पीएसओले छिटो सुरक्षाकर्मी पठाउन आग्रह गरेका थिए, तर २० मिनेटसम्म पनि सुरक्षाकर्मी पुगेनन्: मन्त्री ज्वाला

पीएसओले छिटो सुरक्षाकर्मी पठाउन आग्रह गरेका थिए, तर २० मिनेटसम्म पनि सुरक्षाकर्मी पुगेनन्: मन्त्री ज्वाला

A+ A A-

भौतिक पूर्वाधार तथा यातायातमन्त्री प्रकाश ज्वालाले बालकुमारी घटनाको सन्दर्भमा आफूले सो रुट प्रयोग गर्दा त्यहाँ भइरहेको अवरोधका सम्बन्धमा सुरक्षा निकायले कुनै जानकारी नदिएको दाबी गरेका छन् ।

सोमबार न्युज एजेन्सी नेपालसँग कुराकानी गर्दै मन्त्री ज्वालाले गत शुक्रबार आफूले बालकुमारी क्षेत्रको रुट प्रयोग गर्दा सुरक्षा निकायले सो क्षेत्रमा भइरहेको अवरोधका सम्बन्धमा कुनै जानकारी नगराएको दाबी गरेका हुन् ।

शुक्रबार रोजगार अनुमति प्रणाली (ईपीएस) आवेदन फारम भर्न नपाएको भन्दै बालकुमारी क्षेत्रमा युवाहरूले प्रदर्शन गरेका थिए । प्रदर्शनकारीले सोही रुट हुँदै आएको मन्त्री ज्वालाको गाडीमा आगजनी गरेका थिए भने प्रहरी हस्तक्षेपका कारण दुई जना युवाहरूको ज्यानसमेत गएको थियो ।

सोही विषयमा कुरा गर्दै मन्त्री ज्वालाले आफू पार्टी केन्द्रीय कमिटी बैठकका लागि तीन दिनदेखि बालकुमारी आवतजावत गरिरहेको र शुक्रबार पनि बैठकस्थलबाट निस्किएर मन्त्रालय जाने क्रममा सो घटना भएको बताए ।

आफ्नो सुरक्षा अधिकृतले केन्द्रमा आफूहरू बालकुमारीबाट मन्त्रालय निस्किएको जानकारी गराएको भए पनि प्रहरी केन्द्रबाट बाटोमा अवरोध भएको र त्यो बाटो प्रयोग नगर्ने सम्बन्धमा कुनै जानकारी नआएको उनको भनाइ छ । आफूहरूलाई बाटोमा अवरोध छ भन्ने कुरा जानकारी नै नभएका कारण त्यो रुट प्रयोग भएको उनको तर्क छ ।

मन्त्री ज्वालाले घटनाप्रति आफू दुःखी रहेको भन्दै दुःख पनि व्यक्त गरे । घटनामा आफूहरूको कुनै सम्बन्ध नभएको उनको तर्क छ । आफूहरू निर्दोष हुँदाहुँदै पनि आरोपित गरिएको भन्दै ज्वालाले असन्तुष्टि व्यक्त गरे । आफूहरू नै पीडित पक्ष भएको भन्दै सुरक्षाकर्मीहरूको कमजोरीलाई आफूहरूतिर थोपरिएको उनको गुनासो छ ।

के भने मन्त्री ज्वालाले ?

बालकुमारी घटना आफैँमा आफैँमा दुःखद घटना हो । दुई जना युवाहरूको ज्यान गएको छ । केही घाइते भएका छन् । र यो नघट्नुपर्ने, नहुनुपर्ने घटना भएको छ । यसमा हामी दुःखी छौँ । यसप्रति म दुःख पनि व्यक्त गर्न चाहन्छु ।

त्यस दिन हाम्रो पार्टीको केन्द्रीय कमिटी बैठक कान्तिपुर पार्टी प्यालेसमा चलिरहेको थियो । त्यो बैठक दुई दिन अघिदेखि चलिरहेको थियो । अन्तिम दिन बैठक भइरहेको थियो । त्यस बैठकमा म बिहानैदेखि सहभागी थिएँ । अर्कोतिर यता सिंहदरबारमा मन्त्रालयमा एउटा बैठक थियो मेरो । त्यो बैठक सुरु भइसकेपछि केही समयका लागि मन्त्रालयको बैठकमा सहभागी भएर फेरि बैठकमा फर्किने उद्देश्यले म त्यो पार्टी प्यालेस बैठक कक्षबाट बाहिर निस्केँ ।

