रुसी सेनाले अब नेपालीको भर्ती नलिने, भर्ना भइसकेकालाई नेपाल फर्काउन सकारात्मक

रुसी सेनाले अब नेपालीको भर्ती नलिने, भर्ना भइसकेकालाई नेपाल फर्काउन सकारात्मक

A+ A A-

रुसले नेपालीहरूलाई रुसी सेनामा भर्ती हुन बन्द गरेको छ । रुसी सेनामा आबद्ध भएका नेपालीहरूलाई फर्काउन रुस सकारात्मक भएको सरकारी अधिकारीहरूले बताएका छन् । विभिन्न कूटनीतिक च्यानलमार्फत नेपालले रुससम्म यो सन्देश पठाएको छ ।

प्रधानमन्त्री पुष्पकमल दाहाल प्रचण्ड, परराष्ट्रमन्त्री नारायणप्रकाश साउदलगायतले नेपालस्थित रुसी राजदूतमार्फत नेपालीहरूलाई रुसी सेनामा भर्ना हुन नदिन सन्देश पठाएका थिए । त्यस्तै भर्ना भइसकेकाहरूलाई पनि नेपाल फर्काउन सरकारले गरेको पहलमा रुस सकारात्मक देखिएको हो । यससँगै रुसी सेनामा नेपालीहरूको भर्ना रोकिने भएको छ ।

परराष्ट्रमन्त्री साउदले रुसी सेनामा केही नेपाली नागरिक भर्ना भएको र त्यसमध्ये सात जना मारिएको भन्ने सूचना आएको जानकारी दिएका छन् । यस्तो सूचना रुसी सरकारले नै दिएको उनको भनाइ छ ।

रासससँगको कुराकानीमा मन्त्री साउदले यसबाहेक रुसी सेनामा भर्ना भएकामध्ये सय जनाको हाराहारीमा हराइरहेका र घाइते भएकाको उजुरी मन्त्रालयमा आएको उनले जानकारी दिएका छन् । 'सय जना हाराहारीमा हराइरहेका र घाइते भएकाको उजुरी मन्त्रालयमा आएको छ । उनीहरूका परिवार र साथीभाइले खबर गरेका छन्,' उनले भनेका छन् ।

यसका लागि नेपालस्थित रुसका राजदूतलाई मन्त्रालयमा बोलाएर नेपालको चासोहरू रुसी सरकारसम्म पुर्‍याउन स्पष्ट सन्देश दिएको उनले बताए । 'मस्कोस्थित नेपाली दूतावासलाई पनि राष्ट्रिय मानवअधिकार आयोगको चासोलाई समेत राखेर नेपाल सरकारको दृष्टिकोण सम्प्रेषण गरेका छौँ । यसमा हामी प्रयत्न गरिरहेका छौँ,' उनले भने ।

उनले नेपाली नागरिक रुसी सेनामा भर्ना हुन नपाउन् भने प्रबन्ध पनि गरेको बताएका छन् । 'रुसमा नेपाली नागरिक सैन्य भर्तीका लागि जान नपाउन् वा नजाउन् भनेर ‘नो अब्जेक्सन सर्टिफिकेट’ (एनओसी)को प्रबन्ध गरेका छौँ । दक्षिण एसियाको भारत, बङ्गलादेश र श्रीलङ्का तथा खाडी क्षेत्रका छ देशबाट एनओसी चाहिने गरी प्रबन्ध मिलाएका छौँ । यसपछि पनि थप केही त्यहाँ गएको भन्ने सूचना आएको अवस्थामा विमानस्थलमा थप निगरानी बढाएका छौँ । यसमा हामीले आफ्नोतर्फबाट गर्ने पहलकदमीमा केही कसर बाँकी राखेका छैनौँ । कुनै कारणवस अप्ठ्यारोमा परेर हाम्रो दूतावासमा पुगेकाको उद्धार गरेका छौँ । नेपाल फिर्ता गरेका छौँ,' उनले भने ।

मन्त्री साउदले विभिन्न सिलसिलामा रुस पुगेका करिब दुई सयभन्दा बढी नेपाली रुसी सेनामा भर्ना भएको आशंका गरिएको बताएका छन् । 'करिब दुई सय जना काम गर्न, अध्ययन र भ्रमण भिसामा रुस गएका नेपाली युवा त्यहाँको सेनामा भर्ना भएको आशङ्का गरिएको छ । त्यसभन्दा केही बढी भर्ना भएको हुनुपर्छ भन्ने हो । किन भने सय जना हाराहारीमा हराइरहेका र घाइते भएकाको उजुरी मन्त्रालयमा आएको छ । यो सङ्ख्या दुई सयभन्दा बढी रहेको हुन सक्ने हाम्रो अनुमान छ,' साउदले भनेका छन् ।

त्यस्तै युक्रेनमा बन्दी बनाइएकाहरूका विषयमा पनि सरकार सम्पर्कमा रहेको बताए । 'युक्रेनमा बन्दी बनाइकाका हकमा हामी युक्रेन सरकारको सम्पर्कमा छौँ । युक्रेन हेर्ने हाम्रो राजदूतले उद्धारका लागि वार्ता संवाद गरिरहनुभएको छ । दिल्लीस्थित नेपाल हेर्ने युक्रेनको राजदूतावासमा पनि कुरा भइरहेको छ । अन्तर्राष्ट्रिय रेडक्रसलाई युद्ध बनाइएका चार नेपालीलाई तत्काल रिहाइका लागि सहजीकरण गरिदिन आग्रह गरेका छौँ । यसको परिणाम चाँडै आउँला भन्ने मैले विश्वास लिएको छु,' उनले भनेका छन् ।

इजरायलमा हमासको आक्रमणमा परी हालसम्म अज्ञात अवस्थामा रहेका नेपाली विद्यार्थी विपिन जोशीको रिहाइका लागि पहल भइरहेको साउदले बताएका छन् ।

'विपिन जोशीको उद्धार र रिहाइका लागि अन्तर्राष्ट्रिय रेडक्रस, कतारका प्रधानमन्त्रीसम्मलाई म आफैँले भेटेर पहल गरिदिन आग्रह गरेको छु । अहिलेसम्मको विवरणअनुसार विपिन जोशीको जीवन सुरक्षित नै छ । आउँदो युद्धविराममा हामी विपिन जोशीलाई छुटाउन सफल हुनेछौँ भन्ने मेरो दृढ विश्वास छ,' उनले भने ।

प्रकाशित मिति: मंगलबार, पुस १०, २०८० १५:४६