एनसीएचएलको १५औँ वार्षिकोत्सव : एनसीएचएल र नेप्सबीच मर्जरमा जाने सम्झौता, सात कर्मचारी सम्मानित

एनसीएचएलको १५औँ वार्षिकोत्सव : एनसीएचएल र नेप्सबीच मर्जरमा जाने सम्झौता, सात कर्मचारी सम्मानित

A+ A A-

नेपाल क्लियरिङ हाउस लिमिटेड (एनसीएचएल) ले आफ्नो १५औँ वार्षिकोत्सव मनाएको छ । कम्पनीले १० वर्षभन्दा बढी कम्पनीमा आबद्ध भई काम गर्ने कर्मचारीहरूलाई ‘लङ्ग सर्भिस अवार्ड’, सबैभन्दा बढी डिजिटल कारोबार प्रशोधन गर्ने कम्पनीहरूलाई ‘हाइएस्ट डिजिटल ट्रान्जेक्सन’ अवार्ड प्रदान गर्ने र मर्जर तथा एक्विजिसन गर्ने घोषणा गर्दै १५औँ वार्षिकोत्सव मनाएको हो ।

वार्षिकोत्सव कार्यक्रममा एनसीएचएलले १० वर्षभन्दा बढी समयदेखि कम्पनीमा कार्यरत आफ्ना सात कर्मचारीहरूलाई उनीहरूको एनसीएचएलप्रतिको समर्पणका लागि ‘लङ्ग सर्भिस अवार्ड’ प्रदान गरेको छ । प्रमुख अतिथि तथा नेपाल राष्ट्र बैंकका गभर्नर महाप्रसाद अधिकारी र एनसीएचएलका अध्यक्ष रामु पौडेलले उक्त अवार्ड संयुक्त रुपमा हस्तान्तरण गरेका हुन् ।

त्यसैगरी, एनसीएचएलले आफ्नो वार्षिकोत्सवको अवसर पारेर विभिन्न बैंक तथा वित्तीय कम्पनी र प्राविधिक सदस्यहरूलाई पनि सम्मान गरेको छ । एनसीएचएलले पछिल्लो तीन आर्थिक वर्षमा सबैभन्दा बढी डिजिटल कारोबार प्रशोधन गर्ने राष्ट्रिय वाणिज्य बैंक, मुक्तिनाथ विकास बैंक, गुडविल फाइनान्स लिमिटेड र खल्तीलाई ‘हाइएस्ट डिजिटल ट्रान्जेक्सन’ अवार्ड प्रदान गरेको छ ।

त्यसैगरी, नेपाल सरकार, अर्थ मन्त्रालयअन्तर्गतको महालेखा नियन्त्रक कार्यालयलाई एनसीएचएल प्रणालीमार्फत सरकारी कारोबारलाई डिजिटलाइजेसन गर्न खेलेको विशेष भूमिकालाई सम्मान गर्दै विशेष अवार्ड प्रदान गरिएको थियो ।

कार्यक्रममा एनसीएचएल र नेपाल इलेक्ट्रोनिक पेमेन्ट सिस्टम लिमिटेड (नेप्स) को मर्जर तथा एक्विजिसन गर्नका लागि समझदारीपत्र आदानप्रदान भएको घोषणासमेत गरियो । एनसीएचएलको मर्जर प्राप्ति समितिका संयोजक महेश शर्मा ढकाल र नेप्सको मर्जर समितिका संयोजक संजीवकुमार श्रेष्ठबीच उक्त समझदारीपत्र आदानप्रदान गरिएको हो ।

वार्षिकोत्सव कार्यक्रममा नेपाल राष्ट्र बैंकका डेपुटी गभर्नर डा. नीलम ढुंगाना तिमसिना, नेपाल बैंकर्स संघ र डेभलपमेन्ट बैंकर्स संघका अध्यक्षहरू, नेपाल वित्तीय संस्था संघका फस्ट भाइस प्रसिडेन्ट, नेपाल राष्ट्र बैंकका वरिष्ठ अधिकारीज्यूहरू, नेपाल सरकारका विभिन्न निकायका प्रतिनिधिहरू, बैंक तथा वित्तीय संस्थाहरू, पीएसपी, पीएसओका प्रमुखहरू, एनसीएचलका पूर्वअध्यक्षहरू तथा निवर्तमान सञ्चालकहरू, वर्तमान अध्यक्षहरू र सञ्चालकहरू तथा कर्मचारीहरूको उपस्थिति थियो ।

एनसीएचएल पब्लिक फाइभेट पार्टनरसिप मोडेलको अवधारणामा नेपाल राष्ट्र बैंक, बैंक तथा वित्तीय संस्थाहरू तथा एससीटीको करिब ९ करोडको पुँजीबाट सुरु भएको कम्पनी हो । यस कम्पनीले प्रारम्भिक दिनमा म्यानुअल चेक क्लियरिङ डिजिटाइज गर्न एनसीएचएल–ईसीसीको सुरुवात गरेर पछि नेपाल राष्ट्र बैंकको रणनीतिअनुसार आधुनिक डिजिटल भुक्तानी प्रणालीहरू सञ्चालनमा ल्याएको छ ।

१५ वर्षको यात्रामा एनसीएचएलले एनसीएचएल–ईसीसी, एनसीएचएल–आईपीएस, रिटेल पेमेन्ट स्वीच, कनेक्ट आईपीएस, कर्पोरेटपे, कनेक्ट आरटीजीएस, नेसनल पेमेन्ट्स इन्टरफेस (आईपीआई र नेपालपे क्यूआर कार्यान्वयन र सञ्चालन गर्दै आइरहेको छ । हाल नेसनल पेमेन्ट स्वीच (एनपीएस) अन्तर्गत नेसनल कार्ड स्वीच र नेपालपे डोमेस्टिक कार्ड योजना कार्यान्वयन गर्ने क्रममा छ ।

प्रकाशित मिति: मंगलबार, पुस १०, २०८० १४:०६