मा‌ओवादी केन्द्रः राष्ट्रियसभा र सरकारमा जान युवाको लबिङमा लाभ लिएकाहरूको छेकबार

मा‌ओवादी केन्द्रः राष्ट्रियसभा र सरकारमा जान युवाको लबिङमा लाभ लिएकाहरूको छेकबार

A+ A A-

सरकारको नेतृत्व गरिरहेको माओवादी केन्द्रले राष्ट्रियसभाको उम्मेदवारका लागि यही पुस १५ सम्म सातवटै प्रदेशबाट आकांक्षीको नाम मागेको छ । पार्टी केन्द्रमा पनि सम्भावित नेताहरूको चर्चा चलिरहेको छ । त्यसका लागि पनि पार्टीका पदाधिकारीहरूकै चर्चा बढी छ ।

अहिलेसम्म चर्चामा रहेका पदाधिकारीले खुलेर त्यसबारे नबोले पनि पार्टीमा कसलाई पठाउँदा ठीक होला भनेर नेताहरूको नाममा चर्चा हुन थालेको केन्द्रीय कार्यालयका सचिव डोरप्रसाद उपाध्याय बताउँछन् । ‘केही पदाधिकारीको नामका बारेमा चर्चा भएको हो । राष्ट्रियसभामा पठाउँदा कस्तो व्यक्ति पठाउने, कसलाई पठाउने भनेर चर्चा भएको हो,' उनले भने, 'चर्चा भएका नेताहरूमा केही पार्टीका पदाधिकारीका नाम आएका थिए । तर, नाम आएका पदाधिकारीहरूले आफूले अहिलेसम्म कहीँ कतै इच्छा जाहेर गर्नुभएको छैन ।’

माओवादीका युवानेताहरूले भने राष्ट्रियसभामा अहिलेसम्म अवसर नपाएका युवालाई पठाउनुपर्ने अभियान चलाएका छन् । अनेरास्ववियु क्रान्तिकारीका नेताहरूले पटक-पटक अवसर पाएर देशलाई योगदान गरिसकेकालाई सधैँ अवसर दिनुको सट्टा अवसर नपाएकाहरूलाई यसपटक राष्ट्रियसभामा पठाउनुपर्ने अभियान सामाजिक सञ्जालमा पठाएका छन् ।

पार्टीमा भने पदाधिकारी त्यसमा पनि २०७९ को चुनावमा पराजितहरूका बारेमा बहस चल्न थालेको छ । चुनावमा पराजितहरूले अहिलेसम्म आफैँले मुख नखोले पनि पार्टीको आवश्यकताको नाममा पुन: राष्ट्रियसभामा अवसर दिन नहुने युवानेताहरू बताउँछन् । ‘केही नेताहरूले सामाजिक सञ्जालमा लेख्नुभएको छ, केही नेताहरू बोल्नुभएको छैन । केही नेताले अरु जेसुकै होस्, आफूले सधैँ पद पाउनुपर्छ भन्ने सोचेका छन् । यसपटक अवसर नपाएका युवाहरूलाई अवसर दिनुपर्ने हो । तर, देलान्‌जस्तो लाग्दैन,’ एक नेता भन्छन् ।

प्रदेशलाई नाम दिन निर्देशन गरेर केन्द्रमा भने पदाधिकारीकै बारेमा दबाब बढ्न थालेको छ । माओवादीका एक केन्द्रीय सदस्य अघिल्लो वर्ष चुनाव हारेकाहरूकै बारेमा चर्चा चलेको भन्दै उनीहरूलाई पुनः अवसर दिन नहुने बताउँछन् । ‘लोभीपापी नेताहरू म निर्वाचन हारेको हुँ । अब राष्ट्रियसभाको निर्वाचनमा उठ्दिनँ भन्दैनन् । पार्टीले आवश्यक ठाने, जिम्मेवारी दिए निभाउँछु भन्दै छन् । राजनीतिक संस्कार नै छैन,' ती केन्द्रीय सदस्य भन्छन्, 'उनीहरूका अभिव्यक्ति, सामाजिक सञ्जालका स्टाटस हेर्नु न, थाहा भइहाल्छ नि ।'

अहिले नेताहरू आफैँले दाबी गरिसकेका छैनन् । तर, पार्टीले आवश्यक ठाने जिम्मेवारी लिने भन्न भने थालेका छन् । अर्कोतर्फ नेताहरूको व्यवस्थापनको कुरा पनि उठ्न थालेको छ ।

