राष्ट्रियसभा निर्वाचन: दलहरू उम्मेदवारको नामावली संकलन गर्दै

A+ A A-

सरकारको नेतृत्व गरिरहेको नेकपा माओवादी केन्द्रले सातै प्रदेश कमिटीलाई १५ पुसभित्र राष्ट्रियसभाको निर्वाचनमा उम्मेदवारको नाम सिफारिस गर्न भनेको छ । प्रदेश कमिटीलाई उम्मेदवारको नाम सिफारिस गरेर केन्द्रमा पठाउन निर्देशन दिइएको मा‌ओवादीका कार्यालय सचिव डोरप्रसाद उपाध्यायले बताए ।

उनले भने, ‘पार्टीका सातवटै प्रदेश कमिटीलाई १५ पुसभित्र नाम पठाउन भनेका छौँ । प्रदेश कमिटीले नाम पठाएपछि छलफल गरेर टुंग्याउँछौँ ।’

माओवादी केन्द्रबाट विना पोखरेल, महेशकुमार महरा र हरिराम चौधरीको छवर्षे कार्यकाल सकिँदै छ । माओवादीबाट तीन जना सांसदको समयावधि सकिँदै छ । तर, उसले सातवटै प्रदेशबाट नामावली सिफारिस गर्न पार्टी कमिटीलाई निर्देशन दिएको छ ।

सत्ता गठबन्धनको भागवण्डामा माओवादीले छ जना उम्मेदवार पाउने पक्कापक्कीजस्तै छ । त्यसका लागि प्रत्येक प्रदेशबाट जुन क्लस्टरको पदावधि सकिँदै छ, त्यहीअनुसार नाम पठाउन भनिएको उपाध्यायले बताए । जुन क्लस्टरमा पदावधि सकिँदै छ, त्यही क्लस्टरसहित गठबन्धनमा भागवण्डा गर्ने भएकाले दलहरूले प्रदेशअनुसार त्यही क्लस्टरको उम्मेदवारको नामावली सिफारिस गर्न भनेको उनी बताउँछन् । उनले भने, ‘उम्मेदवारको नाम सिफारिस गर्दा क्लस्टरअनुसार नै सिफारिस गर्न भनेका छौँ । त्यहीअनुसार सिफारिस भएका जसको भागमा जुन क्लस्टर पर्छ, त्यही सिफारिस गर्नेछौँ ।’

आगामी फागुन २० बाट राष्ट्रियसभामा निर्वाचित १९ र मनोनीत एक गरी २० सांसदको समयावधि सकिँदै छ । राष्ट्रियसभा सदस्य निर्वाचन ऐन, २०७५ बमोजिम पद रिक्त हुनुभन्दा ३५ दिनपहिले निर्वाचन गरिसक्नुपर्ने कानुनी व्यवस्था छ । त्यसका लागि निर्वाचन आयोगले निर्वाचनको कार्यतालिका सार्वजनिक गरेको छ । आयोगले यही पुस १६ मा सातवटै प्रदेशमा निर्वाचन कार्यालय स्थापना गर्नेछ ।

नेपाली कांग्रेसबाट अनिता देवकोटा, जितेन्द्रनारायण देव, प्रकाश पन्थ र रमेशजङ्ग रायमाझीको पदावधि सकिँदै छ । सत्ता गठबन्धन हुँदा उसले लगभग ९ सिट पाउने भएको छ । कांग्रेसले यही २ पुसमा जिल्ला र प्रदेश समितिलाई एक जना महिलासहित तीन जनाको नाम सिफारिस गरेर पठाउन भनेको प्रचार विभाग प्रमुख मीन विश्वकर्माले बताए ।

‘पुस २३ गते उम्मेदवारी दर्ता छ । त्योभन्दा पहिला हामीले पार्टीका सबै जिल्लाबाट प्रदेश समिति र त्यहाँबाट केन्द्रमा एक महिलासहित तीन जनाको नाम सिफारिस गर्न भनेका छौँ । आकाँक्षीहरूको नाम आएपछि पार्टीले छलफल गरेर टुंग्याउँछ,’ विश्वकर्माले भने ।