बाहिर निस्किनुभन्दा अगाडि बालकुमारी क्षेत्रमा के अवस्था छ ? त्यहाँ डिस्टर्ब छ कि छैन ? अथवा परिस्थिति के छ ? रुटको अवस्था के छ ? त्यो हामीलाई केही पनि थाहा भएन । हामी सामान्य अवस्थामा बाहिर निस्कियौँ । निस्किँदाखेरी पनि सुरक्षा निकायबाट, सुरक्षाकर्मीबाट समेत यस विषयमा कुनै जानकारी नभएपछि हामी सामान्य रूपमा बाहिर निस्कियौँ । संयोगले त्यतिबेलै हाम्रै मन्त्रालयको राज्यमन्त्रीज्यूको गाडी भित्र पस्यो । उहाँको गाडी भित्र पस्यो । हामी बाहिर निस्कियौँ । राज्यमन्त्रीज्यूको गाडीभित्र पस्दासम्म सामान्य नै अवस्था छ ।

हामी निस्किसकेपछि बीचमा अलिकति अगाडि बढिसकेपछि पारिपट्टि केही डिस्टर्ब हामीले महसुस गर्‍यौँ । अब के गर्ने भनेर त्यहाँ हामीबीचमा छलफल भयो । अगाडि बढ्न पनि नसकिने, पछाडि फर्किन पनि नसकिने भएपछि मुख्य बाटोमा हामी प्रवेश गर्‍यौँ ।

मुख्य बाटोमा गइसकेपछि पनि केही व्यक्तिहरू आएर गाडी रोक्ने प्रयास भयो । त्यहाँ पीएसओले सम्झाउने प्रयास गरे । र, प्रदर्शनकारीहरू रोक्नेमध्येकै पनि कतिपय व्यक्तिहरूले यो गाडीलाई अगाडि जान दिऊँ भनेर निकै धेरै प्रयास पनि गरे । त्यति हुँदाहुँदै पनि भिड बढ्दै जान थालेपछि म त्यहाँ रहँदा झन् उत्तेजित होला भिड भन्ने हिसाबले म त्यो गाडीबाट निस्केर फेरि बैठकस्थलमै फर्किइहालेँ ।

फर्केपछि म बैठकमा बसेँ । त्यसपछिको अवस्था पनि मलाई जानकारी छैन । त्यहाँ आगलागी भएको कुरा । गोली चलेको कुरा । गोली चलेको कुरा गाडीमा आगो लाग्नुभन्दा पहिले हो कि पछि हो, यो कुरा पछि छानबिनबाट पनि थाहा होला । त्यहाँ गाडी पुग्यो । म केही समय त्यहाँ रोकिएँ । रोकिएपछि त्यहाँको अवस्था तनावपूर्ण हुन्छ कि भन्ने उद्देश्यले आफ्नो बैठक कक्षमा फर्किइहालेँ । फर्किएपछि त्यसपछिको अवस्था के भयो ? कसरी अगाडि बढ्यो ? त्यस विषयमा पनि जानकारी छैन ।

हाम्रो गाडी त्यहाँ पुगिसकेपछि पीएसओले बारम्बार यहाँ गाडी सडकमा छ । प्रदर्शनकारीहरूले घेरिरहेका छन् । छिटोभन्दा छिटो सुरक्षाकर्मी पठाउनुपर्‍यो भनेर उसले कम्युनिकेसन गरिरहेका थिए । त्यति हुँदा पनि करिब २०/२२ मिनेटसम्म पनि त्यहाँ सुरक्षाकर्मीहरू पुगेनन् । त्यसपछि प्रदर्शनकारीहरूले आगो लगाए भन्ने कुरा पछि मैले जानकारी पाएँ ।

यो घटनामा हामी कहीँ कतैबाट पनि जोडिँदैनौँ । हाम्रो कुनै सम्बन्ध, साइनो पनि छैन । हाम्रो मन्त्रालयसँग जोडिएको विषय पनि होइन । हामीचाहिँ सामान्य अवस्थामा बैठक कक्षबाट मन्त्रालयमा आउने क्रममा बाटोमा गाडी रोकियो । यो घटना भयो । यस विषयमा हामी प्रस्ट के छौँ भने, न त्यो घटनाभन्दा पहिले हामीलाई जानकारी छ, न हामीलाई रोकिसकेपछिको घटनाको जानकारी छ । हामी यो घटनासँग कुनै पनि हिसाबमा जोडिँदैनौँ ।

