एमालेसँग गठबन्धनको कुरा नमिले कांग्रेसबाट यी नेताले पाउन सक्छन् राष्ट्रियसभामा टिकट

एमालेसँग गठबन्धनको कुरा नमिले कांग्रेसबाट यी नेताले पाउन सक्छन् राष्ट्रियसभामा टिकट

A+ A A-

११ माघमा हुने राष्ट्रियसभा चुनावको उम्मेदवारी दर्ता गर्ने दिन अब एक हप्ता पनि बाँकी नरहेका बेला दलहरू उम्मेदवारको चयनको प्रक्रियामा त प्रवेश गरेका छन्, तर स्पष्ट चित्र भने आइसकेको छैन । २३ पुसमा उम्मेदवारी दर्ता गर्नुपर्ने भए पनि दलहरू गठबन्धनमा जाँने तयारीमा रहेकाले उम्मेदवार चयनको तहमा पुगिसकेका छैनन् । यद्यपि दलहरूले आफ्ना आन्तरिक कमिटीहरूबाट नाम भने केन्द्रमा सिफारिस गरिसकेका छन् ।

सत्ता गठबन्धनमा सिटको बाँडफाँटका लागि बुधबार छलफल भएको छ, तर सहमति जुटिसकेको छैन । त्यसमाथि एमालेलाई पनि समेट्ने तयारीले एक दुई दिन अझै को उम्मेदवार हुन्छन् भन्ने तस्वीर स्पष्ट नहुने अवस्था बनेको छ ।

गठबन्धनमा एमाले समेटिन्छ कि समेटिँदैन भन्ने विषय एकतिर छ भने अर्कोतिर कुन दललाई कति सिट भाग पर्छ भन्ने विषय छ । तर, संसदको सबैभन्दा ठूलो दल नेपाली कांग्रेसमा टिकटका लागि लबिङ गर्ने नेताहरू देशभरबाट काठमाडौं केन्द्रित भएका छन् । उनीहरूले सभापति शेरबहादुर देउवालगायत नेताहरूँग भेट्न दैनिक निवासहरूमा जाने गरेका छन् ।

कांग्रेसले सबै प्रदेशबाट कम्तीमा १ सिट पाउने सम्भावना छ । यस्तो अवस्थमा उसले कोशी, मधेश, लुम्बिनी, कर्णाली र सुदूरपश्चिममा एक–एक सिट पाउनेछ भने बागमती र गण्डकीमा दुई–दुई सिट पाउने सम्भावना छ ।

कांग्रेसबाट सभापति देउवाले कोशी प्रदेशमा कृष्ण सिटौला, मधेश प्रदेशबाट आनन्द ढुंगाना, बागमती प्रदेशमा जीतजंग बस्नेत वा मदन अमात्य, गण्डकी प्रदेशमा गोपालमान श्रेष्ठ वा सोभियत अधिकारी, लुम्बिनीबाट पुष्पा भुसाल, सुदूरपश्चिममा नारायण दत्त भट्ट वा बलदेव बोहरालाई राष्ट्रियसभामा ल्याउन चाहेको एक कांग्रेस नेताले शिलापत्रलाई जानकारी दिए । कर्णाली प्रदेशबाट भने अरु दललाई दिन सक्ने ती नेताले बताए ।

बागमती प्रदेशबाट कांग्रेस काठमाडौं सभापति सबुज बानिया पनि आकांक्षी छन् । पार्टीका गुट उपगुटका शक्ति केन्द्रसँग समानान्तर सम्बन्ध बनाएका उनका लागि पछिल्लो समय नेता प्रकाशमान सिहंले लबिङ गरिरहेका छन् । बागमतीबाटै संस्थापनइतर समूहले जोड गरेका नेता मिनेन्द्र रिजाललाई उम्मेवादर बनाउने तयारी कांग्रेसभित्र छ । यदि बागमतीमा सहमति हुन नसके एकीकृत समाजवादीका उपाध्यक्ष प्रमेश हमाललाई स्थान दिन सक्ने कांग्रेस नेताहरू बताउँछन् ।

यदि एमालेसँग गठबन्धनको कुरा मिलेमा कांग्रेसको सिट घट्नेछ । त्यस्तो अवस्थमा सभापति देउवाले केन्द्रीय समति बैठकमा भनेजस्तै ‘सबैलाई मिलाउनुपर्नेछ बुझ्नुहोला’ कै बाटोमा कांग्रेस हुनेछ ।

किन एमाले समेट्ने ?

