गण्डकी सरकारको नयाँ नियमः अतिथि सत्कारमा एक थरी मात्र

A+ A A-

जनप्रतिनिधिलाई सेवा सुविधा बढाएर बदनाम भएको गण्डकी प्रदेश सरकारले जनताको आँखामा छारो हाल्न अर्को नयाँ निर्णय गरेको छ । प्रदेश सरकारले सार्वजनिक सभा समारोहमा आमन्त्रित अतिथिको स्वागत सत्कारमा प्रयोग हुने धेरै थरी स्वागत सामग्री (फूलमाला, खादा, अबिरलगायत) लाई प्रतिबन्ध लगाएर एक थरीको मात्र प्रयोग गर्ने निर्णय गरेको हो ।

सार्वजनिक निकायको औपचारिक कार्यक्रम सञ्चालन ऐन निर्देशिका सरकारले स्वीकृत गरेपछि सरकारका प्रवक्ता रामशरण बस्नेतले संचारकर्मीमाझ सार्वजनिक गरेका हुन्।

बिहीबार बसेको मन्त्रिपरिषद बैठकको निर्णय शुक्रबार सुनाउँदै सरकारका प्रवक्ता बस्नेतले सार्वजनिक सभा समारोहमा आमन्त्रित अतिथिलाई एकै साथ गरिने फूलमाला, खादा र अबिरको प्रयोगलाई रोक्दै गर्नैपरे एक थरी मात्र प्रयोग गर्ने निर्णय गरेको बताए।

उनका अनुसार सार्वजनिक समारोह गर्दा तीन दिनअघि नै विषय वस्तुका बारेमा जानकारी गराउने कार्यक्रम अत्यन्तै छोटो गर्ने, प्रदेश सरकारले आयोजना गर्ने कार्यक्रमा ३ जनाभन्दा बढी वक्ता नराख्ने र डेढ घण्टाभित्र कार्यक्रम सक्ने निर्णय गरेको छ ।

प्रदेशमा आयोजना हुने सामान्य कार्यक्रममा पुगेर मुख्य मन्त्रीदेखि सांसदसम्मले दिनै बिताउने गरेको भनी सर्वसाधारणबाटै आलोचना खेप्दै आएको सरकारले ढिलै भए पनि सभा सम्मेलनसम्बन्धी नयाँ नियम ल्याएको छ । सार्वजनिक कार्यक्रम गर्दा सरकारले ल्याएको नियमअनुसार गर्न अन्य संघसंस्थालाई समेत प्रदेश सरकारले आग्रह गरेको छ ।

प्रदेश सरकारले कास्की जिल्ला अदालत बार एशोसियसनको भवन निर्माणका लागि ३० लाख, नेपाल पत्रकार महासंघ गण्डकी प्रदेशलाई १५ लाख, महासंघको जिल्ला शाखा बागलुङलाई १५ लाख र तनहुँ शाखालाई १० लाख दिने निर्णयसमेत गरेको प्रवक्ता बस्नेतले बताए।

प्रकाशित मिति: शुक्रबार, असोज १७, २०७६ १९:१३