अब भौतिक पूर्वाधारमन्त्री चढेको गाडी आएकै कारणले यो घटना घट्यो भन्ने कसैले परिभाषा गर्छ भने यो पूर्ण रूपमा गलत कुरा हो । किनकि सडक खुला छ । सडकमा गाडी त चल्छन् । अरु गाडीहरू पनि चलिरहेकै छन् । हाम्रो गाडी पनि चल्यो । त्यहाँ डिस्टर्ब छ भन्ने कुरा जानकारी भए पनि त्यो बाटोमा हामी जाँदैनथ्यौँ । त्यो जानकारी पनि भएन ।

यो घटनासँग हाम्रो कुनै संलग्नता पनि छैन । हाम्रो गाडी त्यो बाटोमा हिँडेकै कारणले यो घटना उत्तेजक बनेको पनि होइन । त्यसभन्दा पहिलेदेखि नै त्यहाँ भिडन्त भएको रहेछ । त्यसपछि पनि भिडन्त भइराख्यो । जहाँ गाडी जलाइयो, त्यो ठाउँमा भिडन्त भएको पनि छैन । त्यो ठाउँमा कुनै गोली चलेको पनि छैन । त्यस कारण यो घटनामा हामीलाई जोड्ने अथवा हाम्रो गाडी सडकमा गएको कारणले यो घटना घटेको हो अथवा प्रदर्शनकारी बढी उत्तेजित भएका हुन् भन्ने कुरा गलत छ ।

त्यतिबेला म बैठक कक्षबाट निस्किएँ । त्यसपछि मैले पीएसओ र ड्राइभरलाई हामी सिंहदरबार जाऔँ भने । हामी सबै गाडीमा बस्यौँ । गाडीबाट हिड्यौँ । हिँड्दाहिँड्दै पीएसओले हामी बालकुमारीबाट मन्त्रालय जाँदै छौँ भनेर आफ्नो सेन्ट्रलमा उनले खबर गरिरहेको मैले सुनेँ । त्यतिबेलासम्म पीएसओले वा अरु सुरक्षाकर्मीले कहीँ कतैबाट यो बाटो डिस्टर्ब छ । यो बाटोमा जानु हुँदैन । अथवा अर्को कुनै रुट प्रयोग गरौँ । भन्ने किसिमको जानकारी कहीँ कतैबाट आएन । यो जहाँबाट पनि पुष्टि हुन्छ ।

त्यहाँ डिस्टर्ब छ भन्दाभन्दै म मूर्खतापूर्वक त्यो बाटो त जाँदिनँ । बरु हामी त्यो बाटोमा प्रवेश गरिसकेपछि जो डिस्टर्बेन्स देखियो । त्यसपछि हामी सतर्क भयौँ र अब कसरी सुरक्षित हुने भन्ने किसिमले हामीले प्रयत्न गर्‍यौँ । प्रयत्न गर्दागर्दै हामी सफल भएनौँ, त्यो एउटा पाटो भयो । तर, अहिले मन्त्रीको गाडी आएकै कारणले यो घटना यसरी अगाडि बढ्यो भन्ने कुरा जुन भनिँदै छ, यो आफ्नो दोष अरुतिर पन्छाउने खालको प्रयत्न/कसरत हो भन्ने मलाई लाग्छ ।

त्यस कारण यो घटनाका बारेमा हामी दुःखी छौँ । घटना घट्यो । नघट्नुपर्ने थियो । दुई जना युवाहरूले ज्यान गुमाए । यो एउटा दुःखद पक्ष हो । तर, हाम्रो त कहीँ कतैबाट सम्बन्ध नै छैन यसमा । हामी सामान्य रूपमा त्यो बाटो प्रयोग गरेर मन्त्रालय आउन खोजेका हौँ । आउने क्रममा अवरोध भयो । अवरोध भएपछि म आफ्नो बैठकतिर फर्किएँ । त्यहाँ गाडीमा आगजनी भयो ।

