कृष्ण सिटौलाका पक्षमा कांग्रेस कोशी सभापति थापाको सिफारिस नोट, महिलातर्फ सुजाता पहिलो नम्बरमा

कृष्ण सिटौलाका पक्षमा कांग्रेस कोशी सभापति थापाको सिफारिस नोट, महिलातर्फ सुजाता पहिलो नम्बरमा

A+ A A-

नेपाली कांग्रेस कोशी प्रदेश समितिले राष्ट्रियसभा सदस्यका लागि पूर्वमहामन्त्री कृष्णप्रसाद सिटौलाको नाम सिफारिस गरेको छ । कोशी समितिले उम्मेदवारको नाम सिफारिस गर्दा सिटौलाका पक्षमा सभापति उद्धव थापाले सिफारिस नोट लेखेका छन् । सिटौलालाई राष्ट्रियसभा सदस्यको उम्मेदवारमा सिफारिस गर्नुका पछाडि तीन कारण रहेको थापाले नोट उल्लेख गरेका छन् ।

कांग्रेस केन्द्रले प्रदेश समितिलाई तीन-तीन जनाको नाम सिफारिस गर्न सर्कुलर जारी गरेको थियो । जस अनुसार जिल्ला समितिले ३८ पुरुष र २५ जना महिला गरी ६३ जना आकांक्षीको नाम पठाएका थिए । जिल्लाले पठाएका सबै नामलाई कोशी प्रदेश समितिले केन्द्रमा पठाएको हो । केन्द्रमा नाम सिफारिस गर्दा प्रदेश सभापति थापाले सिटौलालाई उम्मेदवार बनाउनु उपयुक्त हुने रायसहित सिफारिस नोट लेखेका छन् ।

सिफारिस सूचीमा खसआर्य पुरुषतर्फ कृष्णप्रसाद सिटौला र महिलातर्फ सुजाता कोइरालाको नाम पहिलो नम्बरमा छ । खस आर्य पुरुषतर्फ महेश आचार्य दोस्रो र डा. मिनेन्द्र रिजाल तेस्रो नम्बरमा छन् । सिटौला २०७९ सालमा भएको प्रतिनिधिसभा निर्वाचनमा झापा ३ र नेतृ कोइराला मोरङ २ बाट पराजित भएका थिए । सिटौला राप्रपा अध्यक्ष राजेन्द्र लिङ्देन र नेतृ कोइराला एमालेका ऋषिकेश पोखरेलसँग चुनाव पराजित भएका थिए ।

सिटौलाको नाममा थापाले लेखेको सिफारिस नोट

नोटः नेपाली कांग्रेसका पूर्वमहामन्त्री तथा पूर्वउपप्रधानमन्त्री कृष्णप्रसाद सिटौलाज्यूले नेपालको शान्ति प्रक्रियामा सरकारी वार्ता टोलीको संयोजक भएर १० वर्षे माओवादी सशस्त्र विद्रोहलाई शान्ति वार्तामार्फत समाधानमा उल्लेखनीय योगदान पुर्‍याउनु भएको,

नेपालको संविधान २०७२ निर्माणमा संविधान मस्यौदा समितिको सभापतिको जिम्मेवारीमा रहेर निर्वाह गर्नुभएको योगदान,

पार्टीको नीति, विचार, कार्यक्रम, रणनीति निर्माण गर्न र अन्य पार्टी निकायहरूसँग वार्ता र छलफलबाट समन्वयात्मक भूमिका निर्वाह गरी पार्टीलाई प्रभावकारी ढंगमा स्थापित गराउन सफल व्यक्तित्व भएकाले राष्ट्रियसभा सदस्य निर्वाचन २०८० मा उम्मेदवार उठाउन उपयुक्त देखिन्छ ।

प्रकाशित मिति: बुधबार, पुस ११, २०८० १७:३५