भीआईपी कल्चर भत्काउँदा लोकतन्त्रप्रति भरोसा बढ्यो: प्रधानमन्त्री प्रचण्ड

भीआईपी कल्चर भत्काउँदा लोकतन्त्रप्रति भरोसा बढ्यो: प्रधानमन्त्री प्रचण्ड

A+ A A-

प्रधानमन्त्री पुष्पकमल दाहाल प्रचण्डले भीआईपी कल्चर भत्काएर लोकतन्त्रप्रति भरोसा बढाउने काममा महत्त्वपूर्ण सफलता प्राप्त भएको बताएका छन् ।

मंगलबार सरकारको एक वर्ष पूरा भएको अवसरमा सिंहदरबारबाट देशवासीका नाममा सम्बोधन गर्दै प्रधानमन्त्री प्रचण्डले भीआईपी कल्चर भत्काएर लोकतन्त्रप्रति भरोसा बढाउने काम गरेको बताएका हुन् ।

‘मैले संसदमा सुरुकै दिन गरेको संकल्प थियो, सुशासन । देशमा एउटा 'भीआईपी कल्चर' स्थापित भइरहेको थियो । हाई प्रोफाइलहरूलाई कानुनले छुनै सक्दैन भन्ने आममनोविज्ञान बनिरहेको थियो । सरकारले नक्कली भुटानी शरणार्थी प्रकरण, ललिता निवास प्रकरण, त्रिभुवन विमानस्थलबाट सुनको अवैध आयातलगायतका काण्डमा इतिहासकै सबैभन्दा ठूलो अनुसन्धान र कारबाही गरेपछि जनतामा लोकतन्त्रप्रति भरोसा बढेको छ,’ उनले भने ।

प्रधानमन्त्री प्रचण्डले कहिल्यै कानुनले नछुने ठानिएका उच्चपदस्थहरू कानुनको नियन्त्रणमा आएको बताए । ‘देशमा पहुँच होइन, विधिको शासन छ भन्ने मान्यता स्थापित गर्न सरकारले कतै कुनै लापर्वाही गरेन । यसबाट कानुनको सर्वोच्चता मात्र होइन, लोकतन्त्रकै सर्वोच्चता पनि स्थापित भएको छ। यसलाई मैले लोकतन्त्रको सर्भिसिङ र शुद्धीकरण भनेको छु,’ उनले भने ।

प्रधानमन्त्री प्रचण्डले मिटरब्याजी र सहकारीका ठगहरू पनि राज्यको नियन्त्रणमा आइरहेको बताए । ‘वर्षौंदेखिको विकृति र बेथितिको चक्र भत्काउन सरकार उत्तिकै प्रतिवद्ध छ । एनसेलको शेयर बिक्रीबारे जानकारी पाएलगत्तै छानबिन अघि बढाइएको छ । छानबिन तथा अध्ययन समितिमार्फत राष्ट्रिय हितको संरक्षण गर्न सरकार प्रतिबद्ध छ,’ उनले भने ।