पूर्वडीआईजी शाह भ्रष्टाचारी ठहर भएको तलब भत्ता काण्ड के हो ?

A+ A A-

नेपाल प्रहरीका पूर्वडीआईजी महेशविक्रम शाह भ्रष्टाचारी ठहर भएका छन् । अख्तियार दुरुपयोग अनुसन्धान आयोगले दायर गरेको मुद्दामा विशेष अदालत काठमाडौंले उनलाई भ्रष्टाचारी ठहर गरेको छ । तीन वर्षभन्दा धेरै सजाय हुने भएकाले सजाय निर्धाण गर्न २५ पुसका लागि पेसी तोकिएको छ ।

शाहलगायत चार जनाविरुद्ध अख्तियारले २०७६ फागुन २० मा विशेष अदालतमा मुद्दा दायर गरेको थियो । पूर्वडीआईजी शाह, लेखापाल प्रहरी निरीक्षक दिपेन्द्र प्रसाद पनेरु, लेखा सहायक प्रहरी हवल्दार केशव सिंह ऐरी र कोष तथा लेखा नियन्त्रक कार्यालय सिन्धुलीका तत्कालीन लेखापाल सञ्जीव विशंखेविरुद्ध भ्रष्टाचार मुद्दा दायर भएकोमा विशेष अदालतले बुधबार शाह र पनेरुलाई दोषी ठहर गरेको छ भने अरु दुई जनालाई सफाइ दिएको छ ।

पूर्वडीआईजी शाह र इन्स्पेक्टर पनेरुलाई भ्रष्टाचारी ठहर गरिएको काण्ड प्रहरी जवानमा भर्ना भएका कर्मचारीको तलब भत्ता हिनामिना गरेको प्रकरण हो ।

तत्कालीन मध्य क्षेत्रीय प्रहरी तालिम केन्द्र भरतपुर चितवनमा २७ वैशाख २०७२ मा प्रहरी जवान पदमा भर्ना भएका कर्मचारीहरू तालिम समापन भएर अन्यत्र सरुवा भइसकेको अवस्थामा पनि तलब भत्ताबापतको रकम निकालेर हिनामिना गरिएको आरोपमा उनीहरू दोषी ठहर भएका हुन् ।

अख्तियारले यो काण्डको अनुसन्धान गर्ने क्रममा आर्थिक वर्ष २०७२–०७३ मा मध्य क्षेत्रीय प्रहरी तालिम केन्द्र, दुधौली सिन्धुलीको प्रमुखका रूपमा कार्यरत रहेका शाह, लेखापाल इन्स्पेक्टर पनेरु १ सय ३ जना प्रहरी जवानहरूको २०७२ माघ र फागुन महिनाको तलब तथा भत्ताबापत हुन आउने रकम ३१ लाख ८८ हजार ४ सय ६८ रुपैयाँ निकालेर खाएको खुलेको थियो ।

यति मात्र होइन, प्रहरी प्रधान कार्यालयको कर्मचारी प्रशासन शाखाको १८ माघ २०७२ को पत्रले २०७२ साल माघ १ गतेबाट नै तलब भत्ता खान पाउने गरी १ सय ४२ जना नयाँ प्रशिक्षार्थी प्रहरी जवानहरूको नयाँ नियुक्ति भएकोमा २ दिनको बढी तलब १ लाख ४९ हजार ६ सय १६ रुपैयाँ समेत निकालेर हिनामिना गरेको देखिएको अख्तियारको अनुसन्धानले देखाएको थियो ।

अख्तियारले प्रहरीका पूर्वडीआईजी शाहसति तत्कालीन इन्स्पेक्टर पनेरुविरुद्ध जनही ३३ लाख ३८ हजार ८४ रुपैयाँ बिगो कायम गर्दै ६ वर्षसम्म कैद सजाय मागदाबी गरेको छ । विशेषले दोषी ठहर गरे पनि सजाय निर्धारण नगरेकाले उनीहरूमाथि कति सजाय हुन्छ २५ पुसपछि मात्र थाहा हुनेछ ।

यसैबीच, भ्रष्टाचारी ठहर भएपछि शाहले सामाजिक सञ्चालमा यो विषयमा प्रतिक्रिया दिएका छन् । उनले लेखेका छन्, ‘मेरा आदरणीय मान्यजन, अग्रज, मित्रगण, दाजुभाइ तथा दिदीबहिनीहरू, यहाँहरूले यस सङ्कटपूर्ण घडीमा मप्रति देखाउनुभएको माया, विश्वास, चासो र चिन्ताप्रति हार्दिक आभार व्यक्त गर्दै यससम्बन्धी यथार्थ विवरण अनुकूल समयमा सार्वजनिक गर्ने प्रतिबद्धता व्यक्त गर्दछु । जय होस् ।’