फेरि बयान फेर्दै पीडित महिलाले दिइन् महराविरुद्ध प्रहरीमा जाहेरी

A+ A A-

यौन दुर्व्यवहार गरेको अभियोग लागेपछि सभामुख पदबाट राजीनामा दिएर बसेका नेकपा नेता कृष्णबहादुर महराविरुद्ध जबर्जस्ती करणी अभियोगमा प्रहरीमा जाहेरी पुगेको छ । नयाँ बनेश्वर प्रहरी कार्यालयमा पीडित भनिएकी महिलाले महराविरुद्ध उजुरी दिएको प्रहरी स्राेतले जानकारी दियो ।

यसअघि महराबाट आफू यौन दुर्व्यवहारमा नपरेको बताएकी ती महिलाले किन फेरि महारविरुद्ध जाहेरी दर्ता गराइन् भन्ने विषय भने थप शंकास्पद बनेको छ । जाहेरी परेलगत्तै प्रहरीले महरालाई पक्राउ गरी अनुसन्धान थाल्न सक्ने ती प्रहरी अधिकारी बताउँछन् ।

महराविरुद्ध प्रहरीले जिल्ला अदालतमा मुद्दा दायर गरेको अवस्थामा उनको बचेको सांसद पदसमेत स्वतः निलम्बनमा पर्नेछ ।

महराले दुर्व्यवहार गरेको भनिएकी महिलाले निरन्तर कुरा फेरिरहने भएका कारण प्रहरीले अनुसन्धान प्रक्रिया अघि नबढेसम्म जाहेरी गोप्य राख्न चाहेको बताएको छ ।

यसअघि १३ असोजमा ती महिलाले आफूमाथि हिंसा भएको दाबी गर्दै विभिन्न सञ्चारमाध्यममा बयान दिएकी थिइन् । आइतबार राति पानै ९ बजे सुविधानगरमा भएको भनिएको घटनापछि प्रहरीसमेत उनको घरमा पुगेको थियो ।

महराको राजीनामा आएसँगै उनले बयान फेरेकी थिइन् । श्रीमान्सँग छलफलपछि मात्र के गर्ने भन्ने निष्कर्षमा पुग्ने बताएकी उनले स्वास्थ्य परीक्षण गर्न पनि मानेकी थिइनन् ।

पछिल्लो समय ‘आफू डिप्रेसनको शिकार भएको र के बोलें भन्ने नै थाहा नभएको’ भन्दै निवेदनसमेत दिएकी थिइन् । यद्यपि, चर्को दबाबपछि प्रहरीले घटनास्थलबाट रक्सीका बोतल, फुटेका चस्मालगायतका सामग्री बरामद गरेको थियो ।

जोहरी परेसँगै प्रहरीले अनुसन्धानमा पुनः तादरुकता देखाएको छ । काठमाडौं प्रहरी प्रमुख एसएसपी उत्तमराज सुवेदीले शिलापत्रसँग भने, ‘हामीले अहिले विस्तृत अनुसन्धान गरिरहेका छौं ।’ अब महरालाई प्रहरीले पक्राउ गर्ने सम्भावनासमेत छ ।

प्रकाशित मिति: शनिबार, असोज १८, २०७६ १३:४३