अयाेध्यामा काेसेली पठाउनेबारे जानकी मन्दिरका मुख्य महन्त र छोटा महन्तबीच विवाद

अयाेध्यामा काेसेली पठाउनेबारे जानकी मन्दिरका मुख्य महन्त र छोटा महन्तबीच विवाद

A+ A A-

भारतको अयोध्यास्थित नवनिर्मित राम मन्दिरको प्राण प्रतिष्ठाको अवसरमा जनकपुरधामबाट भार(कोसेली) पठाउने विषयमा जानकी मन्दिरका मुख्य महन्त र छोटा महन्तबीच मतभिन्नता देखिएको छ । छोटा महन्त रामरोशन दासले केही दिनअघि पत्रकार सम्मेलन गरी राम मन्दिरको प्राण प्रतिष्ठाको अवसरमा जानकी मन्दिरको नेतृत्वमा जनकपुरबाट कोसेलीको रूपमा भार पठाउने र त्यसका लागि सहयोग गर्न नगरवासीसँग अपिलसमेत गरेका थिए ।

तर, जानकी मन्दिरका महन्त रामतपेश्वर दासले स्थानीय सञ्चारकर्मीसँगको कुराकानीमा राम मन्दिरको प्राण प्रतिष्ठाको अवसरमा भार पठाउने विषयमा आफूसँग कुनै सल्लाह वा समन्वय नभएको प्रतिक्रिया दिएका छन् । राम मन्दिरको प्राण प्रतिष्ठाको अवसरमा जानकी मन्दिरबाट कुनै कोसेली नपठाउने र नगरवासीसँग त्यस्तो कुनै अपिल नगरेको उनले स्पष्ट पारे ।

यसअघि छोटा महन्त रामरोशन दासले राम मन्दिरको प्राण प्रतिष्ठामा कोसेली व्यवस्थापनका लागि ११ सय सदस्यीय समितिसमेत बनाइएको र सो समितिको मुख्य संरक्षकमा आफ्ना गुरु अर्थात् मुख्य महन्त रामतपेश्वर दास र जनकपुरधाम उपमहानगरपालिका मेयर प्रमुख मनोज साह रहेको बताएका थिए ।

यो विषयमा मुख्य महन्त रामतपेश्वर दासले भने, ‘राम मन्दिरको प्राण प्रतिष्ठामा कोसेली पठाउन सम्भव छैन । रामरोशन मेरै शिष्य भए पनि उनले कोसेली पठाउने विषयमा कुनै सल्लाह मसँग गरेका छैनन् । पठाउने भनेको छ भने व्यक्तिगत धारणा होला । तर, त्यसमा जानकी मन्दिरको कुनै सरोकार रहने छैन ।‘

राम मन्दिर ट्रस्टबाट आफूलाई प्राण प्रतिष्ठामा सहभागी हुन आमन्त्रण आएको उल्लेख गर्दै मुख्य महन्त दासले भने, ‘म त्यहाँ जान्छु । आफ्नो क्षमताअनुसार केही सामग्री लिएर जान्छु । तर, यहाँबाट भार कोसेली नै लिएर जाँदैनौँ ।’ 'राम मन्दिरको प्राण प्रतिष्ठामा प्रमुख अतिथि भारतका प्रधानमन्त्री नरेन्द्र मोदी रहने र सुरक्षा व्यवस्था कडा पारिने भएकाले ट्रस्टले केही संख्यामा मात्रै सहभागी हुन पत्र पठाएको छ । यस्तोमा भार लिएर जान सम्भव पनि छैन । त्यसको महत्त्व पनि हुँदैन', उनले भने ।

यसअघि राम मन्दिर निर्माणका लागि देवशिला पठाउँदा पनि त्यसको खासै त्यहाँ महत्त्व नदिएको उनले बताए । 'हामीले देवशिला लिएर गयौँ,' मुख्य महन्त दासले भने, ‘तर त्यहाँ कुनै व्यवस्थापन गरिएको थिएन, हाम्रो टोलीलाई खासै महत्त्व दिएन । त्यस कारण अहिले प्राण प्रतिष्ठामा त झन् सुरक्षा कडा हुन्छ । राम मन्दिरबाट ५ किलोमिटर पर नै प्रवेश निषेध गरिएको हुन्छ । भीआईपी वा पासको मात्रै जान्छ । यस्तोमा भार कोसेली पठाउने कुरा व्यावहारिक पनि हुँदैन ।’

प्रकाशित मिति: मंगलबार, पुस १०, २०८० १०:३५