै कारण बच्चालाई हुन सक्छ ‘ओभर हिटिङ’, देखिन्छन् यस्ता लक्षण

फाइल तस्वीरः सुशील श्रेष्ठ/शिलापत्र ।

A+ A A-

चिसो मौसममा नवजात शिशुको रेखदेख निकै चुनौतीपूर्ण काम हो । उसो त गर्मीमा पनि यो सजिलो हुन्छ भन्ने हुँदैन । तुलनात्मक रूपमा जाडोमा बढी समस्या उत्पन्न हुने जोखिम हुन्छ । जाडो हुन्छ भनेर अभिभावकले बाक्लोबाक्लो कपडा लगाइदिने गर्छन् ।

कहिलेकाहीँ यसको परिणाम उल्टो भइदिन्छ र बच्चालाई अत्यधिक गर्मी (ओभर हिटिङ) को समस्या हुन्छ । तर, जाडोअनुसार कपडा कम हुँदा पनि अत्यधिक जाडो (ओभर कोल्ड) ले बच्चालाई सताउन सक्छ । दुवै समस्या अभिभावकले पत्ता लाएर समाधान नगर्ने हो भने बच्चामा यसको नकारात्मक असर पर्ने जोखिम हुन्छ ।

त्यसैले जाडोयाममा बच्चालाई सहज र उचित वातावरणमा राख्न अभिभावकले ओभर हिटिङ र ओभर कोल्डका लक्षणहरू पहिल्याउन सक्नुपर्छ ।

ओनली माइ हेल्थ नामक स्वास्थ्य वेबसाइटका अनुसार, नवजात शिशुको हकमा यी लक्षणहरू हेरेर अभिभावकले उसका लागि सहज बनाइदिने कोसिस गर्नुपर्छः

बच्चामा ओभर हिटिङका लक्षण

बाहिर जाडो छ तर बच्चाको टाउकोबाट धेरै पसिना आइरहेको छ भने यो ओभर हिटिङको आमलक्षण हो ।

जाडो मौसममा अचानक बच्चाको अनुहार अत्यधिक रातो हुनुको मतलव उसलाई धेरै गर्मी भइरहेको छ । बाक्लो कपडाका कारण उसलाई त्यस वातावरणमा असहज भइरहेको छ ।

ऊनीको कपडा धेरै तातो हुन्छ । यसको तापका कारण बच्चाको शरीर धेरै रातो हुने वा रेसेजको समस्या हुन सक्छ ।

बच्चालाई सास लिन अप्ठेरो हुनु वा लामो–लामो सास लिनुको अर्थ उसलाई धेरै गर्मी महसुस भइरहेको हुन सक्छ ।

बच्चालाई सामान्यभन्दा बढी चिढचिढाहट भइरहेको छ, ऊ चुप लागेर बसिरहेको छैन भने यो पनि ओभेर हिटिङकै कारण हुन सक्छ । धेरै गर्मी हुँदा बच्चालाई उल्टी हुन सक्छ ।

बच्चामा ओभर कोल्डका लक्षण

बच्चाको हात धेरै चिसो हुनु अत्यधिक जाडोको लक्षण हो ।

नाकबाट सिँगान धेरै बग्नु, बारम्बार हाच्छ्युँ गर्नु पनि शिशुलाई ओभर कोल्ड भएको लक्षण हो ।

बच्चालाई बारम्बार उल्टी आउनु वा उल्टीका लागि वाक्‌वाक् लाग्नु पनि धेरै चिसो हुनुको लक्षण मानिन्छ ।

तपाईंको बच्चा लगातार काम्न थाल्यो भने यो उसलाई धेरै चिसो भइरहेको संकेत हुन सक्छ ।

बच्चाको ओठ फुट्नु र छाला सुक्खा हुनु पनि चिसोको लक्षण हो, यस मौसममा शिशुको छाला सुक्खा हुने र पोल्न हुन सक्छ ।

माथिका सामान्य लक्षणहरूका आधारमा तपाईंले आफ्नो बच्चाका लागि सहज वातावरण बनाइदिन सक्नुहुन्छ ।

प्रकाशित मिति: शनिबार, पुस २१, २०८० ०६:००