‘पुटिनसँग ट्रम्पको फोन नम्बर छ र अझै उनी ट्रम्पलाई आफ्नो सम्पत्ति ठान्छन्’

‘पुटिनसँग ट्रम्पको फोन नम्बर छ र अझै उनी ट्रम्पलाई आफ्नो सम्पत्ति ठान्छन्’

A+ A A-

रुसी राष्ट्रपति भ्लादिमिर पुटिनसँग केही समयका लागि पूर्वअमेरिकी राष्ट्रपति डोनाल्ड ट्रम्पको फोन नम्बर थियो । पुटिनलाई यो थाहा छ कि ट्रम्पलाई कसरी प्रभावित पार्न सकिन्छ, जसकारण उनी ट्रम्पलाई अझै पनि ‘सम्पत्ति’को रूपमा हेर्छन् । यी शब्द ह्वाइट हाउसका लागि पूर्व रुसी विज्ञ फियोना हिलका हुन् ।

उनले पुटिनले किन ट्रम्प नै अमेरिकी राष्ट्रपति बनिदिए हुन्थ्यो भनेर चाहेको विषयमा आफ्ना धारणाहरू वान डिसिजन पोडकास्टमा राखेकी छिन् । सोही क्रममा उनले पुटिनले ट्रम्पलाई ‘आफ्नो सम्पत्ति’को रूपमा हेरेको उल्लेख गरेकी हुन् ।

ट्रम्पसँग नजिकैबाट काम गरेकी हिलले ट्रम्पले चुनाव जिते पुटिन युक्रेन युद्ध आफ्नो पक्षमा ल्याउन सफल हुने पनि बताएकी छिन् । उनी भन्छिन्, ‘तपाईंलाई थाहा छ, पुटिनसँग ट्रम्पको फोन नम्बर थियो । पुटिनले ट्रम्पलाई चाँडै प्रभावित पार्न सक्छन् किनभने पुटिनमा त्यस्तो कला छ ।’ उनका अनुसार ट्रम्पबाट धेरै फाइदा लिनसक्ने भएकाले पुटिनले ट्रम्पलाई सम्पत्तिको रूपमा हेर्ने गरेका छन् ।

ह्वाइट हाउसका लागि पूर्व रुसी विज्ञ फियोना हिल

पछिल्ला विभिन्न सर्वेक्षणहरूले ट्रम्पले पुनः अमेरिकी राष्ट्रपतिको निर्वाचन जित्ने अनुमानहरू भइरहँदा हिल भन्छिन्, ‘ट्रम्प राष्ट्रपतिको रूपमा फिर्ता आउनु पुटिनको लागि बरदानको कुरा हो । ट्रम्पले चुनाव जितेमा पुटिनले उक्त घटनालाई चेतावनीको रूपमा प्रयोग गर्न सक्छन् । उनी युक्रेनी, युरोपेली र बाँकी संसारलाई धम्क्याउन सक्षम पनि हुन सक्छन् ।’

सन् २०१७ देखि २०१९ सम्म हिल ह्वाइट हाउसमा एक वरिष्ठ राष्ट्रिय सुरक्षा सहयोगी थिइन् । हिलका अनुसार जो बाइडेनले युक्रेनको समर्थनमा विश्वव्यापी गठबन्धनको नेतृत्व गरेका छन् तर कीभका लागि अमेरिकी सहायता कोष हाल रोकिएको छ ।

हालै अमेरिकी सिनेटमा जो बाइडेन सरकारले युक्रेनका लागि प्रस्ताव गरेको ६१ अर्ब अमेरिकी डलरको सैन्य र आर्थिक सहायता अस्वीकृत भएको थियो । ट्रम्पप्रति बफादार रिपब्लिकन सिनेटरहरूले थप सहायताको बदलामा कट्टरपन्थी आप्रवासन उपायहरूको माग गरेका छन् । यसले युक्रेन युद्ध पुटिनको पक्षमा जानसक्ने सम्भावना बढाउँदै लगेको छ ।

यसको अर्थ रुसले कब्जा गरेका भू-भागहरू फिर्ता नगरिकनै युद्ध सकिनेछ । युक्रेनमाथि रुसी दबाब झनै बढिरहनेछ र यहाँ क्षतिपूर्तिको सवाल नै उठ्नेछैन ।

सन् २०१५ मा डोनाल्ड ट्रम्प अमेरिकी राजनीतिमा प्रवेश गरेका थिए । अमेरिकी चुनावमा रुसी हस्तक्षेपको चेतावनीका बाबजुद ट्रम्प र पुटिन विश्वव्यापी मञ्चमा जटिल रूपमा संलग्न छन् ।

सन् २०१८ हेलसिन्कीमा पुटिनसँगको शिखर वार्तामा ज्यादै नरम रूपमा प्रस्तुत भएको भन्दै ट्रम्पको व्यापक आलोचना भएको थियो । सन् २०१६ को निर्वाचनमा रुसी हस्तक्षेपका कारण ट्रम्पले चुनाव जितेको पनि आरोप लाग्ने गर्छ । सन् २०१८ मा रुसी चुनावी हस्तक्षेप र ट्रम्प र मस्कोबीचको सम्बन्धकाबारेमा अमेरिकामा अनुसन्धान नै भएको थियो । सो विषयमा ट्रम्पले धेरैपटक अवरोध गरेको प्रमाणहरू हुँदाहुँदै ट्रम्प–पुटिन मिलीभगतको कुनै प्रमाण भेटिएन ।

एक महत्वाकांक्षी निरंकुश शासकको रूपमा देखिएका ट्रम्पले नियमित रूपमा पुटिन र किम जोङ उनसँगै अन्य अधिनायकवादी नेताहरूको प्रशंसा गर्ने गर्छन् ।

ट्रम्पमाथि अहिले चार अभियोगहरू अन्तर्गत ९१ आपराधिक आरोपहरू लागेका छन् । तर उनी आफू दोषी नभएको बताउँछन् । उनलाई क्यापिटल हिल दंगामा दोषी ठहर गर्दै कोलोराडो राज्यले चुनावमा उठ्नबाट अयोग्य ठहर नै गरिदिएको छ । यद्यपि उनी रिपब्लिकन पार्टीका मन पराइएका पात्र हुन् । विभिन्न चुनावी सर्वेक्षणले उनी वर्तमान राष्ट्रपति बाइडेन भन्दा लोकप्रिय भएको पनि देखाएको छ ।

हिलका अनुसार ट्रम्पले चुनाव जिते पनि पुटिन होसियार भने अवश्य हुनुपर्छ किनभने ट्रम्प आफ्नै लागि बाँच्छन् र आफ्नै लागि निर्णय लिन्छन् । तर ट्रम्पको यस्तै गतिविधिबाट पनि पुटिनले लाभ लिन सक्छन् ।

ट्रम्पले बारम्बार उत्तर एट्लान्टिक सन्धि संगठन नेटोबाट अमेरिका पछि हट्ने भनेर आफ्नो कार्यकालमा बताउने गर्थे । नेटो कमजोर भए रुसले अवश्य यसबाट पनि फाइदा लिनेछ । युक्रेनलाई नेटोको सदस्यता दिने त्रासकै कारण रुसले युक्रेनमा आक्रमण सुरु गरेको थियो ।