इरानमा हुने आक्रमणमा किन अमेरिका र इराकलाई जिम्मेवार ठहर गर्ने गरिन्छ ? (भिडियो)

इरानमा हुने आक्रमणमा किन अमेरिका र इराकलाई जिम्मेवार ठहर गर्ने गरिन्छ ? (भिडियो)

A+ A A-

अमेरिकाद्वारा इराकमा हत्या गरिएका इरानी जनरल कासिम सुलेमानीको वार्षिक स्मृतिमा आयोजित सभामा लगातार दुईवटा शक्तिशाली विस्फोट हुँदा बुधबार कम्तीमा १ सय ३ जनाको मृत्यु भएको छ । विस्फोटमा परी करिब १५० जना घाइते भएका छन् ।

आक्रमणको जिम्मेवारी तत्काल कसैले लिएको छैन । सुलेमानीको दक्षिणी गृहनगर केरमानमा साहेब अल–जमान मस्जिदनजिकै विस्फोट भएको हो । उक्त मस्जिदमा उनलाई गाडिएको थियो । रोयटर्सका अनुसार इरानले प्राय: आफ्नो देशमा हुने आक्रमणमहरूमा इराकलाई जिम्मेवार ठहर गर्ने गरेको छ ।

सन् २००३ मा इराकमा अमेरिकी हस्तक्षेपसँगै त्यहाँ अमेरिकी दबदबा छ । इराकमा साढे ५ लाख अमेरिकी सेना तैनाथ छन् । हाल अमेरिका र इराक आफूलाई रणनीतिक साझेदार मान्दछन् । त्यस कारण पनि यो आक्रमणमा इराक र अमेरिकाको हात रहेको इरानीहरू विश्वास गर्छन् ।

यसअघि इराकको बग्दाद विमानस्थलको ठीक बाहिर नै अमेरिकी ड्रोन हमलामा कासिम सुलेमानीको हत्या भएको थियो । सन् २०२० को जनवरी ३ मा उनको हत्या भएको थियो । उनको चौथो वार्षिकी मनाउन बुधबार मस्जिदमा मानिसहरू जम्मा भएका थिए । विस्फोटअगाडि उक्त मस्जिदबाहिर दुईवटा शंकास्पद ब्रिफकेस देखा परेका थिए । बुधबार २० मिनेटको अन्तरालमा दुवै ब्रिफकेसमा राखिएका बम पड्किएका थिए ।

यो घटनासँगै इरानका सर्वोच्च नेता आयातुल्लाह अली खामेनीले आक्रमणकारीसँग बदला लिने वाचा गरेका छन् । यस्तै, इरानी राष्ट्रपति इब्राहिम रइसीले यस आक्रमणलाई क्रूर र अमानवीय भन्दै आक्रमणकारीलाई सजाय दिएरै छाड्ने बताएका छन् ।

भिडियो

सम्बन्धित समाचार

काे हुन् कासिम सुलेमानी ? जसकाे चिहानमै गराइयाे शक्तिशाली विस्फाेट

वास्तवमा सुलेमानी जसको चिहानमा आक्रमण भयो, उनलाई इरानमा राष्ट्रिय नायक भन्ने गरिन्छ । उनी इरानी सेनाका कमान्डर थिए । जीवित रहँदै इरानका सर्वोच्च नेता आयातुल्लाह अली खामेनीद्वारा ‘जीवित शहीद’ घोषणा गरिएका सुलेमानीलाई इराक र सिरिया दुवैमा इस्लामिक स्टेट जिहादी समूहलाई हराउन उनको भूमिकाका लागि नायकका रूपमा लिइन्छ ।

धेरै इरानीको नजरमा उनको सैन्य र रणनीतिक क्षमता अफगानिस्तानका साथै सिरिया र इराकजस्ता छिमेकी मुलुकका बहुजातीय विघटनलाई रोक्न सहायक थियो । लामो समयदेखि अमेरिका र उसका सहयोगीहरूले घातक शत्रुका रूपमा हेरिएका सुलेमानी सिरिया, इराक र यमनमा इरानको राजनीतिक र सैन्य एजेन्डा सेट गर्दै यस क्षेत्रको सबैभन्दा महत्त्वपूर्ण शक्तिमध्येका एक मानिन्थे ।

तर, अमेरिकाले सुलेमानीलाई खतरनाक आतंकवादी भन्दै ड्रोन आक्रमण गर्दै उनको हत्या गरिदिएको थियो । वास्तवमा सन् २०२० को जनवरी ३ मा सुलेमानी सिरिया भ्रमणमा गएका थिए । त्यसपछि उनी चुपचाप इराकको राजधानी बग्दाद पुगेका थिए । अमेरिकी र इजरायली गुप्तचरहरूलाई यो जानकारी प्राप्त भएपछि अमेरिकी एमक्यू– ९ ड्रोनबाट विमानस्थलबाहिर सुलेमानी सवार कारलाई आक्रमण गरिएको थियो ।

अमेरिकी तत्कालीन राष्ट्रपति डोनाल्ड ट्रम्पको आदेशमा सीआईएले यो हत्याको योजना बनाएको थियो । सन् २०१९ मा जब ट्रम्पले आणविक सम्झौता तोडेका थिए, तब सुलेमानीले ट्रम्पले सुरु गरेको युद्ध इरानले समाप्त गर्ने बताएका थिए ।

प्रकाशित मिति: बिहीबार, पुस १९, २०८० १३:०५