हामी त पीडित पक्ष हौँ, साँच्चिकै भन्दाखेरी । मान्छेको ज्यान जानेभन्दा गाडी आगलागी हुने कुरा सानो कुरा होला । तर, हाम्रो मन्त्रालय त पीडित पक्ष हो । हामी बिनाकारण, निर्दोष हुँदाहुँदै, त्यसमा हाम्रो कुनै संलग्नता नहुँदानहुँदै, कुनै सम्बन्ध नहुँदानहुँदै हाम्रो त गाडी क्षति भएको छ । सरकारी सम्पत्ति क्षति भएको छ । त्यस कारण पीडित पक्षतिर नै फेरि यो घटनालाई पन्छाएर जो सुरक्षाकर्मीले कमजोरी गरेका छन् । चाहे सुरक्षासम्बन्धी सूचना दिने कुरा होला । चाहे गोली चलाउने अवस्था थियो कि थिएन त्यस्तो अवस्थामा गोली चलाइएको कुरा होला । यो तमाम कुरामा आफ्नो कमजोरी कतै ढाकछोप गर्नलाई फरक ढंगले अभिव्यक्ति आउन थाल्यो कि भन्ने कुरामा मलाई अनुभूति हुन थालेको छ ।

कतिले त त्यहाँ किन गएको मन्त्री भन्ने पनि प्रश्न गरेछन् । दुनियाँलाई थाहा छ, तीन दिनदेखि बैठक चलिरहेको छ । केन्द्रीय कमिटी बैठकमा त मन्त्री भएको केन्द्रीय सदस्य पनि जान्छ नि । बैठकमा दिनदिनै गएका छौँ हामी । दिनदिनै बैठकबाट मन्त्रालयमा काममा आएका छौँ । त्यस कारण आउने जाने त तीनदिनदेखि हाम्रो चलिरहेकै छ । यस्ता कुरामा जे सत्य र वास्तविक हो त्यही नै कुरा सबैले गर्नुपर्छ । हाम्रो तर्फबाट सत्य कुराहरू प्रस्ट पारिएको छ । हामी प्रस्ट पार्न तयार छौँ । जुनसुकै हिसाबले पनि यो कुरालाई सत्य सावित गर्न हामी सक्षम छौँ ।

प्रकाशित मिति: सोमबार, पुस १६, २०८० १५:४१

शिलापत्र संवाददाता

प्रतिक्रिया दिनुहोस्

भर्खरै

प्रजनन केन्द्रमा हुर्काइएका घडियाल राप्तीमा छाडियो

एकीकृत समाजवादीको सचिवालय बैठक आज पनि, यी विषयमा हुनेछ छलफल

वैवाहिक बलात्कारको आरोप लागेका गायक रवि ओड प्रहरी हिरासतमा

काठमाडौंको बत्तीसपुतलीमा २४ वर्षीय युवकको हत्या, चार जना पक्राउ

आज कोशी, मधेश, बागमती, गण्डकी र लुम्बिनी प्रदेशमा भारी वर्षा हुन सक्ने

लोकप्रिय

जसपा विभाजनसँगै वैकल्पिक गठबन्धनको च्याप्टर क्लोज, अब के गर्छ कांग्रेस ?

जसपा विभाजनले प्रचण्डलाई राहत, माधव नेपालकाे सपना चकनाचुर

कलंकीबाट हराएकी स्नेहा सात दिनपछि पशुपतिमा भेटिइन्

सन्दीप लामिछानेको मुद्दामा कसरी जोडिए पारस ? यस्ता छन् परिघटना

अमेरिका शयरमा रहेका उपेन्द्रलाई अशाेक राई र प्रदीप यादवकाे ‘सरप्राइज’, कसरी बन्यो पार्टी फुटाउने गोप्य डिजाइन ?

विचार

नगरवधू आम्रपाली कसरी भिक्षु भइन् ?

खुसीको कुरा, नेपालीको आयु बढ्यो तर हेरचाह गर्ने कसले ?

इलाम- २ को उपनिर्वाचनपछि रास्वपा नेतृत्वले बुझाेस्- सधैँसधैँ आँधीहुरी आउँदैन

ब्लग

गोसाइँकुण्ड यात्राले स्वस्थ छु, चुस्त छु भन्ने भ्रमबाट मुक्त गरायो

म गे हुँ भनेर थाहा पाउँदा आमालाई सुर्ता भयो, 'अब यसलाई समाजले कति दुःख देला नि'

'बोक्सीको घर' हेरेपछि निदाउनै सकिनँ

शिक्षा

युनिग्लोब स्कुल कमलादीले ५० भन्दा धेरै विद्यालयका शिक्षकलाई तालिम दिँदै

एनसीआईटी कलेजमा डिप लर्निङको विषयमा तीनदिने प्रशिक्षण, ४० जनाभन्दा बढी शिक्षकको सहभागिता

केयूकाे भाषा तथा आमसञ्चार विभागले अन्तर्राष्ट्रिय सङ्गोष्ठी गर्दै