मन्त्रीलाई गिज्याउने दृश्य : खाली चौरअघि भाषण, अगाडि फोटो खिच्ने श्रीमान् मात्र !

मन्त्रीलाई गिज्याउने दृश्य : खाली चौरअघि भाषण, अगाडि फोटो खिच्ने श्रीमान् मात्र !

A+ A A-

पोखरामा शुक्रबार कास्की जिल्लास्तरीय राष्ट्रपति रनिङ शिल्ड २०८० सुरु भएको छ । यो कार्यक्रमको उद्घाटन सत्रको एउटा दृश्य यति हास्यास्पद थियो जसले भाषण सुनेर बस्न कति अधैर्य छन् भन्ने प्रष्ट देखाउँथ्यो । त्यति मात्र होइन, प्रदेशका मन्त्रीको भाषण सुन्न कत्ति पनि चासो नरहेको कार्यक्रम स्थलमा देखिन्थ्यो ।

कास्की जिल्लास्तरीय राष्ट्रपति रनिङ शिल्डको प्रमुख अतिथि गण्डकी प्रदेशकी सामाजिक विकास तथा स्वास्थ्यमन्त्री सुशीला सिम्खडा थिइन् । उद्घाटन समारोह पोखरा रंगशालाको फुटबल खेल मैदानमा भएको थियो ।

अचम्म के भने मन्त्री सिम्खडा बोल्दा औंलाले गन्न सकिने मान्छे मात्र कार्यक्रम स्थलमा थिए । मन्त्री सिम्खडा बोल्दा चार जना पत्रकार थिए । अगाडि चौर पूरै खाली थियो । चौरको एउटा कुनामा ११ जना थिए । उनीहरू मन्त्रीको भाषण नसुनी आफैं गफगाफमा व्यस्त थिए । त्यसरी बस्नेहरू रेफ्री हुन् । त्यसमा तीन जना भने खेलाडी थिए ।

मन्त्री सिम्खडाले खेलाडीमा अनुशासन हुनुपर्ने र यसलाई जीवनको अंग बनाउनुपर्ने बताइरहँदा अगाडिपट्टि सुन्ने खेलाडी कोही थिएनन् । ‘खेल क्षेत्र कहिले पनि हरेश नखाने क्षेत्र हो । तपाईंहरू यो हिमाल र देश चिनाउने कर्णधार हो । त्यसैले पनि अनुशासन आवश्यक छ । त्यो अनुशासन न अरु कसैलाई दिन सक्नुहुन्छ न अरु कोहीसँग माग्न सक्नुहुन्छ,’ उनले खाली चौरअगाडि उभिएर भनिरहेकी थिइन्, ‘यो प्रतियोगिताबाट पक्कै पनि यहाँहरूले जीवन मार्ग बनाउने अनुशासन सिकेर फर्किनुहुनेछ ।’

मन्त्री सिम्खडा बोल्दा चौरमा खेलाडी थिएनन् । तर, उनले खेलाडीलाई हौसला भर्ने खालको भाषण दिइरहेकी थिइन् । अर्को कुरा, मन्त्रीको यो भाषण अन्तिमसम्म खिच्ने स्वकीय सचिवसमेत रहेका उनका श्रीमान् जनक बिसीमात्र थिए ।

जिल्ला खेलकुद विकास समितिका एक पदाधिकारीका अनुसार मन्त्री बोल्नेबेला चौरमा बसेका विद्यार्थी खाना खान गइँदिँदा चौर खाली भएको हो ।

प्रतियोगिताको सुरुमा मार्च पास भएको थियो । त्यसमा सहभागी पोखरा महानगरपालिका र चार गाउँपालिकाका खेलाडी फुटबल मैदानमा बसेका थिए । कार्यक्रम उद्घाटनपछि खेलाडी कोही खाना खान, कोही आफूले खेल्ने खेल हुने ठाउँतिर गए । त्यसले गर्दा मन्त्री सिम्खडाले मन्तव्य दिनेबेला चौर खाली भएको हो ।