उपाध्याय भने अनुभवी नेतालाई राष्ट्रियसभामा पठाउँदा उपयुक्त हुने भएकाले पदाधिकारीका बारेमा चर्चा भएको दाबी गर्छन् । ‘पठाउने भनेर जो पायो त्यहीलाई पठाउने होइन होला ? जानेबुझेको परिपक्व नेता पठाउनेबारे सामान्य चर्चा भएको हो । त्यसमध्ये केही चुनाव हारेका नेताहरूको पनि चर्चा भएको हो,’ उनले भने ।

युवा विद्यार्थीहरूले भने पटक-पटक एउटै व्यक्तिलाई अवसर दिन नहुने भनेर अभियान नै चलाएका छन् । पार्टीका प्रदेश कमिटीले नाम सिफारिस गर्न थालेका छन् । बागमती प्रदेशबाट कुमार पौडेल र विशेष प्रदेशबाट लेखनाथ न्यौपानेको नाम पार्टी केन्द्रमा सिफारिस भएको स्रोतले बतायो ।

यसपटक पार्टीले युवानेताहरूलाई अवसर दिनुपर्ने अनेरास्वीयु क्रान्तिकारीका उपाध्यक्ष नरेश रेग्मी बताउँछन् । ‘संसदमा अथवा राष्ट्रियसभामा युवाहरू पठाउनुपर्छ । संसदमा अन्टसन्ट कुरा सुन्नभन्दा लेखनाथ न्यौपानेलगायतका युवाहरूले जनताका कुरा उठाउनुहुन्छ । अहिलेको समस्या के हो भनेर कुरा राख्ने मानिसको आवश्यकता छ । त्यसका लागि युवानेताहरू पठाउनुपर्छ ।’

गण्डकी प्रदेशले नाम सिफारिस गरिसकेको छैन । प्रदेशमा तीन/चार जना नेताहरूले दाबी गरेका छन् । कास्कीका झलकपाणि तिवारी, म्याग्दीका गोविन्द पौडेल, बाग्लुङकी वलावती शर्मा र सुमन देवकोटा राष्ट्रियसभाका दाबेदार हुन् ।

लुम्बिनी प्रदेशमा पनि आकांक्षीमध्ये अधिकांश सांसद भइसकेका छन् । लुम्बिनीबाट आकांक्षीमा रोल्पाबाट जयपुरी घर्ती, रुकुमपूर्वबाट गणेशमान पुन, दलिजित शिर्पाली, कुवेर ओली, शेषुराम भण्डारी, मिन ब. पाण्डे, घनश्याम यादव, सीता वौडेल र ठाकुर विक रहेका छन् ।

लुम्बिनी प्रदेश कमिटीले एक/दुई दिनमा नाम सिफारिस गर्ने तयारी गरिरहेको प्रदेश कमिटी अध्यक्ष सुदर्शन बराल बताउँछन् । ‘पार्टीले तीन जना उम्मेदवारको नाम सिफारिस गर्न भनेको छ । एक/दुई दिनमा सिफारिस गरेर पठाउने तयारी गरेका छौँ । तर, आकांक्षीहरू भने धेरै देखिनुभएको छ,’ उनले भने ।

सुदूरपश्चिम प्रदेश कमिटीले पनि एक/दुई दिनमा सिफारिस गर्ने योजना बनाएको नेता खगराज भट्टले जानकारी दिए । उनले भने, ‘आकांक्षी हुनुहुन्छ । एक/दुई दिनमा बैठक बसेर नाम टुङ्ग्याएर केन्द्रमा पठाउने तयारी गरेका छौँ ।’

सुदूरपश्चिममा पनि आकांक्षीको लर्को छ । केही नयाँ र केही अवसर पाएकाहरू आकांक्षी रहेको एक केन्द्रीय सदस्यले बताए । ‘केही नयाँ साथीहरूले आकांक्षा देखाउनुभएको छ । केही एकपटक अवसर पाएका साथीहरूले पनि आकांक्षा राखेका छन् । तीन जनामा कस–कसलाई सिफारिस गर्ने हो, अप्ठेरो छ,’ उनले भने ।

सुदूरपश्चिमबाट पूर्वसभासद देवराज रेग्मी, लक्ष्मण जोशी, देवीलाल चौधरी, हरि ज्ञवाली, रेणु चन्द, वीरमान चौधरी आकांक्षी छन् । नयाँमा घाइते र महिला रहेका छन्, जसमा जितबहादुर करिया कंगरुन, प्रेम बयक र गम्भीर थापा घाइते हुन् । महिलाबाट विमला सिंह, सरु चौधरी आकांक्षी छन् ।

