'द्वन्द्वमा बलात्कृत महिलाको पाठेघरको घाउ भइसकेको छ, उपचारका लागि पनि टीआरसी पास गरौँ' (भिडियो)

'द्वन्द्वमा बलात्कृत महिलाको पाठेघरको घाउ भइसकेको छ, उपचारका लागि पनि टीआरसी पास गरौँ' (भिडियो)

A+ A A-

संक्रमणकालीन न्यायसम्बन्धीको विधेयक छिटो पारित गर्न द्वन्द्वमा बलात्कार पीडित महिलाको राष्ट्रिय संगठनले आग्रह गरेको छ । विधेयकमा द्वन्द्वका बेला राज्य पक्ष (तत्कालीन शाही नेपाली सेना, नेपाल प्रहरी र सशस्त्र प्रहरी), विद्रोही पक्ष माओवादी, प्रतिकार समूह र नचिनेका व्यक्तिले महिलामाथि गरेको बलात्कार घटनाको उजुरी लिने, छानबिन गर्ने, उपचार गर्ने र क्षतिपूर्ति दिलाउनेलगायतका प्रावधान छन् ।

पीडितलाई रोजगारीको व्यवस्था गर्ने प्रावधान पनि विधेयकमा छ । विधेयक भने संसद्को कानुन, न्याय तथा मानवअधिकार समितिमा महिनौँदेखि विचाराधीन छ । तर, केही बलात्कृत महिलाको पाठेघरमा क्यान्सर भएको र उनीहरूको स्वास्थ्य स्थिति नाजुक भएका कारण उपचार गरेर जीवन रक्षा गर्न पनि छिटो विधेयक पारित गर्नुपर्नेमा संगठनले जोड दिएको छ ।

संगठनकी अध्यक्ष तथा पूर्वसभासद देवी खड्काले सत्तारुढ र विपक्षी सबै दल गम्भीर बनेर विधेयक पारित गर्नुपर्ने बताइन् । विधेयक छिटो पारित हुँदा द्वन्द्वमा बलात्कार पीडित महिलाहरूले न्याय पाउने उनको विश्वास छ । तर, समितिमै विधेयक अड्किरहे बलात्कार पीडित महिलाहरू अन्यायमा पर्ने उनले बताइन् । खड्काका अनुसार बलात्कृत महिलाहरू अस्पतालसमेत नगई पीडा सहेर बसेका छन् ।

‘पाठेघरमा घाउ भएर पिप बगिरहँदा समेत पीडा सहेर हिँडिरहनुहुन्छ । त्यसको कारण के हो भने अस्पताल गएर डाक्टरले वास्तविक कुरो पत्ता लगाउँछ । त्यसपछि परिवारलाई थाहा दिन्छ । त्यसो हुँदा घटना खुल्छ र बदनाम हुन्छ भन्ने छ’, उनले शिलापत्रसँग भनिन्, ‘बदनाम हुने डरकै कारण उपचार नगराउँदा उनीहरूको अवस्था चिन्ताजनक छ । उहाँहरूको उपचार गरौँ र छिटो विधेयक पास गरौँ ।’

द्वन्द्वका बेला बलात्कृत महिलाहरूको संख्या तीन हजारभन्दा बढी छ । संगठनले दुई महिनाअघि देशका विभिन्न स्थानमा स्वास्थ्य शिविर सञ्चालन गर्दा दुई सय जना बलात्कार पीडित महिलाहरू आएका थिए । उनीहरूमध्ये १२७ जना महिलाको संगठनले सर्वेक्षण गरेको थियो । त्यस क्रममा ११ दशमलव ०२ प्रतिशतले बलात्कार घटनापछि पाठेघरमा समस्या आउनाले पाठेघर नै फालेको बताएका थिए । द्वन्द्वका बेला कोही महिनौसम्म एक जना वा सामूहिक रूपमा पनि बलात्कारको सिकार भएको बताइएको छ ।