बैठकमा गगनले देउवालाई भने– गठबन्धनमा भएका निर्णयको भारी निर्णय गर्ने एक्लैले बोक्नुपर्छ

बैठकमा गगनले देउवालाई भने– गठबन्धनमा भएका निर्णयको भारी निर्णय गर्ने एक्लैले बोक्नुपर्छ

A+ A A-

नेपाली कांग्रेसको जारी केन्द्रीय कार्यसमिति बैठकमा महामन्त्री गगन थापाले सत्ता गठबन्धनमा भएका निर्णयहरूको भारी पार्टीले बोक्न नसक्ने बताएका छन् ।

उनले पार्टीमा छलफल नगरी सिधै गठबन्धनमा गएर पार्टीको धारणा भन्दै गरिएका निर्णयको भारी बोक्न नसक्ने स्पस्ट भनाइ राखेको एक नेताले जानकारी दिए । बैठकमा थापाले भने, ‘गठबन्धन बैठक भन्ने अनि पार्टीभित्र सरसल्लाह सम्बाद समझदारी नगरी पार्टीको धारणा भनेर निर्णय गर्ने, त्यस्तो निर्णयको भारी निर्णय गर्ने एक्लैले बोक्नुपर्छ ।’

सत्ता गठबन्धनको बैठकमा सभापति शेरबहादुर देउवा सहभागी हुन्छन् । तर ती विषयमा पार्टीभित्र छलफल गर्दैनन् । यही विषयसँग महामन्त्री थापाले असहमति राखेका हुन् ।

बैठकमा महामन्त्री थापाले सरकारमा गएका मन्त्रीहरूको पनि आलोचना गरेका छन् । उनले आठ महिनासम्म के काम गरियो भन्दै सूची दिन भनेका थिए । थापाले भनेका थिए, ‘सरकारमा कांग्रेसस सहभागी भएको ८ महिना भयो, कांग्रेसका प्रत्येक मन्त्रीले ८ महिनामा गरेको यस्तो ८ वटा कामको सूची दिनुस् जसको कारणले नागरिकको जीवनमा सकारात्मक परिवर्तन आयो र ती काम तपाईं नभएको भए हुँदैन थियो ।’

थापाले अब एक वर्ष सरकारमा बसेर के गर्ने भन्ने विषयमा पनि लक्ष्य निर्धारण गर्नुपर्ने बताएका छन् । लक्ष्य पूरा हुन नसक्ने देखिए मन्त्री पनि फेर्नुपर्ने बताए । उनले भने, ‘अब एक वर्षमा सरकारमा बसेर के गर्ने भन्ने लक्ष्य निर्धारण गरौं । त्यो लक्ष्य पूरा गर्न भनेजस्तो काम गरेनन् भने मन्त्री फेरौँ । अरु सबै दलसँग समय पनि छ, सुबिधा पनि छ अहिले भएन हामी आउँछौं र ठीक बनाउछौँ भन्ने तर हामीले त्यो भन्न पाउदैनौँ ।’

उनले अरुले मिसन ८४ भन्न पाउने तर कांग्रेसले भन्न नपाउने बताए । उनले भने, ‘हामी छलफल गरौं र नीति अधिवेशनबाट मिसन गुणस्तरीय शिक्षा
मिसन सर्भसुलव स्वास्थ्य, मिसन मर्यादित रोजगारी तय गरौं । अनि यी ४ वर्षमा यी कुरा पूरा गरौं । यसको आधारमा बल्ल जनतासामु जान पाइन्छ।’

प्रकाशित मिति: शनिबार, पुस १४, २०८० २०:५८