बालकुमारी घटनाबारे प्रचण्डले भने- कतै लोकतन्त्र र गणतन्त्रविरुद्धको डिजाइन त होइन ?

बालकुमारी घटनाबारे प्रचण्डले भने- कतै लोकतन्त्र र गणतन्त्रविरुद्धको डिजाइन त होइन ?

A+ A A-

प्रधानमन्त्री पुष्पकमल दाहाल प्रचण्डले बालकुमारीमा दुई युवाको मृत्यु र मन्त्रीको गाडी जलाइएको प्रकरण लोकतन्त्र र गणतन्त्रविरुद्धको डिजाइन भएको टिप्पणी गरेका छन् ।

'यो कहीँ लोकतन्त्र र गणतन्त्रविरुद्धको डिजाइन कतै त छैन भन्ने मेरो अहिले कुनै प्रुफ होइन । त्यसैकारण मैले तुरुन्त नै त्योसँग सम्बन्धितलाई निलम्वन गर्ने र उच्चस्तरिय छानबिन आयोग बनाउनुपर्छ यसलाई,' प्रचण्डले भने, 'सामान्य छानबिन समितिले मात्रै पुग्दैन भन्ने निष्कर्ष निकालेर मृतकका परिवारलाई समेत बालुवाटार बोलाएर गम्भिर ढंगले समीक्षा गरिएको छ । आज बिहान मात्रै क्याबिनेटबाट हामीले सरकारले गर्नुपर्ने र गर्न सक्ने जति काम तुरुन्तै गरिएको छ ।'

सोमबार नेपाली कांग्रेसले मेलमिलाप दिवसको अवसरमा आयोजना गरेको अन्तरक्रियामा प्रचण्डले बालकुमारी घटना लोकतन्त्र र गणतन्त्रविरुद्धको डिजाइनको रूपमा भएको आफूले अनुमान गरेको बताए । आफूले सम्बन्धित निकायसँग घटनाबारे ब्रिफिङ लिँदा सामान्य नलागेको प्रचण्डले बताए ।

'म अहिले सबै भन्न चाहन्नँ । केही चिज गम्भीर लागेको छ, सामान्य छैन यो । त्यो दुई जना युवाहरूको जस्तो परिवेशमा, जसरी हत्या भएको छ । ईपीएसमा जे–जस्ता गतिविधि भएका छन्,' प्रचण्डले भने, 'गाडी जलाउने जस्तो–जस्तो गतिविधि भएको छ । यो थिङ्स आर नट ह्वाट दे सिम् भनेजस्तो छ । चिज त्यस्तो छैन । जस्तो देखिएको छ । त्यो भित्र अर्कै केही छ भन्ने मैले अनुभूत गरेको छु ।'

उक्त घटना बाहिर देखिएजस्तो मात्रै नभएको प्रचण्डको भनाइ छ । घटनाको अन्तर्यमा अरु नै केही कुरा भएको उनको भनाइ छ । मृतकका परिवारलाई रोजगारी दिने र शहीद घोषणा गर्ने कुरा राजनीतिक तहमा छलफल भइरहेको पनि उनको भनाइ छ ।

'परिवारलाई रोजगारी दिने कुरा, शहीद घोषणाका कुरा छन् त्यो हामी राजनीतिक तहमा छलफल गर्दैछौँ । सरकारले पहल लिएकै छ नि चाहे भुकम्प होस् । चाहे यस्ता घटनाहरुमा । यो भाष्य के त्यो गाडी जलाउने बेलामा मन्त्रीलाई नै भित्रै जलाउनुपर्थ्यो छोडेछन् भन्ने भाष्य के भाष्य हो यो ?' उनले भने ।

जनतालाई निराशा बाँडिएको भन्दै प्रचण्डले देशमा अध्याँरोबाहेक केही नदेखाउनेहरू राष्ट्रवादी हुन नसक्ने तर्क गरे । 'आज मैले आज एउटा न्युज हेरेँ शेरबहादुरजी, मेरो र केपी ओलीको । यिनलाई गोली ठोकेर टाउको काटेदेखि म २०/२० लाख दिन्छु भन्ने प्रचार भइराखेको छ । के भाषा हो यो ? के संस्कार हो यो ? लोकतन्त्रमा यस्तो हुन्छ र ?' प्रचण्डले भने, 'जनतलाई निराशा बाँड्ने । अध्याँरो देखाउने । अध्याँरोबाहेक देशमा केही छैन भन्ने कोही राष्ट्रवादी हुन सक्दैन । जनतालाई आशा देखाउन सक्नुपर्छ राजनीतिक नेतृत्वले । भएका कमी स्वीकार्न पनि आँट गर्नुपर्छ । गरेका राम्रा काम स्थापित गर्न पनि आँट गर्नुपर्छ । हाम्रो अगाडि त्यही जिम्मेवारी छ ।’

सरकारले गरेका राम्रा कामहरूको प्रशंसा गर्न नहिच्किचाउन नेपाली कांग्रेसका नेता, कार्यकर्ताहरूलाई प्रचण्डले आग्रह गरे । तीन प्रमुख राजनीतिक दलका शीर्ष नेताहरूका बीचमा शान्ति प्रक्रियाका बाँकी काम टुंग्याउने सहमति भएको उनको भनाइ छ ।

नेपालका राजनीतिक दलका समकालीन नेताहरू कुनै न कुनै रूपमा बीपी कोइरालाकै स्कुलिङबाट दीक्षित भएका प्रचण्डले बताए । उनले बीपी कोइरालालाई नेपाली राजनीतिको मुर्धन्य व्यक्तित्वको रूपमा चित्रण गरे ।

प्रकाशित मिति: सोमबार, पुस १६, २०८० १७:३९