एकीकृत समाजवादीको सचिवालय बैठक जारी रहेकाले अहिले नै राष्ट्रियसभामा उम्मेदवार बनाउनेबारे निर्णय नभइसकेको पोलिटब्युरो सदस्य दिलकुमारी पन्तले बताइन् । उनले भनिन्, ‘अहिले नै मापदण्ड बनाएर उम्मेदवारको नाम सिफारिस गराएको छैन । पार्टीको बैठक जारी छ । केन्द्रीय कमिटी बैठकपछि ठोस रूपमा मापदण्ड बन्छ ।’

नेकपा एसका दुई जना सांसदको पदावधि सकिँदै छ, जसमा नन्दा चपाई र सिंगबहादुर विश्वकर्मा रहेका छन् । भागवण्डामा पार्टीले दुई जना सांसद पाउने नेताहरू बताउँछन् ।

२३ गते उम्मेदवारी दर्ता गर्नुपर्ने भएकाले सत्ता गठबन्धनमा पनि कसले कुन प्रदेशबाट कुन क्लस्टर लिने भन्नेबारे पनि टुङ्गो लागेको छैन । गठबन्धनमा जसबाट जुन क्लस्टरको सांसदको पदावधि सकिँदै छ, त्यही क्लस्टरको पाउने देखिन्छ ।

नेकपा एमालेबाट आठ जना सांसदहरूको पदावधि सकिँदै छ, जसमा गणेश तिमिल्सिना, इन्दु कडरिया, दीपा गुरुङ, दिलकुमारी रावल, कुमार दसौँदी, नरपति लुवार, भैरवसुन्दर श्रेष्ठ र रामचन्द्र राई छन् ।

प्रमुख प्रतिपक्ष दल नेकपा एमालेले भने अहिलेसम्म यसबारेमा कुनै निर्णय नगरेको उपमहासचिव प्रदीप ज्ञवालीले बताए । उनले भने, ‘एमालेले भरखर मध्यपहाडी लोकमार्गमा अभियान सकेको छ । अब अर्को हप्ताबाट बैठक बसेर यो विषयमा छलफल हुन्छ । प्रदेश कमिटीमा आकांक्षी साथीहरूको नामावली केन्द्रमा आऊला ।’

राष्ट्रियसभामा पदावधि सकिन लागेका २० सिटमध्ये बागमतीमा ४, गण्डकी, कर्णाली र सुदूरपश्चिममा ३/३, कोशी, मधेश र लुम्बिनी प्रदेशमा २/२ सिट छन् । पदावधि सकिने १९ जनामा अन्यमा पाँच जना, महिला सात जना, दलित दुई जना र अपाङ्गता भएका व्यक्ति वा अल्पसंख्यक समुदायबाट तीन जना छन् । अन्यमा गण्डकी प्रदेश, सुदूरपश्चिम प्रदेश, लुम्बिनी प्रदेश, मधेश प्रदेश र कोशी प्रदेशबाट एक/एक जनाको पदावधि सकिँदै छ । जसमा गणेश तिमिल्सिना, खिमलाल भट्टराई, जितेन्द्रनारायण देव, भैरव सुन्दर श्रेष्ठ, रमेशजंग रायमाझी र हरिराम चौधरी छन् ।

महिलामा सात जनाको पदावधि सकिँदै छ, जसमा सातवटा प्रदेशबाट एक/एक जना छन् । यसमा विना पोखरेल, प्रमिला कुमारी, नन्दा चपाई, दिलकुमारी रावल थापा, दीपा गुरुङ, इन्दु कडरिया र अनिता देवकोटा छन् ।

अपाङ्गता भएका व्यक्ति वा अल्पसंख्यक समुदायबाट गण्डकी, सुदूरपश्चिम र बागमती प्रदेशबाट पदावधि सकिँदै छ, जसमा प्रकाश पन्थ, महेशकुमार महरा र रामचन्द्र राई छन् । जनता समाजवादी पार्टीबाट एक जनाको पदावधि सकिँदै छ, जसमा प्रमिला कुमारी छिन् ।

प्रकाशित मिति: बिहीबार, पुस ५, २०८० २०:२९