जाजरकोट भूकम्पका २ महिना: २३ हजार नागरिक अझै पालमा

फाइल तस्वीर ।

A+ A A-

१७ कात्तिकमा १ सय ५४ जनाको ज्यान लिने गरी जाजरकोट केन्द्रविन्दु भएर भूकम्प गएको आज २ महिना पुगेको छ ।

भूकम्प गएको लामो समय भइसक्दा पनि २३ हजार ५ सय ८३ परिवार अझै त्रिपालमा बस्न बाध्य छन् । जसका कारण हालसम्म जाजरकोटमा त्रिपालको चिसोले ३ बालबालिका, १ सुत्केरी र वृद्धवृद्धासहित ३० जनाको ज्यान गइसकेको छ ।

सरकारले मंसिर महिनामै प्रभावित नागरिकलाई अस्थायी आवासमा सारिसक्ने बताएको थियो । तर, भूकम्प प्रभावित नागरिकलाई सरकारले उपलब्ध गराउने भनिएको अस्थायी आवास निर्माणबापतको पहिलो किस्तासमेत पाउन सकेका छैनन् ।

बैंक खाता खोल्नुपर्ने, अन्य ठाउँमा पक्की घर नभएको स्वघोषणा, प्रहरी मुचुल्का, घर भत्काउनुपर्नेलगायतका प्रक्रियागत झन्झटका कारण अस्थायी आवास निर्माणमा ढिलाइ भइरहेको छ । ३५ हजार १ सय ४० जना लाभग्राही रहेकोमा हालसम्म ११ हजार ५ सय ५७ लाभग्राहीले आवास निर्माणबापतको पहिलो किस्ता प्राप्त गरेको जिल्ला प्रशासन कार्यालय जाजरकोटले उपलब्ध गराएको तथ्यांकमा उल्लेख छ । ती लाभग्राहीको खातामा २८ करोड ८९ लाख २५ हजार रकम पठाइएको कार्यालयले जनाएको छ ।

हालसम्म जिल्लाभर ८ हजार २ सय अस्थायी टहरा निर्माण भएका छन् । जिल्ला प्रशासन कार्यालयका प्रशासकीय अधिकृत हरिश्चन्द्र शर्माले अस्थायी आवास निर्माणका लागि जिल्ला विपत् व्यवस्थापन कोषबाट सात पालिकाको खातामा ८४ करोड ९५ लाख ७५ हजार रुपैयाँ निकासा गरिएको जनाए ।

यता रुकुम पश्चिममा भने जाजरकोटको तुलनामा आवास निर्माणको रकम निकासाको कामले गति लिइरहेको छ । जिल्लाभर २६ हजार ८ सय ५ लाभग्राही कायम भएकोमा २३ हजार ६ सय ८ लाभग्राहीसँग सम्झौता भएको छ ।

हालसम्म १९ हजार ७ सय १७ लाभग्राहीले २५ हजारका दरले ४९ करोड २९ लाख २५ हजार रकम पाइसकेको भए पनि अस्थायी आवास निर्माणको कामले भने गति लिन सकेको छैन । रुकुम पश्चिममा हालसम्म ७ हजार ७९ अस्थायी आवास निर्माण भएको जनाइएको छ ।

प्रकाशित मिति: मंगलबार, पुस १७, २०८० १६:२६