ग्लोबल आईएमई बैंकको 'मेरी उनीलाई स्वस्थ नारी पहल'अन्तर्गत सातै प्रदेशमा निःशुल्क स्वास्थ्य शिविर

ग्लोबल आईएमई बैंकको 'मेरी उनीलाई स्वस्थ नारी पहल'अन्तर्गत सातै प्रदेशमा निःशुल्क स्वास्थ्य शिविर

A+ A A-

ग्लोबल आईएमई बैंकले आफ्नो १७औँ वार्षिकोत्सवको अवसरमा 'मेरी उनीलाई स्वस्थ नारी पहल' अभियान सञ्चालन गरेको छ । बैंकले यही पुस १७ गते मंगलबारदेखि ग्लोबल बैंक १७औँ वर्षमा प्रवेश गर्ने भएकाले आफ्नो सामाजिक उत्तरदायित्वअन्तर्गत उक्त अभियान सञ्चालन गरेको जनाएको हो ।

'मेरी उनीलाई स्वस्थ नारी पहल' अभियान ग्लोबल आईएमई बैंकले नेपाल परिवार नियोजन संघसँगको सहकार्यमा सातवटै प्रदेशहरूमा एकदिने निःशुल्क महिला स्वास्थ्य शिविर सञ्चालन गर्न लागेको छ ।

शिविरमा स्त्रीरोग विशेषज्ञहरूले स्त्रीरोगसम्बन्धी विभिन्न सेवाहरू– महिलाको स्वास्थ्य परीक्षण, पाठेघरको क्यान्सर (भीआईए) परीक्षण, गर्भाशय प्रोल्याप्स केसको उपचार, औषधि वितरणलगायतका सेवाहरू निःशुल्क रूपमा उपलब्ध गराइने बैंकले जनाएको छ ।

प्रत्येक शिविरबाट पाठेघरको क्यान्सरको प्रारम्भिक लक्षण पत्ता लागेका र पाठेघरको क्यान्सरको गम्भीर बिरामी पहिचान गर्ने र क्यान्सर रोग पत्ता लागेका महिलाहरूलाई 'स्वस्थ नारी पहल कार्यक्रम'को दोस्रो चरणमा शल्यक्रिया गरी उपचार गरिनेछ ।

यसअन्तर्गत बैंकले पुस ४ गते बुधबार सुदूरपश्चिम प्रदेशमा बाजुरा जिल्लाको गौमुल गाउँपालिका– २, दहकोट स्वास्थ्य चौकीमा स्वास्थ्य शिविर सञ्चालन गरिसकेको छ । सो शिविरमा १ सय ७० भन्दा बढी महिलाहरूको स्वास्थ्य जाँच गरिएको थियो ।

यसैगरी, बैंकले अरु छवटा प्रदेशहरूमा यही पुस महिनामा शिविर सञ्चालन गर्नेछ । जसअन्तर्गत बैंकले बागमती प्रदेशमा भरतपुर महानगरपालिका– ८, चितवन स्थित गौरीगंज स्वास्थ्य चौकी, शरदपुरमा पुस १३ गते शुक्रबार, लुम्बिनी प्रदेशमा रैनादेवी छहरा गाउँपालिका– ३, पाल्पा स्थित छहरा स्वास्थ्य चौकीमा पुस १७ गते मंगलबार, कर्णाली प्रदेशमा वीरेन्द्रनगर नगरपालिका– १३, सुर्खेतस्थित जर्बुट्टा स्वास्थ्य चौकीमा पुस १८ गते बुधबार शिविर सञ्चालन गरिने भएको छ ।

त्यसैगरी, गण्डकी प्रदेशमा अन्नपूर्ण गाउँपालिका– ६, म्याग्दीस्थित पोखरेबजार आधारभूत विद्यालयमा पुस २१ गते शनिबार र कोशी प्रदेशमा इलाम नगरपालिका– ४, इलामस्थित मलाटे स्वास्थ्य चौकीमा पुस २८ गते शनिबार नि:शुल्क स्वास्थ्य शिविर सञ्चालन गर्ने तयारी छ ।

स्वास्थ्य शिविरबाट ग्रामीण तथा अर्धशहरी क्षेत्रका स्वास्थ्य सेवाको पहुँच नभएका महिलाहरू लाभान्वित हुने र उनीहरूका निम्ति प्रभावकारी हुने विश्वास बैंकले लिएको छ ।

ग्लोबल आईएमई बैंकले स्थापनाकालदेखि नै संस्थागत सामाजिक उत्तरदायित्वलाई प्राथमिकतामा राखेर विभिन्न समयमा यस्ता स्वास्थ्य शिविरहरूको आयोजना गरी ग्रामीण भेगका महिला तथा आमनागरिकहरूलाई प्रत्यक्ष रूपमा लाभान्वित गराउँदै आएको छ ।

प्रकाशित मिति: सोमबार, पुस ९, २०८० १४:२३