सार्कस्तरीय युवा वैज्ञानिक सम्मेलन हुने

A+ A A-

युवा बैज्ञानिकका आवश्यकता पहिचान र विकासमा बैज्ञानिक पद्धतिको सदुपयोग गर्न नेपालमा २ वटा सार्क स्तरीय युवा बैज्ञानिक सम्मेलन हुने भएको छ ।

प्रदेश ३ को उद्योग, पर्यटन, वन तथा वातावरण मन्त्रालय र त्रिुभवन विश्वविद्यालयको सहकार्यमा हुने यो सम्मेलनका लागि मन्त्रालय र त्रिभुवन विश्वविद्यालयका दुई विभागबीच हेटौँडामा शुक्रबार समझदारी पत्रमा हस्ताक्षर भएको छ । सम्मेलनमा दक्षिण एशियाली क्षेत्रमा विज्ञान तथा प्रविधिमा भएका उपलब्धिको अनुभव साटासाट हुनेछ ।

मन्त्रालयको लगानी र त्रिभुवन विश्वविद्यालय व्यवहारिक विज्ञान तथा प्रविधि अनुसन्धान केन्द्र (रिकाष्ट) र विश्वविद्यालयकै जल तथा मौसम विज्ञान विभागको समन्वयमा सम्मेलन हुने भएको छ ।

मन्त्रालयका सहसचिव रघुराम पराजुली, रिकाष्टका कार्यकारी निर्देशक प्राध्यापक डाक्टर रामेश्वर अधिकारी र मौसम विज्ञान विभागका प्रमुख डाक्टर दिपक अर्यालबीच समझदारी पत्रमा हस्ताक्षर भएको हो ।

युवाको लागि यो सम्मेलन अतेन्तै प्रभावकारी हुने प्रदेश नम्बर ३ का मूख्यमन्त्री डोरमणी पौडेलले बताए । दक्षिण एसियाका युवा वैज्ञानिकहरुलाई नेपालका युवा वैज्ञानिकहरुसँग एउटै कार्यक्रममा सहभागी गराई विश्वमा विकसित विज्ञान तथा प्रविधि क्षेत्रका नविनतम ज्ञानहरुको बारेमा जानकारी गराइनेछ ।

काठमाडौंमा रिकाष्टले गर्ने देशभित्रको युवा बैज्ञानिक सम्मेलन बैशाख १० र ११ गते र मौसम विज्ञान विभागले गर्ने सार्कस्तरीय बैज्ञानिक सम्मेलन जेठ २२ र २३ गते हुने भएको छ ।

युवा बैज्ञानिक सम्मेलनमा देशभरका एक सय ५० र सार्कस्तरीय सम्मेलनमा विदेशी १५ जनासहित ५० जना बैज्ञानिकको सहभागिता रहने जनाईएको छ । सार्क सम्मेलनको खर्च ५० लाख हुनेछ भने राष्ट्रिय युवा सम्मेलनको खर्च ३० लाख हुने सम्झौता पत्रमा उल्लेख छ ।

कार्यक्रममा उद्योग, पर्यटन, वन तथा वातावरण मन्त्री अरुण नेपाल, त्रिभुवन विश्वविद्यालयका प्रतिनिधि, मन्त्रालयका प्रतिनिधि, नीति तथा योजना अयोगका प्रतिनिधि, प्रदेशसभा सदस्य लगायतको सहभागिता थियो ।

प्रकाशित मिति: शनिबार, फागुन ११, २०७५ ०५:४४