बाकसमा गाउँ पुग्यो सुजनको शव, शोकमा दैलेख (भिडियो)

A+ A A-

कोरियन भाषा परीक्षाका लागि आवेदन दिन काठमाडौं पुगेका दैलेखका २३ वर्षीय सुजन रावतको शव बाकसमा फर्किएपछि यतिबेला दैलेख शोकमा डुबेको छ ।

युवाहरूले ईपीएस शाखा कार्यालय बालकुमारीनजिकै शुक्रबार गरेको आन्दोलनमा प्रहरीको निर्घात कुटपिटबाट ज्यान गुमाएका सुजनको शव नेपाली सेनाको हेलिकोप्टरमार्फत दैलेख पुर्‍याइएको हो । सेनाको हेलिकोप्टर जब दैलेखी आकाशमा देखियो, तब सुजनको शवको पर्खाइमा बसेका आफन्तहरू भक्कानिएर रोए ।

बिरामी रहेकी सुजनकी आमाले छोराको शव बाकसमा देख्नेबित्तिकै आफूलाई सम्हाल्न सकिनन् । श्रीमान् गुमाएको वर्ष दिनमै छोरा गुमाउँदा भावविह्वल बनेकी नन्दा कटुवाल (रावत) लाई आफन्तहरूले सान्त्वना दिने प्रयास गरिरहेका देखिन्थे । तर, उनी भक्कानिँदै सुजनलाई आँखा खोल्न आग्रह गर्दै थिइन् ।

आफ्नो मुटुको टुक्रालाई आफूबाट अलग गराइएपछिको पीडामा रहेकी नन्दाले आफ्नो जिउने आधार नै सकिएको भन्दै छाती पिटेर रुँदाको क्षण व्यक्त गर्न लायक थिएन । उनले बारम्बार सुजनलाई बोल्न आग्रह गरिरहेकी थिइन् । बुवा बितेपछि आमा, बहिनी र भाइको पालन पोषण गर्ने जिम्मेवारी बोकेका सुजनको मृत्युले आफन्तहरूमा सन्नाटा छाएको छ । श्रद्धाञ्जली दिन उपस्थित भएकाहरू पनि पीडामा देखिन्थे ।

महाबु गाउँपालिका स्थायी घर भएका रावतको परिवार दैलेख बजारमा बस्दै आएको छ । उनको आजै अन्त्येष्टि गरिने जनाइएको छ । प्रहरीको दमनपछि छातीमा गम्भीर चोट लागेका उनी सडकमै बेहोस भएर लडेका थिए । रावतको शरीरमा नीलडाम थिए । साथीहरूले एम्बुलेन्स बोलाएर राउतलाई किस्ट मेडिकल कलेज पुर्‍याए । चिकित्सकले तत्कालै मृत घोषणा गरिदिए ।

आन्दोलनकारी युवाहरूले भौतिक पूर्वाधार तथा यातायातमन्त्री प्रकाश ज्वालाको गाडी जलाएपछि प्रहरी आक्रोशित भएको थियो । प्रहरीले अन्धाधुन्ध लाठी चार्ज र गोली प्रहार गरेको थियो । त्यस क्रममा अछामका वीरेन्द्र शाहको पनि प्रहरीको गोली लागेर मृत्यु भएको छ ।

प्रकाशित मिति: मंगलबार, पुस १७, २०८० १४:०९