कर्णाली प्रदेशले पनि नाम सिफारिस गरिसकेको छैन । कर्णालीबाट विष्णु विक, टीका बुढाथोकी, गोमा कुँवर र दिपेन्द्र रोकायाको चर्चा र दाबी दुवै रहेको एक केन्द्रीय सदस्यले बताए । ‘प्रदेश इञ्चार्ज हुनुहुन्न । प्रदेशअन्तर्गत सबै जिल्लाबाट नाम मागेका छौँ । समयमा प्रदेशको बैठक बसेर केन्द्रमा नाम पठाउँछौँ,’ प्रदेश अध्यक्ष विमला केसीले भनिन्, ‘आकांक्षीहरू धेरै हुनुहुन्छ । नाम जिल्लाजिल्लाबाट आइरहेका छन् । इञ्चार्ज कमरेड आएपछि बैठक बसेर निर्णय गरेर केन्द्रमा पठाउँछौँ ।’

कोशी प्रदेशमा महिलाको कोटा भएकाले माओवादीबाट सबै महिला आकांक्षी रहेको प्रदेश अध्यक्ष हर्क नेम्वाङले बताए । ‘हाम्रोबाट महिलाको क्लस्टरको पदावधि सकिएकाले महिला नै सिफारिस गर्नुपर्नेछ । त्यसका लागि नाम संकल गर्ने काम भइरहेको छ । केही दिनमा सिफारिस गर्ने तयारीमा छौँ,’ उनले भने । त्यसमा पनि अवसर पाइसकेकाहरूकै नामको चर्चा छ । दाबी गर्नेमा समिता कार्की र धनमाया विक संविधासभा सदस्य भइसकेका हुन् । अरुमा चम्पा कार्की, लक्ष्मी न्यौपाने, करुणा ढुंगेल, ममता ताजपुरिया, चन्द्रा तामाङ र होमकुमारी खापुङ रहेका छन् । तर, कोशी प्रदेशबाट अवसर पाएकाहरूलाई सिफारिस नै नगर्ने तयारी भएको स्रोत बताउँछ । तर, अवसर पाएकाहरूको दबाबमा यो टिक्छ कि टिक्दैन, त्यो भने अहिले भन्न सकिने अवस्था छैन ।

राष्ट्रियसभा मात्र नभएर सरकार परिवर्तनको चर्चा चलिरहेको बेला युवानेताहरूले मन्त्रीमा आकांक्षा देखाउन थालेका छन् । त्यसका लागि युवा विद्यार्थीबाट लबिङ पनि भइरहेको छ ।

प्रधानमन्त्री पुष्पकमल दाहाल प्रचण्डले यही ६ गते ‘जनतासँग माओवादी विशेष रूपान्तरण अभियान’अन्तर्गत मोरङको मिक्लाजुङ गाउँपालिकामा आयोजित कार्यक्रमलाई सम्बोधन गर्दै परिणाम नआए मन्त्री फेर्ने बताएका थिए । यसले सरकारका मन्त्रीहरू फेरबदल हुने सम्भावना देखाउँछ ।

माओवादीबाट मन्त्री फेरबदल भए चार जना नयाँ मन्त्री आउने सम्भावना छ । गृहमन्त्री यथावत् रहे तीन जना नयाँ मन्त्री आउनेछन् । त्यसका लागि लबिङ सुरु भएको छ । जसमा लेखनाथ दाहाल, माधव सापकोटा, सूर्यमान दोङ, हितबहादुर तामाङ, महेन्द्रबहादुर शाहीको लबिङ छ । महिलाबाट मन्त्री बनाउनुपरेमा नारायणी शर्माको नाम चर्चामा छ ।

माओवादीका एक मन्त्री पहिला नै फेरबदल भएका थिए । गृहमन्त्री नारायणकाजी श्रेष्ठ र रेखा शर्माबाहेक अरुले प्रभावकारी रूपमा काम गर्न नसकेको आरोप माओवादीभित्रबाट लाग्न थालेको छ । गठबन्धनमा सहभागी अधिकांश मन्त्रीको कामप्रति प्रधानमन्त्री पनि सन्तुष्ट नभएकाले राष्ट्रियसभाको निर्वाचनपछि मन्त्रीहरू फेरबदल हुने सम्भावना रहेको बताइएको छ ।

प्रकाशित मिति: सोमबार, पुस ९, २०८० १७:५३