सिट बाँडफाँटका लागि बुधबार सत्ता गठबन्धनको बैठकले के निर्णय गर्छ र एमालेसँग हुने बैठक कस्तो हुन्छ त्यसले अर्थ राख्ने देखिएको छ । त्यसो त एमालेले कांग्रेस र माओवादी केन्द्रसँग छुट्टाछुट्टै सम्पर्क गरिरहेको थियो । तर, त्यहाँबाट सकरात्मक सन्देश एमालेले पाएन । त्यसैले गठबन्धनले नै एमालेलाई समेट्ने विषय चर्चामा आएको छ ।

सत्ता गठबन्धनमै मिलेर लड्का सबै सिट जित्न सक्ने अवस्था रहे पनि एमालेलाई गठबन्धनले किन समेट्न खोजेको हो भन्ने प्रश्नको उत्तर पाइसकिएको छैन । तर दलहरू यसलाई गणतन्त्र विरोधी शक्तिलाई जवाफ दिनका लागि हो भन्ने गर्छन् । पुस १६ मा कांग्रेसले आयोजना गरेको मेलमिलाप दिवसमा शान्ति सम्झौताका सहभागी दलहरू एकठाउँमा भेला पारेर एकताको सन्देश दिएका थिए । ‘मेलमिलापको कार्यक्रमले एक किसिमको माहोल बनायो । संसदवादी र शान्ति प्रक्रियामा रहेका दलहरू एक ठाउँमा रहनपर्छ भनेर कार्यक्रम गराइयो । त्यसपछि ओली पनि नजिक नजिक हुनुहुन्छ मिल्नुपर्छ भनेर भन्ने समाचार आयो । अहिले कांग्रेस र माओवादी, माओवादी र एमाले, कांग्रेस र एमाले बसेका अवस्था छ । हेरौं के हुन्छ । कता धेरै सिट पाइन्छ भन्ने छ । तर गठबन्धन टुट्दैन,’ कांग्रेस प्रचार विभाग प्रमुख मीन विश्वकर्माले शिलापत्रसँग भने ।

एमालेलाई पनि सहभागी गराएर सबैलाई मिलाएर लैजाने कि भन्ने कुरा भएको उनले बताए । कांग्रेस यो विषयमा निर्णयमा नपुगेको उनले बताए । ‘कुरा चलेको मात्र हो । हुन्छ नि भन्ने अवस्थामा कांग्रेस पुगेको छैन,’ विश्वकर्माले भने । यस विषयमा एमाले र कांग्रेस छलफलमा नबसेको र बस्ने सक्ने उनले बताए ।

राष्ट्रपतिबाट मनोनीत सहित २० सिटमा चुनाव लड्न एमालेले तयारी गरिरहेको छ । उसले हार्ने चुनाव भनेर रौनक कम देखिएको नेताहरू बताउँछन् । ‘हामीले मनोनयन गर्ने तयारी गरिरहेका छौं । यदि राजनीतिक रुपमा सहमति भयो भने पनि सकरात्मक रुपमा लिनुपर्छ । दलीय स्ट्रेन्थको आधारमा मिलेर जाऔं भन्ने बन्यो भने पनि अन्यथा होइन । त्यो सम्भावना भैसकेको छैन र एमालेले मरिहत्ते गरेको छैन,’ प्रतिनिधिसभाका एमाले सचेतक महेश बर्तौलाले शिलापत्रसँग भने ।

संक्रमणकालीन न्यायको विषय टुंग्याउन प्रधानमन्त्री प्रचण्ड विश्वासको वातावरण बनाउन चाहान्छन् । कांग्रेसँग ५ सिट मागेको एमालेलाई गठबन्धनबाट ५ सिट सम्म दिनका लागि माओवादी तयार रहेको नेताहरू बताउँछन् । त्यसका लागि टीआरसीमा सहमति जनाउनुपर्ने सर्त एमालेसँग राख्ने तयारी रहेको माओावदी स्रोतले बतायो ।

यदि एमालेसँग कुरा नमिलेमा चुनाव हुने १९ सिटमा सत्तारुढ गठबन्धनका दलहरूबीच हुने भागवण्डाका आधारमा उम्मेदवार तय हुनेछन् । सत्ता गठबन्धनमा रहेका कांग्रेस, माओवादी, एकीकृत समाजवादी र जनता समाजवादी पार्टीबीच सिट बाँडफाँट हुनेछ । कांग्रेसले मनोनीतसहित १०, माओवादी केन्द्र ६, नेकपा एकीकृत समाजवादी ३ र जसपाले एक सिट पाउने सम्भावना रहन्छ । त्यस्तै, गठबन्धनबाट १ सिट पाउने सहमति भएको नागरिक उन्मुक्ति पार्टीका संरक्षक रेशम चौधरीले बताएका छन् ।

जुन पार्टीको जहाँबाट सिट खाली हुँदै छ, त्यो सिटमा सो पार्टीको स्वतः हकदाबी रहन्छ । त्यसबाहेक एमालेबाट पदावधि सकिएका ८ सिटमा गठबन्धनको खिचातानी हुनेछ । एमालेका बागमतीबाट २, गण्डकीबाट २ लुम्बिनीबाट १, कर्णालीबाट २ र सुदूरपश्चिम प्रदेशबाट एक जनाको पदावधि सकिँदै छ ।

प्रकाशित मिति: बुधबार, पुस १८, २०८० १६:३९