अपत्यारिलो घुस हिसाबको डायरी : रजिष्ट्रारलाई एक करोड, बैंक म्यानेजरलाई ५० लाख

अपत्यारिलो घुस हिसाबको डायरी : रजिष्ट्रारलाई एक करोड, बैंक म्यानेजरलाई ५० लाख

A+ A A-

पोखराको मित्रमिलन बचत तथा ऋण सहकारी संस्था लिमिटेडका अध्यक्ष रमण पौडेल र प्रमुख कार्यकारी अधिकृत किरण अधिकारी अहिले कास्की कारागारमा छन् । बैंकिङ कसुरमा कारागार चलान भएका दुवैमाथि सहकारीको रकम हिनामिनाको आरोप पनि छ ।

सहकारी रजिष्ट्रारको कार्यालय पोखराको अनुसन्धानअनुसार २६ करोड ८४ लाख रूपैयाँ हिनामिना भएको देखिएको छ । मित्रमिलन सहकारीसँग घुस लिएको आरोपमा बुधबार पर्वतबाट कुश्मा नगरपालिकाका प्रमुख प्रशासकीय अधिकृत उदयबहादुर पराजुली पक्राउ परेका छन् । उनीविरुद्ध गत ५ पुसमा जिल्ला अदालत कास्कीबाट पक्राउ पुर्जी जारी भएको थियो ।

उनले प्रदेशभर कार्यक्षेत्र बनाइदिने भन्दै एक करोड २५ लाख रूपैयाँ घुस लिएको अध्यक्ष पौडेल र प्रमुख कार्यकारी अधिकृत अधिकारीले बयान दिएका थिए । बचतकर्ताको ठूलो रकम घुस खुवाउनुपरेकाले तरलता अभाव भएको रमणको भनाइ छ । कास्की प्रहरी स्रोतका अनुसार २० लाख रूपैयाँ पराजुलीले फिर्ता दिएको बयान अध्यक्ष पौडेलले प्रहरीलाई दिएका छन् । यो तीन वर्षअघिको घटना हो । किनकि दुई वर्ष पोखरामा रजिष्ट्रार रहेका पराजुली गत वर्ष सरूवा भएका थिए ।

अध्यक्ष पौडेल सहकारी डुबेपछि गत वर्ष नै भारत भागेका थिए । त्यतिबेला भाग्ने क्रममा उनले एउटा डायरी लेखेका थिए जसमा पराजुलीलाई घुस दिएको विषय उल्लेख छ । ‘सहकारीको प्रदेशभर सेवा केन्द्र र कार्यक्षेत्र बनाउने हो भनेर रजिष्ट्रारलाई घुस खुवाउने भनी अभिषेकमार्फत एक करोड २० लाख नगद दिएको र एकपटक २० लाख नगद सञ्जय दाइलाई दिएको र अर्कोपटक २ लाख गरी २२ लाख रूपैयाँ फिर्ता दिएका हुन्,’ त्यो नोटमा लेखिएको छ, ‘कार्यक्षेत्र सेवा केन्द्र पनि भएजस्तो भएन । एक वर्षमा केही काम भयो । पैसा पनि आएन । रजिष्ट्रार उदयबहादुर पराजुलीलाई दिने भनी सञ्जय दाइलाई अभिषेक र म गएर नगद पैसा दिएको हो ।’ यो डायरी गत वर्ष १५ मंसिरमा लेखिएको थियो । यसमा राति २ बजे लेखिएको भनेरसमेत उल्लेख छ र अध्यक्ष पौडेलको हस्ताक्षर छ ।

यो सहकारीले २०७७ साल २२ माघमा पोखरा–१३ कसेरीमा शाखा सेवा केन्द्र खोलेको थियो । २०७९ असोजदेखि स्याङ्जाको आँधिखोला गाउँपालिका–५ जुग्ले बजारमा शाखा सेवा केन्द्र खोलेको थियो । यहीबेला सहकारीहरूमा समस्या देखिन सुरू भयो । जुग्लेमा शाखा त खुल्यो तर सहकारी धराशायी बन्न थालेपछि आफ्नै पालिकामा सहकारी खोलेर बचत उठाउने अध्यक्ष पौडेलको योजना असफल भयो । सहकारी डुबेपछि नयाँ सेवा केन्द्र खोलेको तीन महिनामा उनी भाग्न बाध्य भए । आफू भाग्नेबेला उनले सहकारी सञ्चालन गर्दा क–कसलाई घुस दिनुपरेको थियो भन्ने विषय उल्लेख भएको डायरी लेखेर सहकारीसम्बद्ध व्यक्ति र परिवारलाई बुझाएका थिए । गत कार्तिकमा पक्राउ परेपछि उनले यो डायरी परिवार हुँदै पोखरका एक जना पत्रकारसम्म पु¥याएका थिए र त्यसपछि सार्वजनिक भएको थियो ।

