राष्ट्रियसभा चुनाव : मधेशमा कांग्रेसभित्र किचलो, अन्य दल केन्द्रको निर्देशनको पर्खाइमा

राष्ट्रियसभा चुनाव : मधेशमा कांग्रेसभित्र किचलो, अन्य दल केन्द्रको निर्देशनको पर्खाइमा

A+ A A-

राष्ट्रियसभा सदस्यको निर्वाचनको मिति नजिकिएसँगै विभिन्न राजनीतिक दलहरूका जिल्लादेखि प्रदेश समितिसम्मले आन्तरिक रूपमा उम्मेदवारको नाम टुंगो लगाउन गृहकार्य थालेका छन् । आउँदो ११ माघमा हुने उक्त निर्वाचनलाई मध्यनजर गरी सत्तारुढ गठबन्धनदेखि विपक्षी दलहरूमा समेत आन्तरिक छलफल सुरु भएको छ । तर, आकांक्षी उम्मेदवारको संख्या उच्च रहेकाले सत्तारुढ गठबन्धन र विपक्षी दलहरूलाई उम्मेदवारको नाम टुंगो लगाउन सकस देखिएको छ ।

मधेशमा आरक्षित सिटमा निर्वाचन हुने भएपछि प्रादेशिक समितिका दलहरू भने आफूलाई खल्लो महसुस गरेका छन् । सत्तारुढ नेपाली कांग्रेसको जिल्ला समितिबाट धमाधम राष्ट्रियसभा सदस्यका लागि नामहरू सिफारिस गर्ने अभियान नै चलेको छ भने विवादहरू पनि सतहमा आउन थालेका छन् ।

१० पुसमा नेपाली कांग्रेस जिल्ला कार्यसमिति धनुषाले पूर्वजिल्ला सभापति महेशशंकर गिरी, राजकिशोर सिंह, रामपल्टन साह, तुल्सा आचार्य, वासुलाल महतो र अनिता श्रीवास्तवको नाम प्रदेश समितिमा सिफारिस गरेको थियो । त्यसको भोलिपल्टै ११ पुसमा धनुषा क्षेत्र नं. ४ क्षेत्रीय सभापति कुमारकान्त झाले १० जनाको नाम सिफारिस गरे ।

आनन्दप्रसाद ढुङ्गाना, स्मृतिनारायण चौधरी, शिवधारी यादव, वासुलाल महतो, राजकुमार महतो, राजकिशोर सिंह, बजरंग साह, तुल्सा आचार्य, रामबाबु यादव र रामवरण पासवानको नाम क्षेत्रीय समितिले सिफारिस गरेको छ । यसरी राष्ट्रियसभा सदस्यको निर्वाचनको उम्मेदवार छनोटमा कांग्रेसभित्र किचलो सुरु भएको छ ।

कांग्रेस राष्ट्रियसभा सदस्यको निर्वाचनका लागि जिल्लाहरूबाट नाम सिफारिस भइरहेका छन् भने नेकपा एमाले, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी नेपाल, जनमत पार्टी, लोकतान्त्रिक समाजवादी पार्टी नेपाललगायतका दलहरू भने केन्द्रीय समितिको निर्देशनको प्रतीक्षामा छन् ।

एकातिर राष्ट्रियसभाको निर्वाचनका लागि गठबन्धनको तयारी भइरहेको छ भने अर्कोतर्फ नेताहरूले आफ्नै दलभित्र समीकरण मिलाउन तथा आफ्नो पक्षमा लबिङका लागि दौडधुप बढाएका छन् ।

कांग्रेस मधेश प्रदेशका सभापति तथा मधेश प्रदेशका भौतिक पूर्वाधार विकासमन्त्री कृष्णकुमार यादवले जिल्ला–जिल्लाबाट आकांक्षी उम्मेदवारहरूको नाम आउने क्रम जारी रहेको बताए । 'प्रदेशका आठवटै जिल्लाबाट उम्मेदवारहरूको नाम आउँदै छन्,' सभापति यादवले भने, ‘सबै जिल्लाबाट नाम आइसकेपछि प्रदेश समितिको बैठकले उम्मेदवारको नाम टुंगो लगाई यही साताभित्र केन्द्रीय समितिलाई सिफारिस गर्छौं ।’

त्यस्तै, नेकपा एमाले मधेश प्रदेशका अध्यक्ष चन्देश्वर मण्डलले यसपटक गठबन्धन हुने सम्भावना कम रहेको बताउँदै आफूहरूले पनि उम्मेदवारको नाम टुंगो लगाएर सिफारिस गर्ने तयारी गरिरहेको बताए । पार्टीको केन्द्रीय समितिले अहिलेसम्म सो विषयमा कुनै परिपत्र नगरेको उल्लेख गर्दै उनले भने, ‘परिपत्र आएलगतै प्रदेश समितिको बैठक गरेर नाम टुंगो लगाएर पठाउनेछौँ ।’

त्यसैगरी, जनता समाजवादी पार्टी (जसपा) नेपाल मधेश प्रदेशका अध्यक्ष रामबाबु यादवले राष्ट्रियसभा सदस्यका लागि केन्द्रमा गठबन्धन हुने सम्भावना रहेकाले अहिले नै नाम टुंगो लगाउन बाँकी रहेको बताए । उनले मधेश प्रदेशमा एक जना महिला र एक जना अन्य पद रिक्तको निर्वाचन हुने भएकाले केन्द्रीय समितिले माग गरेपछि नाम टुंगो गरी पठाइने बताए । राष्ट्रियसभा सदस्यका लागि आफू पनि आकांक्षी उम्मेदवार रहेको उनले बताए ।

त्यस्तै, माओवादीले पनि मधेश प्रदेशका इन्चार्ज लीलामणि पोखरेललाई राष्ट्रियसभा सदस्यको उम्मेदवारका लागि नाम टुंगो लगाउने जिम्मेवारी दिइएको छ । तर, प्रदेश इन्चार्ज पोखरेलले अहिलेसम्म नाम सिफारिस नगरेको बताउँदै उनले यसै सातामा नाम टुंगो लगाएर केन्द्रीय समितिमा आकांक्षी उम्मेदवारको नाम सिफारिस गरिने बताए ।

जनमत पार्टी, नेकपा एकीकृत समाजवादी र लोसपा नेपालसमेत राष्ट्रियसभा सदस्य निर्वाचनको आन्तरिक तयारीमा लागे पनि गठबन्धनको खोजीमा छ । जनमत पार्टीका एक नेताका अनुसार गठबन्धनको बैठकबाट सहमति भएपछि नाम टुंगो लगाउने तयारीमा रहेको बताए । उनले अहिलेसम्म गठबन्धनमा सहमति हुन बाँकी रहेको बताए ।

नेपालको संविधानमा राष्ट्रियसभाका एकतिहाइ सदस्यको पदावधि २०८० फागुन २० गते समाप्त हुँदै छ । राष्ट्रियसभा सदस्य निर्वाचन ऐन, २०७५ बमोजिम पद रिक्त हुनुभन्दा ३५ दिनपहिले निर्वाचन गरिसक्नुपर्ने कानुनी व्यवस्था छ । आगामी फागुन २० गते निर्वाचित १९ जना र संघीय सरकारबाट मनोनीत एक जना गरी २० जना सदस्यको पद रिक्त हुँदै छ । राष्ट्रियसभामा प्रत्येक दुई वर्षमा रिक्त हुने एकतिहाइ सदस्य पदको निर्वाचनका लागि आउँदो ११ माघको मिति तोकिएको छ ।

प्रकाशित मिति: शुक्रबार, पुस १३, २०८० १९:५४