राष्ट्रियसभा सदस्यका आकांक्षीहरूलाई देउवाको जवाफ- क्लस्टरसहित सिटको टुंगो लागेपछि हेरौँला

राष्ट्रियसभा सदस्यका आकांक्षीहरूलाई देउवाको जवाफ- क्लस्टरसहित सिटको टुंगो लागेपछि हेरौँला

A+ A A-

नेपाली कांग्रेसका राष्ट्रियसभा सदस्यका आकांक्षीहरूले टिकटका लागि पार्टीभित्र लविङ थालेका छन् । टिकटका लागि उनीहरूले पार्टी सभापति शेरबहादुर देउवासहितका शीर्ष नेताहरूलाई भेटेर दबाब बढाउन थालेका हुन् । सभापति शेरबहादुर देउवादेखि इतर समूहका नेता डा. शेखर कोइराला, महामन्त्रीद्वय गगन थापा र विश्वप्रकाश शर्मासम्मलाई भेटेर आकांक्षीहरूले टिकटका लागि लविङ तीव्र पारेका छन् ।

पार्टीले संस्थागत रूपमा निर्णय गरेर सभापति शेरबहादुर देउवालाई उम्मेदवार चयन गर्ने जिम्मा दिइसकेको छ । भोलि (बुधबार) देखि सुरु हुने केन्द्रीय समिति बैठकले उम्मेदवारको मापदण्ड बनाउनेछ । त्यसपछि सत्ता गठबन्धनको बैठकले सिट बाँडफाँट टुंग्याएपछि कांग्रेसले उम्मेदवार चयन गर्नेछ ।

आफूलाई भेट्न आउने आकांक्षीहरूलाई सभापति देउवाले क्लस्टरसहित सिटको टुंगो लागेपछि छलफल गरौँला भन्ने जवाफ दिइरहेका छन् । ‘सत्ता गठबन्धनले कुन प्रदेशमा कसलाई कुन क्लस्टरको सिट दिने भन्ने टुंगो लगाएपछि उम्मेदवार टुंगो लाग्छ । सभापतिज्यूले सोही कुरा बताइरहनुभएको छ,’ देउवाका प्रेस संयोजक गोविन्द परियारले भने ।

‘कस्ता मानिस पठाउने भनेर केन्द्रीय समितिले मापदण्ड बनाउँछ । आकांक्षी धेरै भएकाले नेतृत्वले उम्मेदवार टुंगो लगाउँछ,’ प्रचार विभाग प्रमुख मीन विश्वकर्माले शिलापत्रसँग भने । राष्ट्रियसभामा रिक्त हुन लागेको १९ सिटमा कांग्रेसले ९ सिट पाउने लगभग पक्का छ । कांग्रेसले सबै जिल्लाबाट प्रदेश समिति र त्यहाँबाट केन्द्रमा एक महिलासहित तीन जनाको नाम केन्द्रमा सिफारिस गर्न परिपत्र गरेको छ ।

‘पार्टीले सकेसम्म बढी सिट लिन खोज्नेछ । त्यसमा राम्रा मान्छे सिफारिस गर्नुपर्छ । आकांक्षी धेरै नै छन् । पछिल्लो चुनावमा टिकट नपाएका र अवसर नपाएका प्राय आकांक्षी छन् । संसदीय भूमिका निभाउन सक्ने र राष्ट्रियसभाको गरिमा बढाउन सक्ने व्यक्ति उम्मेदवार हुनुपर्छ,’ कांग्रेसका सहमहामन्त्री बद्री पाण्डेले शिलापत्रसँग भने ।

तल्लो तहबाट सिफारिस गर्दा कम्तीमा तीन जना महिला अनिवार्य भएकाले महिला प्रतिनिधित्व हुनेछ । समावेशी हुनैपर्ने भएकाले अन्य कोटामा जान पनि नेताहरूको प्रतिस्पर्धा हुनेछ । ‘अहिलेसम्म औपचारिक रूपमा पार्टीमा छलफल भएको छैन । ९ सिट पाउँदा ३ जना महिला पर्छन् । कोटा अनुसारमात्रै उम्मेदवार पठाउनपर्ने भएकाले आएका नाममा सभापतिले छलफल गरेर टुंगो लगाउनुहुन्छ,' सहमहामन्त्री महलक्ष्मी उपाध्याय डिनाले शिलापत्रसँग भनिन् ।

