बालकुमारी घटनाको अनुसन्धानका लागि पूर्वन्यायाधीशको नेतृत्वमा उच्चस्तरीय जाँचबुझ आयोग गठन हुने

बालकुमारी घटनाको अनुसन्धानका लागि पूर्वन्यायाधीशको नेतृत्वमा उच्चस्तरीय जाँचबुझ आयोग गठन हुने

A+ A A-

शुक्रबार ललितपुरको बालकुमारीमा प्रदर्शनका क्रममा भएको झडपमा परी दुई जनाको मृत्यु भएको सम्बन्धनमा पूर्वन्यायाधीशको नेतृत्वमा जाँचबुझ आयोग गठन हुने भएको छ ।

आइतबार प्रधानमन्त्री पुष्पकमल दाहाल प्रचण्डले उक्त घटनाको जाँचबुझका लागि पूर्वन्यायाधीशको अध्यक्षतामा उच्चस्तरीय आयोग गठन गर्ने प्रस्ताव ल्याउन उपप्रधानमन्त्री तथा गृहमन्त्री नारायणकाजी श्रेष्ठलाई निर्देशन दिएका छन् ।

'प्रधानमन्‍त्रीज्यूले मिति २०८०/९/१३ का दिन ललितपुरको बालकुमारीमा भएको घटनाका बारेमा जाँचबुझ गर्न जाँचबुझ आयोग ऐन २०२६ को दफा ३ को उपदफा (२) बमोजिम पूर्वन्यायाधीशको अध्यक्षतामा उच्‍चस्तरीय जाँचबुझ आयोग गठन गर्नेसम्बन्धी प्रस्ताव ल्याउन गृह मन्‍त्रालयलाई निर्देशन दिनुभएको छ,' प्रधानमन्त्रीका प्रेस सल्लाहकार गोविन्द आचार्यले जानकारी दिए ।

आचार्यका अनुसार सोमबार बस्ने मन्‍त्रिपरिषद्‍को बैठकले आयोग गठनको औपचारिक निर्णय गर्नेछ र आयोगले भोलिदेखि नै काम सुरु गर्नेछ ।

यसअघि सरकारले शुक्रबार नै उपत्यका प्रहरी कार्यालयका डीआईजी लालमणि आचार्यको संयोजकत्वमा तीन सदस्यीय समिति गठन गरेको छ । आचार्यको नेतृत्वमा गठित समितिमा ललितपुरका सहायक प्रमुख जिल्ला अधिकारी अमरदीप सुनुवार र राष्ट्रिय अनुसन्धान विभागका एसपी बासु सिग्देल सदस्य छन् ।

उक्त समितिलाई सात दिनभित्र बालकुमारी घटनाबारे छानबिन गरी प्रतिवेदन बुझाउन समयावधि दिइएको छ । तर, दुई आइतबार प्रधानमन्त्रीले पूर्वन्यायाधीशको नेतृत्वमा आयोग गठनको प्रस्ताव ल्याउन गृहमन्त्रीलाई निर्देशन दिएका हुन् ।

कोरिया जान रोजगार अनुमति प्रणाली (ईपीएस) परीक्षा दिन नपाएपछि बालकुमारीमा प्रदर्शनमा उत्रिएका युवाहरू र प्रहरीबीच झडपमा हुँदा २३ वर्षीय सुजन राउत र वीरेन्द्र शाहको मृत्यु भएको थियो । सुरुमा प्रदर्शनमा उत्रिएका युवाहरूले भौतिक पूर्वाधार तथा यातायातमन्त्री प्रकाश ज्वालाको गाडीमा आगजनी गरेका थिए । त्यसपछि स्थिति तनावग्रस्त बनेको हो ।

वैदेशिक रोजगारीमा जान चाहने दुई जना युवाको मृत्यु भएपछि सरकारको आलोचना भइरहेको छ । प्रहरी प्रशासनको लापर्वाहीका कारण युवाहरूले अनाहकमा ज्यान गुमाउनुपरेको भन्दै आलोचना भइरहँदा सरकारले जाँचबुझ आयोग गठन गर्न लागेको हो ।

प्रकाशित मिति: आइतबार, पुस १५, २०८० १६:१२