प्राधिकरणलाई कानुनसम्मत एक रूपैयाँ पनि तिर्न बाँकी छैनः पवन गोल्यान

A+ A A-

उद्योगी पवन गोल्यानले आफूले प्राधिकरणलाई कानुनसम्मत एक रूपैयाँ पनि तिर्न बाँकी नरहेको दाबी गरेका छन् ।

आइतबार डेडिकेटेड र ट्रंकलाइन लाइनका विषयमा जानकारी दिन व्यवसायीहरूले आयोजना गरेको पत्रकार सम्मेलनमा गोल्यानले विद्युत् प्राधिकरणले कानुनी प्रमाण देखाए बिल भुक्तानी गर्ने बताए ।

'रिलायन्स स्पिनिङ मिल्सको एक सुक्का पनि तिर्नुपर्ने भए रगत बगाउन तयार छु । प्राधिकरणले हावादारी रूपमा फर्जी बिल पठाएर हुँदैन,' गोल्यानले भने, 'डीओडी बिलको जिम्मेवार प्राधिकरणले लिनुपर्नेमा व्यवसायीहरूलाई भारी बोकाउन मिल्दैन ।’

सबैतिर रिलायन्स स्पिनिङ मिल्सले पनि १ अर्ब ९४ करोड तिर्न बाँकी रहेको भन्ने कुरा बाहिर आएको भन्दै मिल्सले विद्युत् महशुलको कुनै पनि रकम तिर्न बाँकी नरहेको गोल्यानको भनाइ छ । अन्य धागो उद्योग समस्यामा परेको कारण त्यसको सजायस्वरूप आफूलाई अतिरिक्त शुल्क दिन भनिएको उनको दाबी छ ।

अब उद्योगी व्यवसायीहरू मजदुरसहित सडक आन्दोलनमा आएर रगत बगाउनुपर्ने हो ? भन्दै गोल्यानले प्रश्न गरे । प्राधिकरणले उद्योगको नाम नै तोकेर कति घण्टा लोडसेडिङ हुन्छ भनेर तालिका निकालेको भन्दै लाइन दिएको भए यो तालिका किन निकालिएको थियो ? भन्दै प्रश्न गर्नुभयो ।

उद्योगहरूलाई विद्युत् दिने नियत कहिल्यै पनि नभएको गोल्यानको भनाइ छ । आफू कुनै पनि महिनाको विद्युत् महशुल बाँकी नराख्ने ग्राहक रहेको उनको दाबी छ । 'अब उद्योगी व्यवसायीहरू मजदुरसहित सडक आन्दोलनमा आएर रगत बगाउनुपर्ने हो ? यही मात्रै बाँकी छ अन्य केही कुरा बाँकी छैन,' गोल्यानले भने, 'डेडिकेटेड र ट्रंक लाइनको महशुलको विषयमा समयमा समाधान भएन भनेर ४ अर्बबाट २२ अर्ब देखाएर जनतालाई भ्रमित बनाउने काम कहाँसम्म ठीक हो ।'

उद्योगको लाइन काटेर दुई लाख श्रमिकको जागिर खोसेर राज्यले लगानी सम्मेलन गर्नु जायज नहुने गोल्यानको तर्क छ । सरकारले भएका उद्योगहरू सबै बन्द गराउने काम गरिरहेको उनले बताए ।

'उद्योगको लाइन काट्ने उद्योगमा प्रत्यक्ष र अप्रत्यक्ष गरेर २ लाख मानिसहरूको जीवनको कुरा छ । दुई लाखले जागिर गुमाउँदा लगानी सम्मेलन केको लागि हो ? सरकारले भएका उद्योगहरू सबै बन्द गराउने काम गरेको छ,' गोल्यानले भने ।

प्रकाशित मिति: आइतबार, पुस १५, २०८० १५:३१