पर्यटनमन्त्री किराँतीलाई तत्काल बर्खास्त गर्न राप्रपा नेपालको माग

A+ A A-

राप्रपा नेपालले संस्कृति, पर्यटन तथा नागरिक उड्‌डयनमन्त्री सुदन किराँतीलाई तत्काल बर्खास्त गर्न माग गरेको छ ।

शुक्रबार बसेको सचिवालयको बैठकले संविधानको मर्म र भावना विपरीत धार्मिक, साम्प्रदायिक विद्वेष र द्वन्द्व फैलाउने खालको अभिव्यक्ति दिने पर्यटनमन्त्री किराँतीलाई तत्काल बर्खास्त गर्न माग गरेको हो । 'क्रिश्चियन नमान्ने संविधान विरोधी हुन्, तिनीहरूलाई जेलमा कोच्नुपर्छ’ भन्ने मन्त्री किराँतीको भनाइ आपत्तिजनक रहेको राप्रपा नेपालको निष्कर्ष छ ।

राप्रपा नेपालले ९४ प्रतिशत सनातन धर्मावलम्बीहरूलाई अपमान गर्ने र चुनौती दिने अभिव्यक्ति कदापि स्वीकार्य हुने जनाएको छ । उसले विश्वका हिन्दु र बौद्ध धर्मावलम्बीहरूको आस्थाको केन्द्र तथा आराध्यदेव पशुपतिनाथ मन्दिरको संरक्षण र सम्वर्द्धन गर्ने जिम्मेवारी बोकेको पशुपति क्षेत्र विकास कोषको कार्यकारी निर्देशक पदमा गैरसनातनी व्यक्तिलाई मनोनीत गर्ने सरकारको निर्णय आपत्तिजनक रहेको उसको भनाइ छ ।

संस्थाको आदर्शप्रति आस्था र विश्वास नहुने व्यक्तिबाट कसरी संस्थाको हित रक्षा हुन्छ ? भन्ने प्रश्न पनि राप्रपा नेपालले गरेको छ । 'मन्त्रीको गैरजिम्मेवार अभिव्यक्ति र पशुपति क्षेत्र विकास कोषमा विधर्मी व्यक्तिको नियुक्ति सनातन धर्म संस्कृति र परम्परा कमजोर बनाउने र विदेशी धर्म स्थापित गर्ने कुत्सित मनशाय र नियोजित षड्यन्त्रबाट प्रेरित रहेको स्पष्ट बुझ्न सकिन्छ,' महामन्त्री एवं सचिवालय प्रमुख भास्कर भद्राद्वारा जारी विज्ञप्तिमा उल्लेख छ ।

विवादास्पद अभिव्यक्ति दिने मन्त्री किराँतीलाई तत्काल पदबाट बर्खास्त र पशुपति क्षेत्र विकास कोषको कार्यकारी निर्देशक नियुक्तिको निर्णय फिर्ता नभए सशक्त प्रतिवादमा उत्रिने राप्रपा नेपालले चेतावनी दिएको छ । माग सम्बोधन नभएमा ८ पुसमा देशभर विरोध प्रदर्शन र पुतलादहन गर्ने राप्रपा नेपालले चेतावनी पनि दिएको छ ।