राष्ट्रियसभा निर्वाचन: उम्मेदवार खोज्दै एमाले, 'हार्ने चुनाव' भएकाले छैन उत्साह

राष्ट्रियसभा निर्वाचन: उम्मेदवार खोज्दै एमाले, 'हार्ने चुनाव' भएकाले छैन उत्साह

A+ A A-

राष्ट्रियसभाका १९ सदस्यको कार्यकाल २० फागुनबाट सकिँदैछ । कार्यकाल सकिनुभन्दा एक महिनाअघि राष्ट्रियसभा सदस्यको निर्वाचन गर्नुपर्ने संवैधानिक व्यवस्था अनुसार निर्वाचन आयोगले निर्वाचन प्रक्रिया अघि बढाएको छ । आयोगले राष्ट्रियसभा सदस्यको निर्वाचनका लागि २३ पुसका लागि उम्मेदवारी दर्ताको समय तोकेको छ । ११ माघमा राष्ट्रियसभा सदस्यका लागि निर्वाचन हुँदै छ ।

त्यसैले राष्ट्रियसभा सदस्यको निर्वाचनका लागि उम्मेदवारी दर्ताको समय नजिकिँदै गएपछि सत्तारुढ दल कांग्रेस, माओवादी केन्द्र, नेकपा एस, जसपालगायत दलहरू उम्मेदवार छनोटका विषयमा आन्तरिक छलफलमा व्यस्त छन् । तर, प्रमुख प्रतिपक्षी दल एमालेभित्र भने राष्ट्रियसभा निर्वाचनबारे छलफल भएको छैन । छलफल तर परको कुरा एमालेले प्रदेशबाट आकांक्षी उम्मेदवारको नाम पनि संकलन गरेको छैन ।

एमाले उपमहासचिव विष्णु रिमालले राष्ट्रियसभा सदस्यको निर्वाचनमा उठाउने उम्मेदवारबारे छलफल नभएको बताए । 'अहिलेसम्म उम्मेदवारका विषयमा छलफल भएको छैन । केही दिनमा बैठक बसेर निर्णय लिन्छौँ,' शिलापत्रसँग रिमालले भने ।

एमाले सुदूरपश्चिम प्रदेश अध्यक्ष अध्यक्ष कृष्णप्रसाद जैसी पनि राष्ट्रियसभामा उठाउने उम्मेदवारबारे अहिलेसम्म कुनै छलफल नभएको बताउँछन् । शिलापत्रसँग कुराकानी गर्दै अध्यक्ष जैसीले केन्द्रले उम्मेदवारको नामावली संकलन गर्न कुनै पनि निर्देशन नदिएको बताए । ‘राष्ट्रियसभा सदस्यको निर्वाचनबारे केन्द्रबाट परिपत्र आएपछि छलफल हुन्छ,' उनले भने, 'केन्द्रले निर्देशन दिएपछि मात्रै हामीले जिल्लाबाट आकांक्षीहरूको नाम माग्ने हो ।'

एमाले कोशी प्रदेश अध्यक्ष घनश्याम खतिवडाले राष्ट्रियसभा सदस्यको निर्वाचनमा उठाउने उम्मेदवारबारे छलफल भइनसकेको बताए । 'केही आकांक्षीहरू देखिएका छन् । तर, नामबारे छलफल भएको छैन,' उनले भने, 'उम्मेदवारको टुंगो प्रदेशको सिफारिसमा केन्द्रले नै लगाउँछ, केही समय लाग्छ ।'

बागमती प्रदेशमा राष्ट्रियसभाको निर्वाचनमा उठाउने उम्मेदवारबारे केन्द्रले निर्णय गर्ने भएकाले छलफल नभएको अध्यक्ष कैलाश ढुंगेलले बताए । ‘पार्टीको केन्द्रले नै उम्मेदवार छनोट गर्ने भएकाले हामीले छलफल गरेका छैनौँ । केन्द्रले सल्लाह माग्यो भने हामीले दिन्छौँ,' उनले भने ।

कर्णाली प्रदेशमा पनि राष्ट्रियसभा सदस्यको निर्वाचनबारे एमालेमा छलफल भएको छैन । एमाले कर्णाली प्रदेश सचिव ध्रुवबहादुर शाहीले सत्ता गठबन्धन एक ठाउँमा रहँदासम्म चुनाव जित्ने अवस्था नबन्ने भएकाले उम्मेदवारबारे छलफल भइनसकेको बताए । ‘हामीले चुनाव जित्ने अवस्था छैन । तर, त्यसो हुँदैमा हामीले उम्मेदवार नै नउठाउने भन्ने हुन्न । छलफल गरेर नाम सिफारिस गर्छौं,' उनले भने ।

लुम्बिनी प्रदेश कमिटीमा पनि राष्ट्रियसभा सदस्यको निर्वाचनबारे छलफल भएको छैन । एमाले लुम्बिनी प्रदेश उपसचिव पूर्ण घर्ती लुम्बिनी एमालेलाई अहिलेसम्म राष्ट्रियसभाको निर्वाचन नलागेको बताउँछन् । ‘सत्ता गठबन्धन मिलेर चुनाव लड्ने भएकाले हाम्रा साथीहरूमा खासै उत्साह देखिएको छैन । १७-१८ पुसतिर बैठक राखेर उम्मेदवारका आकांक्षीको नाम केन्द्रलाई सिफारिस गर्छौं,' उनले भने ।

सत्ता गठबन्धनबीच राष्ट्रियसभा सदस्यको निर्वाचनमा गठबन्धन हुने पक्का भएकाले पनि एमालेभित्र धेरै आकांक्षी देखिएका छैनन् । सत्ता गठबन्धन कायमै रहँदासम्म चुनाव नजितिने भएकाले पनि आकांक्षी धेरै नदेखिएको एक पदाधिकारी बताउँछन् । ‘चुनाव जित्ने अवस्था थियो भने आकांक्षीहरूको भिड लाग्थ्यो । हार्ने चुनाव भएर पनि होला उम्मेदवार खोज्नुपर्ने अवस्था आउँदैछ,' ती पदाधिकारीले भने ।

राष्ट्रियसभामा बागमतीमा ४, गण्डकी, कर्णाली र सुदूरपश्चिममा ३-३, कोशी, मधेश र लुम्बिनी प्रदेशमा २-२ सिट खाली हुँदैछ । राष्ट्रियसभामा एकतिहाइ सदस्यहरूको निर्वाचन प्रत्येक दुई वर्षमा हुन्छ । पदावधि सकिन लागेका सांसदमा पार्टीगत हिसाबमा एमालेबाट सबैभन्दा धेरै ८ सांसद छन् । एमालेबाट राष्ट्रियसभा अध्यक्ष बनेका गणेशप्रसाद तिमिल्सिना, सांसदहरू इन्दु कडरिया, दीपा गुरुङ, दिलकुमारी रावल, कुमार दसौँदी, नरपति लुवार, भैरवसुन्दर श्रेष्ठ र रामचन्द्र राईको कार्यकाल सकिन लागेको छ ।

राष्ट्रियसभाको निर्वाचनमा सातवटै प्रदेशका सांसद र स्थानीय तहका मेयर/उपमेयर र अध्यक्ष तथा उपाध्यक्षले भोट हाल्न पाउने संवैधानिक व्यवस्था छ ।

प्रकाशित मिति: मंगलबार, पुस १०, २०८० १७:०६