समाजवादी मोर्चाको बैठकमा नेताहरूले उठाए विदेशी शक्तिको चलखेलको कुरा

A+ A A-

बुधबार प्रधानमन्त्री निवास बालुवाटारमा समाजवादी मोर्चाको बैठक बस्यो । बैठकमा नेताहरूले देशमा देखिने गरेका विभिन्न खालका आन्दोलन, असन्तुष्टिमा अन्तर्राष्ट्रिय चलखेल रहेको भन्दै चिन्ता व्यक्त गरेका थिए । त्यसमा प्रधानमन्त्री पुष्पकमल दाहाल प्रचण्डले पनि चासो राखेका थिए ।

मोर्चाका शीर्ष नेताहरूको बैठकमा नेताहरूले देशमा भइरहेका परिवर्तनविरोधी गतिविधिमा बाह्य रूपबाट पनि चलखेल हुन थालेको धारणा राखेको नेत्रविक्रम चन्द विप्लव नेतृत्वको नेकपाका प्रवक्ता खड्गबहादुर विश्वकर्माले बताए । ‘बैठकमा यसका बारेमा बढी चर्चा भएको हो । नेताहरूले आ–आफ्ना धारणा राख्ने क्रममा परिवर्तनविरोधीहरूले परिवर्तन उल्टाउने कुरा भइरहेका छन् । यसलाई बचाउन सबै एक जुट हुनुपर्छ । परिवर्तन मास्ने हर्कत देखिएका छन् । यसमा साम्राज्यवादीहरूको पनि इन्ट्रेस्ट जोडिएको छ भन्ने थियो,’ उनले भने ।

प्रधानमन्त्रीले परिवर्तन उल्टाउन खोज्नेहरू सलबलाएको धारणा राखेको बैठकमा सहभागी राजेन्द्र श्रेष्ठले बताए । ‘बैठकमा विचारहरू आउने भइहाल्यो । अलिकति परिवर्तनविरोधीहरूले व्यवस्थामाथि प्रश्न उठाएको भन्ने कुरा भएको हो,' श्रेष्ठले भने, 'संघीयता गणतन्त्र धर्म निरपेक्षतालाई बलियो बनाएर लैजाने भन्ने भएको हो ।’

संविधानविरोधी तथा पूर्वराजावादीहरूले नेपालमा राजतन्त्र पुनर्स्थापना हुनुपर्छ भन्दै आन्दोलन गरेको र त्यसमा अरुले पनि मलजल गर्न थालेको कुरा बैठकमा उठेको विश्वकर्माले जानकारी दिए । 'यो संविधानको विरोध गर्ने, पूर्वराजावादीहरू राजसंस्था पुनर्स्थापना हुनुपर्छ भन्ने माग राख्दै आएका छन् । अर्कोतर्फ हिन्दु राष्ट्र हुनुपर्छ भन्नेहरूले पनि आन्दोलन गर्दै आएका छन्,' उनले भने, 'यी आन्दोलनलाई मलजल हुने गरी बाहिरबाट पनि परिवर्तनविरोधीहरूले होस्टेमा हैँसे गर्ने काम भइरहेको धारण नेताहरूले राख्नुभयो ।'

बैठकमा गोरु काटेको विषयले धरानमा भएको तनाव, धरानमै मन्दिरअगाडि चर्च बनाएको विषयले निषेधाज्ञासम्मको अवस्था सिर्जना भएको थियो । त्यस्तै, असोजमा सर्लाहीको सदरमुकाम मलंगवामा कृष्ण जन्माष्टमीको मूर्ति विसर्जनका क्रममा विवादले उग्र रूप लिँदा निषेधाज्ञा लगाउनुपरेको विषयमा पनि नेताहरूले चर्चा गरेका थिए । त्यस्तै १४ असोजमा सामाजिक सञ्जालमा मुस्लिम समुदायलाई लक्षित गरी स्टाटस लेखेको विषयले उग्र रूप लिएको थियो । १६ असोजमा ओमकार परिवार हिन्दु समाजले निकालेको र्‍यालीको क्रममा विवाद हुँदा स्थिति तनावग्रस्त बनेको थियो । त्यसबेला पनि नेपालगञ्जमा निषेधाज्ञा जारी भएको विषयमा पनि नेताहरूले चर्चा गरेका थिए ।

पछिल्लो समय देशका विभिन्न स्थानमा यस्ता गतिविधिहरू हुनुमा अहिलेको व्यवस्थाको पक्षमा नरहेकाहरूका कारण रहेको मोर्चासहित अहिलेको व्यवस्थाको पक्षमा रहेका दलहरूको बुझाइ छ । विश्वकर्मा भने आन्तरिक समस्या, परिवर्तन विरोधीको गतिविधिलाई बाहिरी पक्षले आफ्नो स्वार्थ पूरा गर्न प्रयोग गर्न सक्ने बताउँछन् ।

‘समस्याका बारेमा कुरा भएको हो । राष्ट्रिय रूपमा अवस्था जटिल छ । पुनरुत्थानवादीहरू सलबलाउन थालेको, प्रतिक्रियावादीहरूले षडयन्त्र गरेको र यसैमा अन्तर्राष्ट्रिय इन्ट्रेस्ट जोडिएर आउने भन्ने कुरा भएको हो । प्रधानमन्त्रीले प्रधानमन्त्रीको तहबाट बोल्ने कुरा भयो । अन्य नेताहरूको कुरामा तादात्म्यता थियो,’ उनले भने ।

माओवादी केन्द्रका महासचिव देव गुरुङ भने राष्ट्रिय र अन्तर्राष्ट्रिय गतिविधिको विषयले मोर्चाको बैठकमा प्रवेश पाएको बताउँछन् । ‘वैचारिक धारको प्रसंगमा कुरा हुनु स्वाभाविक हो । प्रतिगम र पश्चगमनको व्याख्या गर्ने क्रममा राष्ट्रिय अन्तर्राष्ट्रिय प्रतिगामी शक्तिहरूको प्रसंग, गतिविधिका बारेमा प्रसंग उठेको हो । समाजवादी मोर्चाको एजेन्डा होइन । हाम्रो देशभित्रका सानासाना असन्तुष्टिमा खेल्न खोजे भन्ने हो,’ उनले भने ।

प्रकाशित मिति: बिहीबार, पुस १२, २०८० २०:०९