प्रहरीले पक्राउ परेका पराजुलीमाथि छानबिन गरेपछि पराजुलीले घुस लिए–नलिएको प्रमाणीत हुनेछ । पराजुली पोखरामा हुँदै मित्रमिलनले पोखराको कसेरी र स्याङ्जाको जुग्लेमा शाखा खोल्ने अनुमति पाएकाले यसमा आर्थिक डिल भएन भन्न मिल्ने अवस्था भने छैन । तर शाखा विस्तारजस्तो सामान्य कामका लागि एक करोड २५ लाख रूपैयाँजस्तो मोटो रकम घुस दिएको भन्ने विषय भने पत्यारिलो देखिँदैन ।

पराजुलीमात्र होइन राष्ट्रिय सहकारी बैंक लिमिटेडका कर्मचारीले पनि ऋण प्रवाह गर्दा घुस लिएको बयान पौडेल र अधिकारीले दिएका छन् । ४ करोड रूपैयाँ ऋण लिँदा बैंकका तत्कालीन शाखा प्रमुख सन्तोष घिमिरेले ४० लाख रूपैयाँ घुस लिएको बयान छ । ‘राष्ट्रिय सहकारीबाट कर्जा लिँदा सन्तोष सरले पटकपटक ५० लाखभन्दा धेरै लिनुभयो,’ रमणको डायरीमा भनिएको छ ।

रमणको डायरीमा लेखिएको रकम र उनले प्रहरीलाई दिएको बयानको हिसाबकिताब पनि मिलेको छैन । उदयबहादुरलाई एक करोड २० लाख नगद दिएको र सन्तोषलाई ५० लाखभन्दा बढी दिएको डायरीमा उल्लेख छ । तर प्रहरीसँगको बयानमा उदयलाई एक करोड २५ लाख र सन्तोषलाई ४० लाख रूपैयाँ दिएको हिसाब सुनाएका छन् । उदयलाई दिएको २२ लाख फिर्ता भएको बताइएको छ । तर, बयानमा अध्यक्ष पौडेलले २० लाखमात्र फिर्ता पाएको बताएका छन् ।

यो डायरी लेखेपछि अध्यक्ष पौडेल केही समय भारत लुकेका थिए । बचतकर्ता र आफूनिकट केही व्यक्तिले ‘केही हुँदैन, मिलाम्ला’ भनेपछि उनी पोखरा फर्केका थिए । उनी फर्केपछि पनि बचतकर्ता प्रहरीकहाँ पुगिसकेका थिएनन् । पैसा फिर्ता गर्ने आश्वासन पाएपछि केही समय बचतकर्ता चुपचाप बसे । उनले पोखराको रत्नचोक मुख्यमन्त्री कार्यालय नजिकैको आफ्नो घर बेचेका थिए । ३ करोडभन्दा बढी मूल्य पर्ने आलिसान घर उनले २ करोड ४३ लाख रुपैयाँमा एक जना धादिङेलाई बेचेका थिए ।

घर बेचे पनि उनले सबै बचतकर्ताको पैसा फिर्ता गर्न सकेनन् । आफू निकटकाहरूको साथ पाएनन् । अन्ततः उनी गत ४ कार्तिकमा पोखराबाटै पक्राउ परे । उनी सहकारी ठगीमा नभई चेक बाउन्समा पक्राउ परेका थिए । आफू पक्राउ परेपछि गत वर्ष सहकारीका अन्य सदस्यका लागि लेखेको पत्र सार्वजनिक गरेका थिए ।

प्रहरीले पनि बयान लिने क्रममा ‘पत्र तपाईंले नै लेखेको हो ?’ भनेर अध्यक्ष पौडेललाई सोधेको थियो । ‘एक करोड २५ लाख रूपैयाँ दिएको र २० लाख फिर्ता पाएको भन्ने बयान उहाँहरूको छ,’ प्रहरी स्रोत भन्छ, ‘त्यो पत्र पनि मैले नै लेखेको हो भन्नुभएको छ ।’

मित्रमिलनको आर्थिक अपचलनमा पोखरा महानगरपालिका–२१ का वडाध्यक्ष दीपक सुवेदी, पोखराका वकिलदेखि पत्रकारसम्म जोडिएका छन् । यसमा ३० जनाविरुद्ध पक्राउ पुर्जी जारी भएको छ । पाँच जना पक्राउ परेकोमा २५ जना अझै फरार छन् ।

यो सहकारी ठगीको अनुसन्धान सकेर जिल्ला प्रहरी कार्यालय कास्कीले सरकारी वकिलकहाँ अनुसन्धान फाइल बुझाएको छ । कास्की प्रहरीले सरकारी वकिलको कार्यालयमा चार दिनअघि बुझाएको प्रतिवेदनमा ३१ करोड ७८ लाख रूपैयाँ बिगो दाबी गरेको छ ।

प्रकाशित मिति: बुधबार, पुस ११, २०८० १८:३६