नेपाल रेलवेको तेस्रो चरणको काम तीव्र गतिमा हुँदै

फाइल तस्वीर

A+ A A-

महोत्तरीको भंगहादेखि बर्दिवाससम्म १७ किलो मिटर रेलवे ट्र्याक निर्माणका लागि लोकेसनअनुसारको सर्वेको काम धमाधम भइरहेको छ । मुआब्जा वितरणमा ढिलाइ भएको कारण सर्वे काममा ढिलाइ हुन पुगेको थियाे । अहिले नेपाल र भारतीय प्राविधिक टोलीले संयुक्त रुपमा सर्वेको कामलाई गति दिएकाे हाे । भारत सरकारको आर्थिक तथा प्राविधिक सहयोगमा भारतको जयनगरदेखि महोत्तरीको बर्दिवाससम्म ६९ किलोमिटर रेलवे ट्र्याक निर्माण गर्ने विषयमा सन् २०१० मा दुई देशबीच सहमति भएको थियो ।

पहिलो चरणमा जयनगरदेखि कुर्थासम्म ३५ किलो मिटर, दोस्रो चरणमा कुर्थादेखि महोत्तरीको भंगहासम्म १७ किलो मिटर रेलवे ट्र्याक निर्माण भइसकेको छ । अहिले जयनगरदेखि भंगहासम्म ५२ किलोमिटर ट्र्याकमा नेपाल सरकारले आफैँले खरिद गरेको रेल संचालन भइरहेको छ ।

तेस्रो चरणअन्तर्गत भंगहादेखि बर्दिवाससम्मको ट्र्याक निर्माणका लागि अहिले दुई देशको प्राविधिक टोलीले सर्वे गरिरहेको रेलवे विभाग साइड कार्यालय जनकपुरधामका इन्जिनियर बिनोद ओझाले जानकारी दिए । सो ट्र्याक निर्माणका लागि नेपाल सरकारले भारतीय पक्षलाई जग्गा उपलब्ध गराइसकेको छ ।

भंगहादेखि बर्दिवाससम्म १७ किलोमिटर लामो ट्र्याक निर्माणका लागि नेपाल सरकारले १ सय २३ विघा जग्गा अधिग्रहण गरेको छ । १२३ विघा जग्गाको झण्डै १ हजार कित्ता जग्गा अधिग्रहण गरिएको इन्जिनियर ओझाले बताए । अधिग्रहण गरिएको जग्गामध्ये ८० प्रतिशतभन्दा जग्गाको झण्डै २ अर्ब ३० करोड रकम मुअब्जा वापत किसानहरुलाई वितरण गरिसकेको उनले बताए । ट्र्याक निर्माण गर्ने जग्गामा परेको भौतिक संरचना घर, पसल तथा रुखहरुको क्षतिपूर्तिको विवरण अहिले संकलनको कार्य भइरहेको उनले बताए । सर्वेको काम सम्पन्न पश्चात भारतीय पक्षले निर्माण कार्य थाल्ने उनले बताए ।

निर्माण कार्य सुरु भएदेखि तीन वर्षभित्रमा ट्र्याक निर्माणको काम पूरा हुने भारतीय पक्षले जनाएको छ । निर्माण भारत सरकारको स्वामित्वको भारतीय रेल कम्पनी इरकोनले गरिरहेको छ । उक्त ट्र्याक निर्माणको क्रममा महोत्तरीको रातु नदी र बरहडी खोलमा ठूला पुल र दर्जनभन्दा बढी साना पुल निर्माण गर्नुपर्ने हुन्छ । ती पुलहरु पनि भारतीय पक्षले निर्माण गर्ने उनले बताए । त्यस्तै, भंगहादेखि बर्दिवाससम्म विभिन्न स्थानमा स्टेसन र हल्ट निर्माण गर्नुपर्ने हुन्छ । उक्त स्टेसन र हल्ट निर्माण पनि भारतीय पक्षले नै गर्नेछ । तर अहिलेसम्म भंगहादेखि बर्दिवाससम्म कति वटा स्टेसन र कति वटा हल्ट निर्माण हुने अहिले यकिन हुन सकेको छैन ।