राष्ट्रियसभा सदस्यका लागि कांग्रेसभित्र प्रतिनिधिसभा सदस्यमा पराजित भएकादेखि टिकट नपाएका र पटक-पटक अवसर पाइसकेका नेताहरू आकांक्षी छन् । राष्ट्रियसभाका अध्यक्ष बन्ने गरी आकांक्षा देखाएका कृष्णप्रसाद सिटौला र गोपालमान श्रेष्ठ छन् । कोशी प्रदेशबाट नेता शेखर कोइराला समूहले डा. मीनेन्द्र रिजालको नाम अघि सारेको छ ।

२७ मंसिरमा बसेको कोइराला समूहको बैठकले पटक-पटक अवसर पाएकालाई राष्ट्रियसभामा लैजान नहुने निष्कर्ष निकालेको थियो । कांग्रेसमा सहमहमन्त्री फरमुल्लाह मन्सुर, अनुशासन समिति संयोजक आनन्द ढुंगाना, बलबहादुर केसी, अब्दुल सतार, देउवा प्रधानमन्त्री हुँदा परराष्ट्र सल्लाहकार रहेका अरुण सुवेदी, प्रचार विभाग प्रमुख विश्वकर्मा, डा. गोविन्द पोखरेल, मनोजमणि आचार्य, किरण कोइरालालगायतका आकांक्षी छन् ।

कांग्रेस कोशी प्रदेशबाट सिटौला र रिजालसहित महेश आचार्य, सुजाता कोइराला, डिला संग्रौला, गुरुराज घिमिरे, उमेशजंग रायमाझी, आङ्गेलु शेर्पा र रुक्मिणी कोइरालाको नाम सिफारिस भएको छ । उता कर्णाली प्रदेशले जिल्लाबाट सिफारिस भएका सबै नाम समावेश गरेर पठाएको छ । सिफारिस हुनेमा डिल्ली रेग्मी, भुपेन्द्रजंग शाही, हस्त मल्ल, कृष्ण रोकाया, मानबहादुर नेपाली, रविन्द्र श्रेष्ठ, रामछाया शाही, खगिसरा आचार्य, यशोदा शाहीलगायत छन् ।

पार्टीले बढी सिट लिन गठबन्धनमा दबाब बढाउनुपर्ने नेताहरू बताउँछन् । रिक्त हुन लागेको १९ सिटमध्ये बागमतीमा ४, गण्डकी, कर्णाली र सुदूरपश्चिममा ३-३, कोशी, मधेश र लुम्बिनी प्रदेशमा २-२ सिट छ । पदावधि सकिने १९ जनामा अन्यमा पाँच जना, महिला सात जना, दलित दुई जना र अपाङ्गता भएका व्यक्ति वा अल्पसंख्यक समुदायबाट तीन जना छन् । अन्यमा गण्डकी, सुदूरपश्चिम, लुम्बिनी, मधेश र कोशी प्रदेशबाट एक-एक जनाको पदावधि सकिँदै छ ।

निर्वाचन आयोगले २३ पुसमा उम्मेदवारी दर्ताका लागि समय निर्धारण गरेको छ । राष्ट्रियसभा सदस्यको निर्वाचन भने ११ माघमा हुने कार्यतालिका छ । राष्ट्रियसभाको निर्वाचनमा सातवटै प्रदेशका सांसद र स्थानीय तहका मेयर/उपमेयर र अध्यक्ष तथा उपाध्यक्षले भोट हाल्न पाउने संवैधानिक व्यवस्था छ ।

प्रकाशित मिति: बुधबार, पुस ११, २०८० १७:११