विदेशमा रहेको रुसी ३ सय अर्ब डलर जफत गरेर युक्रेनलाई दिने पश्चिमा राष्ट्रको तयारी (भिडियो)

विदेशमा रहेको रुसी ३ सय अर्ब डलर जफत गरेर युक्रेनलाई दिने पश्चिमा राष्ट्रको तयारी (भिडियो)

A+ A A-

पश्चिमा राष्ट्रबाट लगातार हतियार पाइरहँदा युक्रेनका राष्ट्रपति भोलोदिमिर जेलेन्स्कीले अन्तिम सास रहुन्जेल रुससँग लड्ने बताउँथे । यतिबेला युक्रेनको प्रमुख हतियार सहयोगी अमेरिका र युरोपेली युनियनबाट हतियार सहयोग आउन छाडेको छ ।

जेलेन्स्कीले पश्चिमा राष्ट्रबाट हतियार प्राप्त हुन बन्द भएमा युद्ध हार्ने बारम्बार बताइरहेका छन् । केही समयअघि मात्र युक्रेनलाई भनेर छुट्याइएको दुईवटा सहयोग प्याकेज अस्वीकृत भएपछि युक्रेन निराश छ । अमेरिकी सिनेटमा प्रस्तावित ६१ अर्ब अमेरिकी डलरको प्रस्ताव रिपब्लिकन सिनेटरहरूले अस्वीकृत गरिदिएका थिए भने युरोपेली युनियनले दिने भनेको ५५ अर्ब अमेरिकी डलरको प्रस्ताव हंगेरीले भिटो प्रयोग गर्दै अस्वीकार गरिदिएको थियो ।

युक्रेनलाई सहयोग गर्ने पश्चिमा राष्ट्रको कुनैपनि प्रयास असफल भइरहँदा अमेरिकी सरकारले नयाँ जुक्ति लगाएको छ । अमेरिकाले आफ्ना पश्चिमा साझेदारहरूसँग मिलेर विदेशमा रहेका रुसी सम्पत्ति जफत गरेर युक्रेनलाई सहयोग गर्ने योजना बनाएको न्युयोर्क टाइम्सले जनाएको छ ।

अमेरिकी सरकारको नेतृत्वमा अमेरिका, बेलायत, फ्रान्स, जर्मनी, इटाली, क्यानडा र जापानले उनीहरूको देशमा रहेका ३०० अर्ब अमेरिकी डलरको सम्पत्ति युक्रेनलाई दिन सकिने विषयमा छलफल भइरहेको छ । उक्त देशका अर्थमन्त्रीहरूले यो छलफल गरिरहेका छन् ।

यद्यपि विज्ञहरूले विदेशी सम्पत्ति जफत गरिँदा त्यसले गलत नजिर स्थापित हुन सक्ने पनि सुझाव दिइरहेका छन् । यसरी विदेशी सम्पत्ति जफत गरिँदा विदेशी लगानी रोकिन सक्ने चुनौती छ । सन् २०२२ को फेब्रुअरी २४ मा रुसले युक्रेनमा आक्रमण गरेपछि पश्चिमा राष्ट्रले विदेशमा रहेको रुसी सम्पत्ति रोक्का गरिदिएको अवस्था छ ।